Read Tedim Chin MARKA 14 Bible Online

MARKA 14 - Tedim Chin bible

MARKA 14

¹Paisan Pawi le Silngo Sawh loh Anlum Pawi a tun ma ni nih ni-in siampi liante le Thukham hilh siate in Jesuh simmatin a thahtheih nading uh lampi a zong uh hi.

²Ahi zongin, “Mihonpite hong buai kha ding ahih manin hih pawi hun sungin hih kei ni,” a ci uh hi.

³Bethany khua-ah, miphak ahi ngei Simon’ inn-ah Jesuh in an a nek laitakin, numei khat in a manpha mahmah nard paknamtui citak suangngo thawl dimin a om khat hong tawi a, a suangngo thawl sukhamin Jesuh’ lu tungah a paknamtui a sungsuk hi.

⁴Tua lai-a om mi pawlkhat a heh suak a, “Bang hangin hih paknamtui mawk beisak ahi hiam?

⁵Kizuak le ngun peek zathum val kikhawng ding a, a sum mizawngte tungah kipia thei ding hi,” ci-in nakpitakin tua numei a mawhsak uh hi.

⁶Ahi zongin Jesuh in, “Bangmah cih se kei un! Bang hangin nawngkaisak na hi uh hiam? Amah pen a kilawm a hoihin kei tungah hong gamta hi.

⁷Mizawngte ahihleh note tawh omkhawm tawntung ding a, na huhnop hun peuhpeuhun na huh thei ding uh hi. Ahi zongin kei pen note tawh kong omkhawm tawntung kei ding hi.

⁸Amah in ka luang a kivui nadingin paknamtui a hong ma nuhkhol hi a, a hihtheih zahzah ciang a hih khinta ahi hi.

⁹Hih thu limtakin phawk un! Lungdamna thu a kihilhna leitung mun khempeuhah hihnu’ thu kiphawkin kei tungah hong sepnate kigengen ding hi,” a ci hi.

¹⁰Tua laitakin sawm le nihte sungpan Iskariot’ tapa Judas in amaute tungah Jesuh a piaktheih nadingin siampi liante kiangah a va pai hi.

¹¹Siampi liante in a thu a zak uh ciangin lungdam mahmah uh a, sum tawh kong guai ding uh hi, ci-in thu a ciam uh hi. Tua ahih manin Judas in Jesuh a lehhek theih nading a hunhoih a zong hi.

¹²Paisan Pawi an dingin tuuno a kigawh ni, Silngo Sawh loh Anlum Pawi ni masa ni-in a nungzuite in Jesuh kiangah, “Koi lai-ah pai-in Paisan Pawi an ding hong bawlsak ding ka hi uh hiam?” ci-in a dong uh hi.

¹³Tua ciangin Jesuh in a nungzuite nih sawlin amaute kiangah, “Jerusalem khua sungah va pai le-uhcin, tuibeel a pua mi khat na mu ding uh hi. Amah zui unla,

¹⁴ama tumna innteek pa kiangah, ‘Siapa in hih bangin ci hi: Ka nungzuite tawh Paisan Pawi an ka nek nading uh zintun nading inndei koilai ahi hiam, ci hi,’ va ci un.

¹⁵Amah in a baihsa-in a na kikoihsa inndei tungnung a zai khat hong lak ding hi. Tua lai-ah na bawl un,” a ci hi.

¹⁶Nungzui tegel zong khua sungah va pai uh a, Jesuh’ gen bangin a va mu uh hi. Tua lai-ah Paisan Pawi an ding a bawl uh hi.

¹⁷A nitak ciangin a nungzui sawm le nihte tawh tua munah Jesuh a om hi.

¹⁸An a nek laitakun Jesuh in, “Tu laitakin kei tawh an a nekhawm mi khat in kei hong lehhek ding hi,” a ci hi.

¹⁹A nungzuite in lamdangsa uh a, a banbanin, “Kei nong cihna hi kei buangin teh,” a ci ciat uh hi.

²⁰Jesuh in amaute kiangah, “No sawm le nihte sung, kei tawh an kuang a sawkkhawmte mah sungpan ahi hi.

²¹A kigelhsa mah bangin Mihing Tapa ahihleh si ding a, ahi zongin a lehhek pa’ thuakna nasia mahmah ding hi. Tua mipa a piang ngei het lo hileh ama a dingin hoihzaw tham ding hi,” a ci hi.

²²Tua bangin an a nek laitakun Jesuh in anlum la-in lungdamna a kohkhit ciangin balnenin a nungzuite tungah pia a, “Ne un; hih pen keima pumpi ahi hi,” a ci hi.

²³Tua ciangin hai la a, lungdamna a kohkhit ciangin a nungzuite tungah pia a, tua hai panin a dawnkim uh hi.

²⁴Tua ciangin amaute kiangah, “Hih pen mi tampite a dingin a luang, thuciamna thak a kipsak keima sisan ahi hi.

²⁵Pasian’ Ukna sungah leenggahzu thak ka dawnkik ni matengin leenggahzu a dawn nawn lo ding ka hihna thu limtakin thei un,” a ci hi.

²⁶Amaute inla khat a sakkhit uh ciangin Oliv Mual-ah a pai uh hi.

²⁷Tua ciangin Jesuh in amaute kiangah, “‘Tuucingpa ka satlum ding a, tuute a kithehthang ding hi,’ ci-in Lai Siangtho sungah a kigelh mah bangin note in kei nong taisan ding uh hi.

²⁸Ahi zongin hong kithawh kiksak khit ciangin Galilee gam note mai-ah ka pai ding hi,” a ci hi.

²⁹Tua ciangin Peter in, “Adang khempeuh in nang hong taisan ahi zongin ke’n kong nusia ngei kei ding hi,” a ci hi.

³⁰Jesuh in, “Tuzan mahmahin ak nihvei a khuan’ ma-in thumvei tak kei na hong nial ding lamtak phawk in,” a ci hi.

³¹Ahi zongin Peter in, “Nang tawh sihkhawm nading ciang dong ahi zongin kong nial ngei het kei ding hi,” ci-in khauhtakin a gen hi. Tua mah bangin a vekpi-un a ci kim uh hi.

³²Tua lai panin Gethsemane a kici munah pai-in a tun uh ciangin Jesuh in a nungzuite kiangah, “Thu ka va nget hun sungteng hih lai-ah na om un,” a ci hi.

³³Tua ciangin Peter, James, le Johan-te paipih lai a, nakpitakin lungkhamin a dahna hong kipan hi.

³⁴Amah in, “Ka lungsim dahna lianlua mahmah ahih manin ka si dektak hi. Hih lai-ah om unla na ngak un,” a ci hi.

³⁵Amah tawmkhat pailai-in leilakah boksuk a, ahi thei ding ahihleh hih thuakna hun tawh a kipelh nadingin thu a ngen hi.

³⁶“Pa aw, na khempeuh na hihthei hi. Hih ka thuak ding gimna tawh hong kipelhsak in. Ahi zongin kei’ deihna bang hi loin nangma deihna bang hizaw hen,” a ci hi.

³⁷Tua ciangin hong pai a, a nungzui thumte ihmu-in om a muh ciangin Peter kiangah, “Simon aw, ihmu na hi uh hiam? Nai khat sung nangawn hong ngak zo lo liang na hi uh hiam?” a ci hi.

³⁸Tua ciangin amaute kiangah, “Ze-etna-ah na pukkhak loh nadingun pilvangin thu ngen un. Lungsim in ze-etna nangnuam napi, pumpi in nang zo lo hi,” a ci hi.

³⁹Tua ciangin paikhia leuleu-in thu a nget ngeiteng mah va ngen leuleu hi.

⁴⁰Hong paikik ciangin a nungzuite na ihmu leuleu uh hi. A ihmut uh suak mahmah hi. Jesuh kiangah a gen ding uh bangmah thei lo uh hi.

⁴¹A thumveina a hong ciahkik ciangin amaute kiangah, “Ihmu-in na tawlnga hithiat lailai na hi uh hiam? Phazo hi. A hun hong tungta hi. Mihing Tapa mawhnei mite’ khut sungah hong kipia khinta hi.

⁴²Tho un; pai ta ni. Kei hong lehhek pa hih lai-ah hong tungta hi,” a ci hi.

⁴³Tua bangin Jesuh in thu a gen laitakin sawm le nihte sung panin Judas hong tung a, siampi liante, Thukham hilh siate, le upate in a sawl mihonte in namsau le molhtum tawi-in hong zui uh hi.

⁴⁴A lehhek pa in mihonte tungah, “Ka nap pa pen Jesuh hi ding hi. Tua pa man unla limtakin cingin paikhiatpih un,” ci-in a genkhol hi.

⁴⁵Tua ahih manin hong tun phetin Jesuh kiangah paipah a, “Sia aw,” ci-in limnap mahmah hi.

⁴⁶Tua ahih ciangin amaute in Jesuh manin limtakin a lencip uh hi.

⁴⁷Tua laitakin a gei-a dingte khat in a namsau dokin siampi lianpen pa’ nasempa a sat leh a bil a satkhiatsak hi.

⁴⁸Tua ciangin Jesuh in amaute kiangah, “Guta buluhte a man ding bang keekin, kei a man dingin namsau le molhtum tawh hong kuan na hi uh hiam?

⁴⁹Nisim nisimin biakinn sungah thuhilhin note tawh ka omkhawm a, ahi zongin nong man kei uh hi. Ahi zongin hih thu pen Lai Siangtho sunga a kigelh thu a tun nading ahi hi,” a ci hi.

⁵⁰Tua ciangin a nungzuite khempeuh in Jesuh a taisan uh hi.

⁵¹Puanza kang khat bek a silh tangval khat in zong Jesuh a zui hi. Amaute pawlkhat in amah a mat ciangin,

⁵²a puanza kang nusia-in a guaktangin a tai hi.

⁵³Mihonte in siampi lianpen pa’ inn-ah Jesuh paipih uh a, siampi liante, upate, le Thukham hilh siate hong kikhawm uh hi.

⁵⁴Peter in zong Jesuh’ nung galzuih a, siampi lianpen pa’ inntual ciangah a om hi. Tua lai-ah palikte tawh mei awi-in a tukhawm hi.

⁵⁵Siampi liante a kipan uliante khempeuh in Jesuh a thahtheih nadingin thu zong uh a, ahi zongin bangmah mu lo uh hi.

⁵⁶Mi tampi in amah a mawhsak nadingun zuauthu gen uh a, ahi zongin a genna uh khatlekhat kituak lo hi.

⁵⁷Tua ciangin mi pawlkhat hong dingin amah a mawhsak nadingun zuauthu hong gen uh a,

⁵⁸“Mihingte’ lam hih biakinn ka susia ding a, ni thum khit ciangin mihingte’ lam ahi lo adang khat ka lam ding hi,” a cihna ka za uh hi, ci-in hong gen uh hi.

⁵⁹Amaute nangawn zong a thugenzia uh kituak lo hi.

⁶⁰Tua ciangin amaute khempeuh mai-ah siampi lianpen pa hong dingin Jesuh thu dong a, “Nangmah mawhsakna-in a gen uh thute na dawn nading om lo ahi hiam?” ci-in a dong hi.

⁶¹Ahi zongin Jesuh pau loin a omcip hi. Tua ciangin siampi lianpen pa in, “Phatna a ngah Pasian’ Tapa, Khrih na hi hiam?” ci-in a dongkik leuleu hi.

⁶²Jesuh in, “Ka hi hi; Vanglian Pasian’ taklamah Mihing Tapa omin meii lakah a hong pai na mu ding uh hi,” a ci hi.

⁶³Tua ciangin siampi lianpen pa in a puan balkek a, “Thudang kisam nawn lo hi.

⁶⁴Pasian’ tungah a paukhialhna na zazo uh hi. Bangci ngaihsut na hi uh hiam?” a ci hi. Hih mipa thah dingin kilawm hi, ci-in amaute khempeuh in thu a khen uh hi.

⁶⁵Tua ciangin mi pawlkhat in cilphih uh a, a mai tunsakin beeng uh a, “Kua in hong beng ahi hiam, gen in,” a ci uh hi. Palikte in zong amah paipihin a beeng uh hi.

⁶⁶A nuai-a inntualah Peter a om laitakin siampi lianpen pa’ nasem numeite khat hong pai a,

⁶⁷Peter mei awi-in om a muh ciangin limtakin en a, “Nang zong, Nazareth khuami Jesuh tawh na kikhawl ngei hi,” a ci hi.

⁶⁸Ahi zongin Peter in nial a, “Ka thei kei hi; bang na cihna ahi hiam, cih zong ka tel kei hi,” ci-in dawngin tual pualam paina lampi lamah a pai hi. Tua laitakin ak a khuang hi.

⁶⁹Tua numei mah in a omna-ah Peter mu a, a gei-a omte kiangah, “Hih pa, hua mite khat hi takpi hi,” a cikik leuleu hi.

⁷⁰Ahi zongin Peter in nial leuleu hi. Tawlkhat khit ciangin a gei-a omte in Peter kiangah, “Nang zong Galilee gammi na hih manin huate khat na hi takpi hi,” a ci leuleu uh hi.

⁷¹Tua ciangin Peter in, “Na gen mipa uh ka theih taak leh Pasian in kei hong dawm kei ta hen,” ci-in a kiciam hi.

⁷²Tua khit phetin ak nihveina a khuang hi. Tua ciangin, “Ak nihvei a khuan’ ma-in kei thumvei na hong nial ding hi,” ci-in Jesuh in ama tungah a gensa thu Peter in phawkkik a, dahlua-in a kap hi.