Read Tedim Chin MARKA 16 Bible Online

MARKA 16 - Tedim Chin bible

MARKA 16

¹Sabbath ni a bei khit ciangin Magdala khuami Mary, James nu Mary, le Salome-te in Jesuh’ luang a va zut nadingun paknamtui a va lei uh hi.

²Nipi ni zingsang tung nisuah phetin hanah a pai uh hi.

³Amaute khatlekhat kikum uh a, “Han kongvang hukna suangtum kua’n hong likkhiatsak ding ahi hiam?” a ci uh hi.

⁴Tua laitakin a khuadak uhleh a suangtum a kilikkhia khinsa-in a mu uh hi. (Tua suangtum a gol mahmah khat ahi hi.)

⁵Han sungah a lut uhleh, a taklam pang uhah, puanpak a silh tangval khat a tu mu uh a, lamdangsa-in a lau uh hi.

⁶Tua tangvalpa in, “Lamdangsa kei un. Singlamteh tungah a kithat Nazareth khuami Jesuh na zong uh hi. Amah kithokiksak khin a, hih lai-ah om nawn lo hi. Amah a kisialna mun hong en un.

⁷Tu-in pai unla, Peter le Jesuh’ nungzui dangte kiangah hih thu va gen un. Note tungah hong gensa bangin Galilee gam amaute mai-ah pai hi; tua lai-ah amah na mu ding uh hi, ci hi, ci un,” a ci hi.

⁸Amaute in lamdangsa-in lau uh ahih manin han panin taisuak pah uh a, kuamah dang kiangah hih thu gen lo uh hi.

⁹(Sihna panin Jesuh a thawhkik khit ciangin ama sung pan dawi sagih a hawlkhiatna, Magdala khuami Mary tungah Nipi ni zingsang tungin kilang masa hi.

¹⁰Tua nu zong hong pai-in a dah a kapin a om Jesuh’ lawm luite kiangah hih thu a va gen hi.

¹¹Ahi zongin Jesuh a nuntakna thu le tua nu mahmah in a muh khitna thu a genna a zak uh hangin, a thugen um zo lo uh hi.)

¹²(Tua khit ciangin khuapi panin khuaneu-ah nungzui nihte a pai laitakun amaute tungah a mel tuam khatin Jesuh kilang hi.

¹³Hih tegel zong kileh kikin a lawm dangte uh kiangah gen uh a, ahi zongin amau’ thugen, na um lo uh hi.)

¹⁴(Tua khit ciangin a tawpna-ah, an a nek laitakun nungzui sawm le khatte mahmah kiangah a kilang hi. A kithawhkiksak khit ciangin amah a mu mite’ thugen um lo uh ahih manin a lungkhauhna uh le a up lohna hangun amaute a taii hi.

¹⁵Tua khit ciangin amaute tungah, “Leitung khempeuhah note pai kawikawi unla, mi khempeuh tungah Lungdamna Thu na hilh ta un.

¹⁶Lungdamna Thu umin tui a kiphum mi peuhpeuh in hotkhiatna ngah ding a, a um lo mi peuhpeuh in mawhsakna thuak ding uh hi.

¹⁷A um mite tungah hih vangliatna limte kipia ding hi: Keima hangin dawi hawlkhia thei ding uh a, pau dangte pau thei ding uh hi.

¹⁸Gul a lawn’ hangun bangmah ci lo ding uh a, gu tui a dawn hangun zong bangmah ci lo ding uh hi. Cinate tungah a khut uh nga ding uh a, cinate dam ding uh hi,” a ci hi.)

¹⁹(Tua bangin Topa Jesuh in amaute tungah thu a gen khit ciangin vantungah kilato-in Pasian’ taklamah a tu hi.

²⁰Nungzuite zong mun khempeuhah pai-in thu a hilh uh hi. Topa in zong amaute’ nasep seppih a, a thuhilhnate uh man hi, ci-in a lahna-in amaute tungah vangliatna limte a pia hi.)