Read Tedim Chin MARKA 3 Bible Online

MARKA 3 - Tedim Chin bible

MARKA 3

¹Tua ciangin kikhopna inn sungah Jesuh paikik a, tua lai-ah a khut a langkhat a zaw mi khat na om hi.

²Jesuh gamtakhial hi, ci-in a mawhsak nuam mi pawlkhat tua lai-ah om uh a, Sabbath ni-in hih mipa a damsakkha hiam, ci-in vil gige uh hi.

³Jesuh in khutzaw mipa kiangah, “Hih a mai lamah hong ding in,” a ci hi.

⁴Tua ciangin mite kiangah, “Sabbath ni-in bang i hih ding i Thukham in hong deih ahi hiam? Huh ding maw, gimsak ding; mi khat a nuntakna hot ding maw, thah ding; koi hong deihzaw ahi hiam?” ci-in a dong hi. Ahih hangin kuamah in dawng lo hi.

⁵Jesuh in hehmai tawh a kiim a pam en kawikawi a, ahi zongin a khialhna uh le a thuphawk theih lohna uh hangin mite khasiathuai a sa zel hi. Tua ciangin a mipa kiangah, “Na khut zan in,” a ci hi. Amah in zong a khut zan a, damin a ngeina bangkik hi.

⁶Tua ahih ciangin kikhopna inn panin Farisi mite paikhia-in Herod pawlte kimkhat tawh kikhopna neipah uh a, Jesuh a thahtheih nading uh a vaihawm uh hi.

⁷Tua lai panin Galilee Tuili-ah Jesuh le a nungzuite pai uh a, Galilee gam, Judea gam,

⁸Jerusalem khua, Idumia gam, Jordan galkhat, Taia khuapi kiim le Sidon khuapi kiima om gamte in ama hihsa thute zakhin uh ahih manin, hih gamte panin mihon tampi tak, ama kiangah hong pai uh hi.

⁹Mihonte tamlua mahmah ahih manin amaute in Jesuh a nehcipgawp khak loh nadingin ama om nading gunkuang khat a koih nadingun a nungzuite a sawl hi.

¹⁰Amah in cina mi tampi damsakkhin ahih manin, Jesuh a lawntheih nadingun cina khempeuh in amah hong naih ciat uh hi.

¹¹Tua laitakin mite’ sunga lut dawite in Jesuh a muh uh ciangin a mai-ah pukin kiko uh a, “Nang pen Pasian’ Tapa na hi hi,” a ci uh hi.

¹²Dawite in amah kua mi ahi cihna thu a genkhiat loh nadingun Jesuh in nakpitakin dawite a kham hi.

¹³Tua lai panin a mualtung lamah Jesuh paito a, mi a deihteng ama kiangah a sam hi. Tua a sap mite ama kiangah hong pai uh a,

¹⁴amah in mi sawm le nih teelin, sawltakte, ci-in min a phuah hi. Jesuh in, “Kei tawh a kikhawl dingin noteng ka hong teel hi. Thu a hilh dingin zong ka hong sawl ding a,

¹⁵dawi hawlkhiat nading vangliatna na nei ding uh hi,” a ci hi.

¹⁶Tua a teel mi sawm le nihte: Simon (Jesuh in a min thak dingin Peter a phuah pa),

¹⁷Zebedi’ tapa James le a naupa Johan (Jesuh in hih unaute pen “Vanging bang,” a cih nopna Boanerges min a phuahte),

¹⁸Andru, Filip, Bartholomew, Matthai, Thomas, Alfeas’ tapa James, Thaddeas, Simon (gam khual pa),

¹⁹le Jesuh a lehhek Iskariot’ tapa Judas ahi uh hi. Tua lai panin inn-ah Jesuh ciah a,

²⁰ama kiangah mihonpi hong kikhawmkik zel ahih manin Jesuh le a nungzuite in an nangawn ne thei lo uh hi.

²¹A innkuanpihte in hih thu a zak uh ciangin Jesuh a la dingin hong kuankhia uh hi. Bang hang hiam cih leh, “Jesuh mihai suakta hi,” a kicihna thu a za uh hi.

²²Jerusalem khua pan a hong pai Thukham hilh siate pawlkhat in, “Hih pa sungah Beelzebul lut hi. Dawimangpa in ama tungah dawi hawlkhiat theih nading vangliatna pia hi,” a ci uh hi.

²³Tua ahih ciangin Jesuh in ama kiangah mite samin thugentehna tawh thu hilh a, “Satan in Satan bangci hawlkhiat theih ding ahi hiam?

²⁴Gam khat peuhpeuh phelnih kisuahin kido le-uh tua gam kip lo ding hi.

²⁵Innkuan khat peuhpeuh phelnih kisuahin kido le-uh tua innkuan kipzo lo ding hi.

²⁶Satan le Satan kikhenin kido le-uh kipzo lo ding uh a, a bei ding uh hita uh hi.

²⁷Mi thahatpa hencip masa lopi-in kuamah in mi thahatpa’ innsung pan a neihsate laksak zo lo ding hi. A hencip khit ciang bekin laksakzo pan bek ding hi.

²⁸“Tua ahih ciangin hih thu phawk un! Mihingte’ mawhna le a kampau siatnate uh kimaisak thei ding hi.

²⁹Ahi zongin Kha Siangtho langpangin thu a gente in mawhna kip sukha uh ahih manin a mawhna uh kimaisak ngei lo ding hi,” a ci hi.

³⁰(Mi pawlkhatte in, “Jesuh in dawi vei hi,” ci uh ahih manin hih bangin thu a gen ahi hi.)

³¹Tua laitakin a nu le a naute hong tung uh a, inn pualamah ngakin, Jesuh a sam dingin mi a sawl uh hi.

³²Ama kiimah a tu mihonpite in, “Na nu le na naute, inn pua-ah om uh a, nang hong sam uh hi,” a ci uh hi.

³³Jesuh in, “Ka nu le ka naute i cih kuate ahi hiam?” ci-in a dong hi.

³⁴Ama kimkotah a tu mite en a, “Hih lai-ah ka nu le ka sanggamte om uh hi.

³⁵Pasian’ deihna bangin a gamta mi khempeuh ka nu le ka sanggamte ahi uh hi,” a ci hi.