Read Tedim Chin MARKA 5 Bible Online

MARKA 5 - Tedim Chin bible

MARKA 5

¹Tua ciangin Jesuh le a nungzuite Galilee Tuili galkhat, Gadara mite’ gam sung a tung uh hi.

²Gunkuang tung panin Jesuh a kumsuk khit phetin, han lak panin a hong pai mi khat in na dawntuah hi.

³Hih mipa dawivei hi a, han lakah a teng hi. Kuamah in hih mipa, sikkhau tawh henzo nawn lo uh hi.

⁴Tamveipi tak, a khut le a khe, sikkhau tawh kihen khin ngei a, ahi zongin a kihen simin a sikkhaute botsatin, a khe-a kibulh kolte a sukham gawp hi. Amah hatlua ahih manin kuamah in hih zo lo hi.

⁵Sun le zanin han lak le mualtung tengah vak kawikawi a, awng gawpin, suang hiamte tawh amah a kikuiliam hi.

⁶Hih mipa in Jesuh a gal muh ciangin hong delhin ama mai-ah khukdin a,

⁷nakpitakin kiko-in, “A Lianpen Pasian’ Tapa Jesuh aw, kei bang hong nuammawh na hi hiam? Kei, gim hong pia kei in, ci-in Pasian’ min tawh kong thum hi,” a ci hi.

⁸(Hih bangin a cihna pen, Jesuh in, “Dawi aw, hih mipa sung panin paikhia in,” a cihna hang ahi hi.)

⁹Jesuh in, “Na min bang ahi hiam?” ci-in a dong hi. Mipa in, “Kote tampi pha ka hih manun ka min pen A Honpi ahi hi,” ci-in a dawng hi.

¹⁰Tua gam panin mundangah dawite a hawlkhiat loh nadingin tua mipa in a thum lailai hi.

¹¹Tua laitakin tua nai-a om mualpangah vok hon tampi gamta-in a om hi.

¹²Dawite in, “Hua vokte kiang beekah hong paisak inla, a sungah hong tumsak in,” ci-in a thum uh hi.

¹³Tua ahih manin Jesuh in dawite a pai nading uh thu pia a, dawite zong mipa sung panin paikhia-in vokte sungah a lut uh hi. Tua vok honpite a vekpi-in tulnih bang pha hi. Mualtung panin taisuk henhan uh a, tuili sung kidenna-in tuikia mangkhin uh hi.

¹⁴Tua ciangin tua vokcingte tai-in khuasung le gam sung tengah hih thupiang a gen uh hi. Tua thupiangte a en dingin mite zong hong pai uh hi.

¹⁵Jesuh kiang a tun uh ciangin dawi tampi a vei ngei mipa zong a mu uh hi. Tua mipa hoihtakin om a, a lungsim pilin, puan silhin a om a muh uh ciangin lamdangsa-in lau mahmah uh hi.

¹⁶Hih thupiang a mu mi khempeuh in dawivei pa tunga thupiang le vokte thu, mi khempeuh kiangah a gen kawikawi uh hi.

¹⁷Tua ahih ciangin amau gam panin a paikhiat nadingin mipite in Jesuh a sawlkhia uh hi.

¹⁸Tua lai panin gunkuang tungah Jesuh a kahtoh kik ciangin dawi a vei ngei mipa in, “Kei zong hong zuisak in,” ci-in a thum hi.

¹⁹Ahi zongin Jesuh in amah zuisak lo a, “Na innkuanpihte kiangah ciahkik inla, Topa in nang a hong hehpihna le nangma tunga a hong bawlnate va gen in,” ci-in a sawlzaw hi.

²⁰Tua ahih ciangin a mipa ciah a, tua kiima om Khuapi Sawmte sungah, Jesuh in ama a dingin a sepnate gen a, tua thu a za mi khempeuh in lamdang a sa uh hi.

²¹Jesuh, gunkuang tuangin a galkah khit ciangin, tuili gei ama kiangah mi tampi tak hong kikhawm leuleu uh hi.

²²Tua laitakin kikhopna inn a uk, Jairas a kici mi khat hong pai a, Jesuh a muh ciangin a khe phungah bokin,

²³“Ka tanu si dektak ta hi. Amah a cidam kikin a nuntak theih nadingin hong pai inla, ama tungah na khut hong ngaksak in,” ci-in a thum hi.

²⁴Jesuh zong, tua mipa tawh a paikhia khawm hi. Mi tampi tak in zong zui uh ahih manin Jesuh a nehcip uh hi.

²⁵Tuate lakah, kum sawm le nih sung tawntung siluang natna a nei numei khat a om hi.

²⁶Siavuan tampi in amah bawl a, a sum neih khempeuh zangkhin napi-in noptuamzaw loin gim semsemzaw hi.

²⁷Tua numei in Jesuh’ thu za ahih manin mihonte kawmah Jesuh’ nung a zui hi.

²⁸Tua nu in, “A puan mong nangawn va lawngkha leng, dam ning,” ci-in a ngaihsun hi.

²⁹A va lawnkhit phetin a siluang khawlpah a, ama sunga a natna a damlam a kiphawk hi.

³⁰Jesuh in ama sung panin a vangliatna a paikhiatlam phawkpah ahih manin mihonpite lakah khuadakin, “Kua in ka puan hong lawng na hi uh hiam?” a ci hi.

³¹A nungzuite in, “Mihonpite in nang hong nehcihlam na thei hi. Bang hangin kua in hong lawng na hi uh hiam, ci mawk na hi hiam?” a ci uh hi.

³²Ahi zongin amah a lawngte a theih nadingin Jesuh khuadak kawikawi lai hi.

³³Tua numei in ama tunga thupiang thei ahih manin laukawm lingkawmin hong pai-in a khephungah hong bok a, a thupiang khempeuh ahi bangbangin a hong gen hi.

³⁴Jesuh in zong tua nu kiangah, “Ka tanu aw, na upna in nang hong damsakzo hi. Cidamsuak inla, lungnuam takin va ciah in,” a ci hi.

³⁵Tua laitakin kikhopna inn ukpa’ inn panin kamtaite hong tung uh a, “Na tanu si khinta hi. Bang hangin Siapa mawk gimsak nawn ding na hi hiam?” a ci uh hi.

³⁶Ahi zongin Jesuh in amau thu kigen don loin kikhopna inn ukpa kiangah, “Lunghimawh kei in; upna nei peuh in,” a ci hi.

³⁷Tua lai panin Jesuh in Peter le James le a nau Johan longal kuamah dang kizuisak nawn lo hi.

³⁸Kikhopna inn ukpa’ inn a tun uh ciangin mite’ kahna le thumna, a gamlumna uh a mu hi.

³⁹Amah sungtumin, “Bang hangin hici gamlum na hi uh hiam? Bang hangin kap na hi uh hiam? Numeino a si hi lo hi; a ihmu hibek hi,” a ci hi.

⁴⁰Amaute in Jesuh zahpih bawlin nuihsan uh ahih manin Jesuh in amaute khempeuh pusuaksak a, numeino’ pa le a nu, le a nungzui thumte tawh, numeino’ lupna inndei-ah a pai uh hi.

⁴¹Tua ciangin numeino’ khut lenin, “Numeino aw, tho in,” a cihna, “Talitha kumi,” a ci hi.

⁴²Numeino zong thakhatin tho-in lam a paipah hi. (Amah kum sawm le nih pha ta hi.) Tua ciangin amaute in lamdangsa mahmah uh hi.

⁴³Hih thu, kuama kiangah a gen loh nadingun Jesuh in nakpitakin amaute kham a, tua ciangin, “Numeino an pia un,” ci-in a sawl hi.