Read Tedim Chin MARKA 8 Bible Online

MARKA 8 - Tedim Chin bible

MARKA 8

¹Tua khit a sawt loin Jesuh kiangah mihon tampi tak hong kikhawm leuleu uh a, amaute in annek ding nei nawn lo uh ahih manin Jesuh in a nungzuite samin amaute kiangah,

²“Hih mite, kei kiangah ni thum bang hong omkhin uh a, tu-in nek ding nei nawn lo uh ahih manin hehpihhuai ka sa hi.

³Amaute pawlkhat gamlapi panin a hong pai uh ahih manin gilkialin ciahsak leng, lamkalah cimawh kha ding uh hi,” a ci hi.

⁴A nungzuite in, “Hih mite piak ding, hih gamlakah an bangci ngah ding ihi hiam?” a cih uh ciangin

⁵Jesuh in, “Anlum bangzah nei na hi uh hiam?” ci-in a dot leh, “Sagih nei ung,” ci-in a dawng uh hi.

⁶Tua ciangin Jesuh in leilakah mihonte tusak a, a anlum sagih la-in Pasian tungah lungdamna a kohkhit ciangin balnenin, mihonpite a lui dingin a nungzuite tungah a pia hi. A nungzuite in zong mihonte a lui uh hi.

⁷Ngasa neu tawmkhat zong nei uh ahih manin Pasian tungah lungdamna a kohkhit ciangin hihte zong mipite mai-ah a lui nadingun a nungzuite a sawl hi.

⁸Amaute in ne-in a khamkhit uh ciangin a khamvalte uh khawm uh a, paipel lian sagih a dim hi.

⁹Hih lai-ah mi tulli bang om hi.

¹⁰Tua ciangin mihonpite ciahkhiasak a, a nungzuite tawh gunkuang tungah tuangpahin Dalmanutha gamah a pai uh hi.

¹¹Farisi mite hong pai-in Jesuh tawh thu kinial uh a, amah a mawhsak theih nading uh a deihna-in Pasian tawh kipawl ahihna a lah nadingin lim khat a lah ding a ngen uh hi.

¹²Tua ciangin Jesuh nakpitakin a sung tawngah khuisa-in, “Bang hangin hih mite in lim hong ngen ahi uh hiam? Hih mite tungah lim kilak peuhmah lo ding hi,” a ci hi.

¹³Tua ciangin amaute nusia-in gunkuang sungah tuangin a galkhat lamah a pai hi.

¹⁴A nungzuite in anlum a puakthuah ding uh mangngilh uh ahih manin gunkuang sungah anlum khat bek a nei uh hi.

¹⁵Jesuh in, “Farisi-te’ silngo le Herod pawlte’ silngo kidawm un,” ci-in a hilhkhol hi.

¹⁶Anlum i neih loh manin hih thu hong gen hi ding hi, ci-in a nungzuite a kikum uh hi.

¹⁷Jesuh in amaute thugen thei ahih manin amaute kiangah, “Anlum na neih loh manun bang hangin thu kikum na hi uh hiam? Theithei nai lo, telthei nai lo na hi uh hiam? Na lungsim uh tua zahin navak lo ahi hiam?

¹⁸Mit nei napi-in mu lo na hi uh hiam? Bil nei napi-in za lo na hi uh hiam?

¹⁹Mihing tul ngate’ nek dingin anlum nga ka balnen thu mangngilh ta na hi uh hiam? Tua hun lai-in a kikhamval na khop uh paipel bangzah dim ahi hiam?” a cih ciangin, “Sawm le nih,” a ci uh hi.

²⁰“Mihing tul lite a dingin lum sagih ka balnen lai-in a khamval uh paipel lian bangzah dim khawm na hi uh hiam?” a cih leuleu ciangin, “Sagih,” a ci uh hi.

²¹Tua ciangin Jesuh in, “Theitel nai lo na hi uh hiam?” a ci hi.

²²Tua ciangin Bethsaida khua tung uh hi. Mi pawlkhat in Jesuh kiangah mittaw khat hong paipih uh a, amah a lawn nadingun a thum uh hi.

²³Jesuh in tua mittaw pa’ khut lenin khuanawlah a paipih hi. A mipa’ mitah a cil a phih khit ciangin a khut tawh lawng a, “Na khat peuhpeuh na mu thei hiam?” ci-in a dong hi.

²⁴A mipa zong khuadak a, “Mite ka mu thei hi; ahi zongin singkung a lam pai tawh kibang uh hi,” ci-in a dawng hi.

²⁵Tua ciangin a khut tawh a mit lawnsak leuleu hi. Hih hun ciangin a mipa nakpitakin hak ahih manin khua mu theikik a, na khempeuh a kitel takin a mu thei hi.

²⁶Tua ciangin Jesuh in, “Na khua-ah ciahsuakpah inla, hih khua sungah lutkik kei in,” ci-in a vaikhak hi.

²⁷Tua ciangin Jesuh le a nungzuite, Sisaria Filippi gam sung khuaneute-ah a zin dingin a ding khia uh hi. Lam a pai laitakun a nungzuite kiangah, “Mite in kei kua hi, hong ci uh hiam?” ci-in a dong hi.

²⁸Amaute in, “Pawlkhat in, Tuiphumpa Johan hi, hong ci uh hi. Pawlkhat in, Elijah hi, hong ci uh a, pawlkhat in, kamsang khat peuhpeuh hi ding hi, hong ci uh hi,” ci-in a dawng uh hi.

²⁹“Tua ahihleh note in kei kua hi, nong ci uh hiam?” ci-in amaute a dot ciangin Peter in, “Nang pen Khrih na hi hi,” ci-in a dawng hi.

³⁰Tua ciangin Jesuh in, “Kua mi ka hi cih thu kuama kiangah gen kei un,” ci-in a nungzuite thu a pia hi.

³¹Tua ciangin Jesuh in, “Mihing Tapa in tampi tak thuak ding hi; upate, siampi liante, le Thukham hilh siate in amah nial ding uh hi. Amah kithat ding a, ni thum khit ciangin hingkik ding hi,” ci-in a nungzuite hilh ding a kipan hi.

³²Hih thu a kitel takin amaute kiangah a gen hi. Peter in Jesuh paikhiatpihin, “Hih bangin thu gen kei in,” ci-in a taii hi.

³³Ahi zongin Jesuh kihei-in a nungzuite a etkawmin Peter lehtai a, “Satan aw, ka nungah om in. Nang in Pasian’ ngaihsut bangin thu ngaihsun loin, mihing’ ngaihsut bangin na ngaihsun hi,” a ci hi.

³⁴Tua ciangin Jesuh in mihonpite le a nungzuite ama kiangah sam a, “Mi khatpeuh ka nungzui a suahnop leh ama deihna bangin gamta nawn loin a singlamteh kisuanin hong zui ding hi.

³⁵Hih a leitung nuntakna a hu nuamte in a nuntakna bulpi nangawn tawh suplawh ding a, keima hang le lungdamna thu hangin a nuntakna a suplawhte in a nuntakna bulpi huzo ding hi.

³⁶Mi khatpeuh in hih leitung khempeuh a ngah hangin a nuntakna bulpi suplawh leh bang phattuamna om ahi hiam?

³⁷Ama nuntakna bang tawh leikik thei nawn ding ahi hiam?

³⁸Pasian thei loin a gilo hih mite lakah keima hang le ka thuhilhte hangin maizumin kei hong pulak ngam lo mi peuhmah, a Pa’ minthanna vang le a siangtho vantung mite tawh a minthangin hong paikik ciangin Mihing Tapa zong ama hangin maizumin pulak ngam lo ding hi,” a ci hi.