Read Tedim Chin LUKA 10 Bible Online

LUKA 10 - Tedim Chin bible

LUKA 10

¹Tua khit ciangin Jesuh in ama pai nading khua le mun khempeuhah nih nihin a na pai dingin mi sawmsagih seh a, ama mai-ah a mapaisak hi.

²Amaute kiangah, “Anlak ding tam mahmah a, ahi zongin mi tawm bek in anlak na sem uh hi. Tua ahih manin an nei pa in a ante a la dingin mi hong sawl nadingin thu ngen un.

³Note va kuan un. Ngiahon lakah tuuno khah bangin note ka hong sawl hi.

⁴Sum ahi a, ip ahi a, khedap a val ahi zongin keng kei un. Lamkalah mi tawh kimawk hoho kei un.

⁵Inn khat peuhpeuhah na lut uh ciangin, ‘Hih inn-ah nopsakna hong tung ta hen,’ ci-in hopih masa un.

⁶Tua inn sungah nopsakna a ngahthei ding mi a om leh kip paisuak ding a, a om kei leh na hopihna thupha uh na dokkik ding uh hi.

⁷Nasemte in a thaman a ngah ding a kilawm ahih mah bangin na zintunna inn mah uhah omsuak unla, a hong piak peuhpeuh uh na ne un. Na zintunna inn uh kheel themthum kei un.

⁸Khua khat peuhpeuhah na lut uh ciangin note hong tunsak leh, amaute’ hong lui peuhpeuh ne unla,

⁹tua khuasunga cinate damsak un. A khuamite kiangah, ‘Pasian’ Uk nading hun note a dingin hong naita hi,’ ci-in gen un.

¹⁰Ahi zongin khua khat peuhpeuhah na lut uh ciangin note hong tunsaknop kei leh a khuasung kongzingah pai unla,

¹¹‘Na khuasung uha leivui, ka khe tung uhah a hong bangte nangawn, note hilhkholhna-in ka nulkhia uh hi. Ahi zongin Pasian’ Uk nading hun a hong naina thu thei ta un,’ ci-in gen un.

¹²Ke’n kong cihin-ah, Thukhen Ni ciangin Sodom khuamite’ thuak ding sangin tua khuamite’ thuak ding haksazaw lai ding hi,” a ci hi.

¹³Tua ciangin Jesuh in, “Khorazin khuapi mite le Bethsaida khuapi mite aw, gimna lianpi na thuak ding uh hi. Bang hang hiam cih leh note khua sungah a hong kilak na lamdangte, Taia le Sidon khua sungah kilak hileh amaute in kisikna limin sawtpekin puanhampi silhin vut kinuh ding uh hi.

¹⁴Tua ahih manin Thukhen Ni ciangin Taia le Sidon khuapi mite’ thuak ding sangin note’ thuak ding haksazaw lai ding hi.

¹⁵No Kapernaum khuapi mite aw, van a sangna munah hong kipahtawi ding sa na hi uh hiam? Hell khuk sungah hong kilawnsuk ding hi,” a ci hi.

¹⁶Tua ciangin Jesuh in a nungzuite kiangah, “Note’ thu a hong zuite khempeuh, kei’ thu a hong zui hi a, note’ thu a hong zui lote khempeuh, kei’ thu a hong zui lo ahi uh hi. Kei’ thu a hong zui lote khempeuh pen kei a hong sawl pa’ thu a zui lo ahi uh hi,” a ci hi.

¹⁷Sawmsagihte lungdam mahmahin hong ciahkik uh a, “Topa aw, nangma min tawh dawite nangawn ka hawlkhiazo uh hi,” a hong ci uh hi.

¹⁸Jesuh in amaute kiangah, “Vantung panin keekkia bangin Satan a kiatna ka mu hi.

¹⁹Tu-in thei un. Gulpi le momaite na sikgawp nading uh le na galte uh na zawh nadingun note tungah vangliatna ka hong piazo a, amaute in note bangmah hong cih zo lo ding uh hi.

²⁰Ahi zongin dawite in na thu uh hong manna hangin lungdam kei unla, vantungah na min uh a kigelh manin lungdamzaw un,” a ci hi.

²¹Tua laitakin Kha Siangtho in lungdamna tawh Jesuh kidimsak hi. Jesuh in, “Vantung le leitung Topa ahi ka Pa aw, mipilte le misiamte tungah na ip thute, bangmah a thei lo hih mite tungah lak na hih manin ka nuam hi. Bang hang hiam cih leh hih thu pen nangma deihna bang ahi hi,” a ci hi.

²²Tua ciangin Jesuh in amaute kiangah, “Hih nate khempeuh ka Pa in kei tungah hong ap khinzo hi. Pasian simloh, Tapa a thei kuamah om lo hi. Tapa le Tapa in a theihsaknop mite simloh, Pa a thei kuamah om lo hi,” a ci hi.

²³Tua ciangin nungzuite lamah kihei a, “Tu-a na muh uh nate na muh manun a hampha mahmah na hi uh hi.

²⁴Ke’n kong cihin-ah, kamsang tampite le kumpi tampite in tu-a note’ muhte a muhnop uh hangin mu ngei lo uh a, a zaknop uh hangin za ngei lo uh hi,” ci-in a tuamin a gen hi.

²⁵Jesuh a ze-et dingin Thukham hilh siate khat hong ding a, “Sia aw, nuntak tawntungna ka ngahtheih nadingin bang sem ding ka hi hiam?” ci-in a dong hi.

²⁶Jesuh in, “Thukham sungah bang kigelh a, bang sim na hi hiam?” a ci hi.

²⁷Amah in, “Na Topa Pasian na lungsim khempeuh, na nuntakna khempeuh, na hatna khempeuh, le na pilna khempeuh tawh na it inla, nangmah na ki-it bangin na vengte na it in,” ci-in kigelh hi, ci-in a dawng hi.

²⁸Tua ciangin Jesuh in, “Na dawnna man mahmah hi. Tua bangin gamta lecin nuntak tawntungna na ngah ding hi,” a ci hi.

²⁹Ahi zongin Thukham hilh siapa amah kitangsak nuam ahih manin Jesuh kiangah, “Ka vengte i cih kuate ahi hiam?” ci-in a dong hi.

³⁰Jesuh in dawng a, “Jerusalem panin Jerikho khua-ah mi khat paisuk a, lamkalah migilote in na suam a, a neih khempeuh laksakin a satgawp khit uh ciangin nusia uh a, a si dektaksa-in a paisan uh hi.

³¹Tua laitakin siampi khat tua lampi tawnin hong paisuk a, amah a muh ciangin lamnawl lam tawnin a paisan hi.

³²Tua ciangin Levi mi khat zong tua mah bangin hong pai a, amah a muh ciangin lamnawl lam tawnin a paisan leuleu hi.

³³Ahi zongin Samaria mi khualzin khat, tua lai mun hong tungin a liam pa a muh ciangin hehpihhuaisa a,

³⁴a kiangah va pai-in a liammate sathau le leenggahzu a nuhsak khit ciangin a tunsak hi. Tua ciangin a la tungah tuangsak a, zintun inn khatah paipihin tua lai-ah a khoi hi.

³⁵A zingsang ciangin zintun inn nei pa kiangah sum peek nih pia a, ‘Hih mipa limtakin na khoi in. Na beina dang khempeuh, kong paikik ciangin kong loh ding hi,’ ci hi.

³⁶Hih mihing thumte sung panin, a kisuampa a dingin a koi pen a vengpa hi dingin na um hiam?” a ci hi.

³⁷Amah in, “A hehpih pa hi ding hi,” a ci hi. Tua ciangin Jesuh in ama kiangah, “Nang zong pai inla, tua bangmahin gamta in,” a ci hi.

³⁸Amaute a pai laitakun khua khatah Jesuh bang a, Martha kici numei khat in a inn-ah na tungsak hi.

³⁹Martha in Mary kici nau numei khat nei a, Topa’ thugente ngai-in Mary a om hi.

⁴⁰Martha bek in na semin manlah mahmah ahih manin a heh suak a, “Topa aw, ka naunu in kei bek na hong sepsak niloh phamawh sa lo na hi hiam? Kei hong huh nadingin hong sawl in,” a ci hi.

⁴¹Ahi zongin Topa in, “Martha, Martha aw, nang na lunghihmawhna tam hi.

⁴²Ahi zongin a kisam taktak khat bek om a, Mary in tua a kisam na pen a semsem ahih manin, a nasep kikhawlsak lo ding hi,” ci-in a dawng hi.