Read Tedim Chin LUKA 13 Bible Online

LUKA 13 - Tedim Chin bible

LUKA 13

¹Tua laitakin tua lai-a om mi pawlkhat in Jesuh kiangah, Galilee mite in Pasian kiangah biakna pia-in a om laitakin Pilat in a thah mite’ thu a gen uh hi.

²Jesuh in amaute kiangah, “Tua bangin hih Galilee mite kithat ahih manin, Galilee midangte khempeuh sangin hih a kithat mite a mawhna uh lianzaw hi, ci-in ngaihsun na hi uh hiam?

³Hilo hi. Ke’n kong cihin-ah, na mawhna panun na kisik kei uhleh amaute mah bangin note zong na si ding uh hi.

⁴Tua ahih kei leh, Siloam Tuibeem gei-a tausang a puk lai-in a denlup mi sawm le giatte bangci ngaihsut na hi uh hiam? Hih bangin a sih manun Jerusalem khuasunga a teng midangte sangin a mawhna uh lianzaw hi, ci-in ngaihsun na hi uh hiam?

⁵Hilo hi. Ke’n kong cihin-ah, na mawhna panun na kisikkik kei uh leh note zong amaute mah bangin na si ding uh hi,” a ci hi.

⁶Tua ciangin Jesuh in amaute kiangah thugentehna khat gen a, “Mi khat in a lolai-ah theikung khat a suansak hi. Theigah a lo dingin a pai ciangin bangmah na gah lo hi.

⁷Tua ahih manin amah in a lokho pa kiangah, ‘A beisa kum thum sung theigah lo dingin ka pai zelzel a, ahi zongin gah lo hi. Tua ahih manin phuk in. Bang hangin lo sung mawk nawngkaisak ding ahi hiam?’ ci hi.

⁸Tua ciangin lokho pa in, ‘Topa aw, tu kum sung zong hih bangmahin omsaklai phot in. A phung kimkot to-in eklei ka sung ding hi.

⁹Kum kik ciangin hong gah leh a hoih hi pah ding hi. Ahi zongin hong gah kei veve leh i phuk ding hi,’ ci-in a dawng hi,” a ci hi.

¹⁰Sabbath ni khatin Jesuh in kikhopna inn khat sungah thu hilhin a om hi.

¹¹Dawivei numei khat tua lai-ah om a, tua dawi in kum sawm le giat sung tua numei cina sakin a nung kulsak a, dingtang thei hetloin a om hi.

¹²Jesuh in tua numei a muh ciangin a kiangah sam a, “Lawm aw, na natna panin na damta hi,” a ci hi.

¹³Tua ciangin numei tungah a khut nga a, thakhat thu-in amah dingtang thei-in Pasian a phatpah hi.

¹⁴Ahi zongin Jesuh in Sabbath ni-in cina a damsakna hangin kikhopna inn ukpa a heh suak a, mite kiangah, “Na a kisep theih nading hun ni guk sung om hi. Tua hun sungin hong pai-in kidamsak unla, ahi zongin Sabbath ni-in hong pai kei un,” a ci hi.

¹⁵Tua ciangin Topa in amah dawng a, “No a kineihkhem mite aw, note in Sabbath ni mahin zong na bawngte uh ahi a, na late uh ahi zongin a buk panin na khihna khaute uh sutin, tui pia dingin paipih hi lo na hi uh hiam?

¹⁶Tua mah bangin Satan in Abraham’ suante khat ahi hih numei pen kum sawm le giat sung hencip hi. Hih a kihencipna panin Sabbath ni-in hih numei khahkhiat ding kilawm hi lo ahi hiam?” a ci hi.

¹⁷Hih Jesuh’ dawnna in alangte khempeuh maizumsak a, Jesuh’ sep hih na lamdangte khempeuh hangin midang khempeuh a lungdam mahmah uh hi.

¹⁸Tua ciangin Jesuh in, “Pasian’ Ukna bang tawh kibang a, bang tawh genteh ding ka hi hiam cih leh:

¹⁹Mi khat in a lo-ah a vawh ankam tang khat tawh kibang hi. Tua ankam tang hong khangin kung golpi hong suak a, vasate in a hiang tungah bu a tom thei uh hi,” a ci hi.

²⁰Tua ciangin Jesuh in, “Pasian’ Ukna bang tawh genteh leuleu ding ka hi hiam cih leh:

²¹Nupi khat in annel lom sungah a sawh silngo tawh kibang hi. Tua silngo in a annel lom khempeuh a pawmsak hi,” a ci hi.

²²Tua ciangin khuapite le khuaneute nawkin Jesuh paisuak a, Jerusalem khua manawhin a paikawmin thu a hilh hi.

²³Tua laitakin mi khat in, “Siapa aw, hotkhiatna a ngah mi tawmno khat bek hi ding ahi hiam?” ci-in a dong hi.

²⁴Jesuh in amaute kiangah, “Kong kawcik tawnin na lut nadingun hanciam un. Note kiangah kong genin-ah, mi tampi tak in lut ding a hanciam uh hangin lut zo lo ding uh hi.

²⁵Inn nei pa hong tho-in kong hong khak ciangin, note kong pualamah dingin kongkhak na kiu ding uh a, ‘Topa aw, kote zong kong hong hon in,’ na ci ding uh hi. Amah in, ‘Note koilai panin a hong pai na hi uh hiam kong thei kei hi,’ ci-in hong dawng ding hi.

²⁶Note in, ‘Nangmah tawh anne tuidawn khawmin i om a, ka khuasung uhah thu nong hilh hi,’ na ci ding uh hi.

²⁷Ahi zongin amah in, ‘Note koi panin a hong pai cih kong thei kei hi. A giloin a gamta note khempeuh aw, kei kiang panin paikhia un,’ hong ci ding hi.

²⁸Pasian’ Ukna sungah Abraham, Isaac, Jakob, le kamsangte khempeuh a omna mu napi-in, note a pualamah hong kihawlkhiat ciangin tua huna na kahna uh le na ha gawina uh bangzah takin nasia ding ahi hiam?

²⁹Nisuahna le nitumna, leilu le leitaw lam panin mite hong pai-in Pasian’ Ukna sung sabuai kiimah tukhawm ding uh hi.

³⁰Tua hi a, tuhuna mineute tuahun ciangin milian hi ding a, tuhuna miliante tuahun ciangin mineu hi ding hi,” a ci hi.

³¹Tuahun laitakin Farisi mi pawlkhat hong pai-in Jesuh kiangah, “Herod in nang thah hong sawm ahih manin hih lai panin mun dang khatah paikhia in,” a ci uh hi.

³²Jesuh in, “Pai unla, ngia bangin ngian a zang tua Herod kiangah hih bangin va gen un: ‘Tuni le zing ciang sung dawi hawlkhia-in cina ka damsak ding a, thai ciangin ka nasep ka man ding hi, ci hi,’ va ci un.

³³Ahi zongin tuni, zing le thai sungteng ka ma nawtsuakin ka pai ding hi. Bang hang hiam cih leh Jerusalem khuasung lobuang mun dangah kamsangpa a kithah ding kilawm lo hi.

³⁴“Jerusalem, Jerusalem aw, kamsangte na that a, Pasian’ hong sawl kamtaite na denglum hi. Akpi in a kha tawh a note a huai mah bangin na mite ka huainuam tawntung a, ahi zongin na ut kei hi.

³⁵Tu-in na innte kinusiacip ding hi. ‘Topa min tawh a hong pai mipa, Pasian in thupha pia ta hen,’ na cih hun hong tun matengin kei nong mu nawn kei ding hi,” a ci hi.