Read Tedim Chin LUKA 14 Bible Online

LUKA 14 - Tedim Chin bible

LUKA 14

¹Sabbath ni khatin Farisi mi upa khat’ inn-ah an ne dingin Jesuh pai a, mite in amah encik uh hi.

²Tua laitakin a khut le a khe a bawk mi khat Jesuh kiangah hong pai a,

³Jesuh in zong Thukham hilh siate le Farisi mite kiangah, “Sabbath ni-in cina damsak ding i Thukham in hong hiam, khak hiam?” ci-in a dong hi.

⁴Ahi zongin kuamah in dawng loin omcip uh hi. Jesuh in zong tua mipa samin a damsak khit ciangin a ciahsak hi.

⁵Tua ciangin Jesuh in amaute kiangah, “Note khatpeuh’ tapa ahi a, na bawngtal uh ahi zongin tuikhuk thukpi sungah Sabbath ni-in kia leh, Sabbath ni hinapi-in kaikhia veve ding hi lo na hi uh hiam?” a ci hi.

⁶Ahi zongin kuamah in hih thu dawng thei lo uh hi.

⁷Tua annekna ah a kisam mite pawlkhat, uliante’ tut nading munah a tutnopna uh a muh ciangin amaute kiangah thu khat gen a,

⁸“Mopawi khatpeuhah hong kisap ciangin uliante’ tut nading munah tu kei un. Tua pawi siim dingin a kisamte lakah note sangin a ulianzaw khat hong omkha thei ding a,

⁹innteek pa in note kiangah, ‘Hih lai-ah amah tusakzaw ni,’ hong ci ding hi. Tua ciangin minautangte’ tutna munah maizumpi in na tusuk ding uh hi.

¹⁰Note pen tua bangin a hong kisap ciangin minautangte’ tutna munah na tuzaw un. Innteek pa hong pai-in, ‘Lawm aw, hih tutphah nuamah hong tuzaw in,’ hong ci ding hi. Tua bangin leengla dangte khempeuh lakah hong cih ciangin nang a dingin angtanhuai mahmah hi.

¹¹Bang hang hiam cih leh a kiliansakte khempeuh in niamkhiatna thuak ding uh a, a kiniamkhiatte khempeuh a lianin kibawl ding hi,” a ci hi.

¹²Tua ciangin Jesuh in a innteek pa kiangah, “Sun-an nekna-ah ahi a, nitak-an nekna-ah ahi zongin mi na sap ciangin, na lawmte ahi a, na sanggamte ahi a, na behte ahi a, mihau na vengte ahi zongin sam kei in. Amaute in zong an ne ding mahin nang hong samkik ding uh a, hih bangin hong sapna hangin na anvakna thaman a ngahkik na hi ding hi.

¹³Tua bangin anvakna pawi na bawl ciangin mizawngte, khezawte, khebaite, le mittawte sam in.

¹⁴Amaute in nang hong thukkik zo lo ding uh ahih manin nang a dingin a lungdamhuai hong hi ding hi. Bang hang hiam cih leh sihna panin mihoihte a thawhkik hun ciangin Pasian in nang tungah hong thukkik ding hi,” a ci hi.

¹⁵An ne-a a tutpih mite khat in hih thu a zak ciangin Jesuh kiangah, “Pasian’ Ukna sungah an ne-a a tu mite bangzahin mi hampha ahi uh hiam?” a ci hi.

¹⁶Jesuh in ama kiangah, “Khatvei mi khat in pawi lianpi khat bawlin mi tampi a sam hi.

¹⁷Annek ding hun ciangin a nasempa sawl a, ‘Tu-in na khempeuh a baihsa-in omkhin ahih manin hong paita un,’ ci-in a khohsa mite a samsak hi.

¹⁸Ahih hangin a khohsa mite in a pai theih loh nading uh paulap zong ciat uh hi. A masa pen pa in, ‘Lo khat ka lei a, ka va et ding kisam ahih manin kong pai thei kei ding hi,’ na ci hi.

¹⁹Adang khat in, ‘Bawngtal kap nga ka lei a, a va sin ding ka hih manin kong pai thei kei ding hi,’ na ci hi.

²⁰Adang khat leuleu in, ‘Ka zi ding a kila khin phet ahih manin kong pai thei kei ding hi,’ na ci hi.

²¹Tua ahih ciangin a nasempa hong ciahin a topa kiangah hih thute hong zasak hi. Tua ciangin innteek pa a heh suak a, a nasempa kiangah, ‘Khuasung kongzing khempeuhah va pai inla, mizawng, khezaw, mittaw, le khebai mite hong paipih in,’ ci-in a sawl leuleu hi.

²²Tua khit a sawt loin a nasempa in, ‘Topa aw, na cih bangin ka sam khin a, ahi zongin om nading mun omlai hi,’ a ci hi.

²³Tua ciangin a topa in a nasempa kiangah, ‘Gam sung lamliante le lamneute-ah va pai inla, ka inn-ah mi a dim theih nadingin mi khempeuh hong paipihmang khin in.

²⁴Ke’n kong cihin-ah, ka sap masak mite khat beek in ka an ciamkha lo ding uh hi,’ ci hi,” a ci hi.

²⁵Mi tampi tak in Jesuh hong zui uh a, Jesuh zong kihei-in amaute kiangah,

²⁶“Kei kiangah a hong pai mite peuhmah in a nu le a pa, a zi le a ta, a sanggam numeite le a sanggam pasalte, le ama pumpi mahmah a nial ngam kei leh keima nungzui suak thei lo ding hi.

²⁷Ama singlamteh mah puatawmin ka nung hong zui lote, keima nungzui hi thei lo hi.

²⁸Mi khatpeuh in inn lianpi khat lamding a sawm le, ka zozo ding hiam cih a theih nadingin a bei dingzah tuat masa hi.

²⁹Tua bangin tuat masa kei leh tua inn a khuampite a phuhkhit ciangin zawh lohpi-in khawl ding a, tua inn a kizo lo a mu mite khempeuh in amah nuihsan ding uh hi.

³⁰‘Hih mipa in inn lamding kipan napi-in zozo lo hi,’ ci ding uh hi.

³¹Galkap tul sawm a nei kumpi khat in galkap tul sawmnih tawh a hong kuan kumpi khat do dingin a kithawi leh, tua kumpipa a dozo ding mahin i hat takpi hiam ci-in ngaihsun masa ding hi.

³²A zozo ding ahih vet kei leh, tua kumpipa a hong tun ma, a gamla-ah a om lai-in, ama kiangah kamtaite sawl ding a, kilem nading thu gensak ding hi.

³³Tua mah bangin mi khat in a neih khempeuh a piakkhiat ngam kei leh keima nungzui suak thei lo ding hi.

³⁴“Ci hoih hi; ahi zongin a alna bei leh i al kiksak theih nading lampi om lo hi.

³⁵Lei hoihsak nadingin kizang thei lo a, eklei dingin zong kibawl thei lo ahih manin paihmawk a kul hi. Tua ahih manin zak nading bil a neite in za ta un,” a ci hi.