Read Tedim Chin LUKA 2 Bible Online

LUKA 2 - Tedim Chin bible

LUKA 2

¹Tua hun laitakin gam tampi a uk Sisar Augustas in ama ukna gam sung mi a phazah a kitheih nadingin mi khempeuh min sazian a kilak nadingin thu a pia hi.

²Kuirinias in Syria gam a uksawn hun laitakin hih bangin mi phazah kisimna thu hong piang hi.

³Tua ahih manin amau khua ciatah min pia dingin mi khempeuh a pai uh hi.

⁴Josef zong David’ suante khat ahih manin Galilee gam sung Nazareth khua panin David’ suahna khua ahi Judea gam Bethlehem khua-ah a pai hi.

⁵Tua bangin min sazian kikhumsak dingin a pai ciangin tenpih dingin zuthawl a piaksa a lawmnu Mary tawh a paikhawm uh hi. A lawmnu naupaii hi a,

⁶Bethlehem khua-ah a tam sungun a nausuah ding hun hong tung hi.

⁷Zintun nading mun dang khempeuh mi dim khinta ahih manin ganbukah tung uh a, a tacil ahi ta pasal khat nei-in, puan tawh tunin gan annekna kuang sungah a sial hi.

⁸Tua hun laitakin gamlakah a tuuhonte a giahpih tuucing pawlkhat a om uh hi.

⁹Amaute kiangah Topa’ vantungmi khat hong kilang a, Topa’ minthanna vang in amaute hong taan ahih manin a lau mahmah uh hi.

¹⁰Ahi zongin vantungmi in, “Lau kei un. Mi khempeuh a lungdamsak ding thuthak hoih khat note a’ ding ka hong puak hi.

¹¹Tuni-in David khuapi sungah, note a hong honkhia ding Khrih Topa a suak hi.

¹²Amah na theih nading uh a lim hih bang hi ding hi: Puan tawh kitun naungek khat, gan annekna kuang sungah a kisial na mu ding uh hi,” a ci hi.

¹³Tua khit phetin tua vantungmi tawh vantung mihonpite thakhatin hong omin Pasian phatna la sa uh a,

¹⁴“Van a sang belna-ah a om Pasian’ min thang hen la, ama pahtak leitung mite tungah nopna om ta hen,” a ci uh hi.

¹⁵Vantung mite vantungah a ciahkik khit uh ciangin tuucingte in, “Bethlehem khua-ah pai-in, Topa’ hong gen hih thupiang va en ni,” a kici uh hi.

¹⁶Amaute nawhpai mahmah uh a, Mary le Josef le gan annekna kuang sungah a kisial naungek a mupah uh hi.

¹⁷Tua bangin naungek a muh uh ciangin, vantungmi in amaute kiangah hih naungek tawh kisai thu a gente a gensawn uh hi.

¹⁸Hih tuucingte’ thugen a za mi khempeuh in lamdang a sa uh hi.

¹⁹Mary in ahihleh a lungsimah hih thute ciamtehin a ngaihsunsun hi.

²⁰Tuucingte zong ciahkik uh a, amaute tungah a kigensa bangin a zaksa le a muhsa uh thute hangin Pasian’ min a phat uh hi.

²¹Naungek a vun a ki-at ni hun nipikal khat a cin khit ciangin, amah a kipaii ma-in a min dingin vantungmi in a piaksa ahi Jesuh, a min dingin a phuak uh hi.

²²Moses Thukham sungah a kigelhna tawh kizui-in Josef le Mary a kisiansuah ding uh hun hong tung hi. Tua ahih manin Topa tungah naungek a ap dingin Jerusalem-ah a paipih uh hi.

²³Bang hang hiam cih leh Topa’ Thukham sungah, “Ta pasal masa peuhmah Topa tungah ki-ap ding hi,” ci-in kigelh hi.

²⁴Topa Thukham sungah a kigelhna tawh kizui-in biakna-in vakhu nih ahi a, kawl vakhuno nih ahi zongin a pia dingin zong a pai uh ahi hi.

²⁵Jerusalem khua sungah Simeon a kici mi khat na om hi. Amah a thuman, a biakna mi mahmah khat hi a, Israel mite a kihotkhiat hun ding a ngakngak mi khat ahi hi. Kha Siangtho in a ompih mi khat hi a,

²⁶Topa’ hong ciamsa Khrih a muh matengin a sih loh nading thu zong ama tungah Kha Siangtho in na genkhin hi.

²⁷Kha Siangtho’ makaihna tawh biakinn sungah Simeon a pai hi. A nu le a pate in thukham sunga om ngeina bangin Topa tungah naungek a ap dingin biakinn-ah a hong paipih uh ciangin,

²⁸Simeon in naungek la-in a ang-ah tawi-in Pasian’ tungah lungdamna ko a,

²⁹“Topa aw, na thuciamna tu-in nong tungsak a, na nasempa keima lungsim nong nuamsak hi.

³⁰Ka mit mahmah tawh nong hotkhiatna ka mukhin a,

³¹minam khempeuh’ muhin nong tungsak a,

³²Gentail mite in khuavak a muh nading le nangma mi Israel-te a minthan nadingin na vaihawm hi,” a ci hi.

³³Naungek’ nu le pate in, hih bangin Simeon in naungek’ thu a genna a zak uh ciangin lamdang a sa mahmah uh hi.

³⁴Tua ciangin Simeon in amaute thupha a piak khit ciangin naungek’ nu Mary kiangah, “Hih naungek pen, Israel mite sungah mi tampi in siatna a ngah nading, le mi tampi in hotkhiatna a ngah nading ahi hi. Mi tampi in hih naungek nial ding uh a,

³⁵mite’ lungsimtawng a kilatna hong hi ding hi. Dahna lungkhamna in namsau hiam bangin nangma lungsim mahmah zong hong sunkham ding hi,” a ci hi.

³⁶Tua laitakin Asher minamte sung panin Fanuel’ tanu Anna minnei kamsang numei khat a om hi. Amah a khangham mahmah khat hi a, a nungak laitakin a neih a pasal tawh kum sagih sung a tenkhop khit ciangin,

³⁷kum sawmgiat le kum li sung meigongin a om ahi hi. Amah pen biakna a nusia ngei lo mi khat hi a, a sun a zanin Pasian bia-in an tangin thu a ngenngen mi khat ahi hi.

³⁸Tua bangin Jesuh a ki-ap hun laitakin hih kamsangnu hong pai-in Pasian tungah lungdamna ko a, Jerusalem a suahtak nading lamenin a ngak mi khempeuh tungah hih naungek’ thu a gen hi.

³⁹Amaute in Topa’ Thukham tawh kizui-in hih ding a kisam khempeuh a bawl khit uh ciangin Galilee gam, amau khua Nazareth-ah a ciahkik uh hi.

⁴⁰Tua naupang hong khangin hong thahat hi. Lungpilna tawh kidim a, Pasian in thupha a pia hi.

⁴¹Kumsimin Jerusalem khua-a Paisan Pawi a kibawlna-ah Jesuh’ nu le pa a pai zel uh ahi hi.

⁴²Jesuh, kum sawm le nih a phak ciangin a ngeina bangin tua pawi-ah a thumun a pai uh hi.

⁴³Tua pawi vengin a ciahkik uh ciangin Jerusalem khua-ah naupang Jesuh kinusia kha hi. A nu le a pa in a nusiatlam uh thei lo uh hi.

⁴⁴Amaute’ honlak mahah a omomin ngaihsun uh ahih manin ni khat lam paikhin uh a, tua ciangin a lawmte le a tanaute lak khawng a zong pan uh hi.

⁴⁵Amah a muh zawh loh uh ciangin Jerusalem-ah kileh kikin a zong uh hi.

⁴⁶A ciahzawh uh a ni thum ni ciangin biakinn sungah amah mu uh a, siate lakah tu-in a thugen uh ngai-in, thu zong dong zelin a om a mu uh hi.

⁴⁷Amah in pilna tawh thu genin a dawnna a za mite khempeuh in lamdangsa mahmah uh hi.

⁴⁸A nu le a pa in a muh uh ciangin lamdangsa uh a, a nu in, “Ka ta aw, bang hangin hong hici bawl na hi hiam? Na pa tawh lungkham mahmahin nang ka hong zong uh hi,” a ci hi.

⁴⁹Jesuh in a nu le a pa kiangah, “Bang hangin kei hong zong na hi uh hiam? Ka Pa’ inn sungah ka om ding lamtak thei lo na hi uh hiam?” ci-in a dawng hi.

⁵⁰Ahi zongin bang a cihnopna ahi hiam, ci-in a nu le a pa in thei lo uh hi.

⁵¹Tua ahih ciangin a nu le a pa zui-in Nazareth khua-ah ciahkik a, amaute’ thu mangin tua lai-ah hoihtakin a om hi. A nu in hih thu khempeuh a lungsim sungah ngaihsunsun hi.

⁵²Jesuh a pumpi le a pilna khang a, ama gamtatna in Pasian le mite a lungkimsak semsem hi.