Read Tedim Chin LUKA 21 Bible Online

LUKA 21 - Tedim Chin bible

LUKA 21

¹Jesuh a khuadak leh mihaute in biakinn sumkuang sungah a letsong uh a khiatna,

²le a zawng meigong khat in zong sumnen tang nih a khiat a mu hi.

³Tua ciangin amah in, “Ke’n kong cihin-ah, hih a zawng meigongnu in a dangte khempeuh sangin tamzaw a khia hi.

⁴Bang hang hiam cih leh adangte in a zatval uh sumte a khia uh ahi hi. Ahi zongin hih numei a zawng mahmah hinapi-in a nuntak nading khempeuh a khia khin ahi hi,” a ci hi.

⁵Mi pawlkhat in suang hoih mahmahte tawh kilamin tua biakinn hoihin a thupi mahmahna le Pasian tungah letsong tampi a kipiaknate a gen uh ciangin Jesuh in,

⁶“Tu-a na muh uh hih nate khempeuh a siatgawp ding hun hong tung ding hi. Inn lamna-a a kiciang suangte a kithuapin a om nangawn om nawn loin kiphelkekmang ding hi,” a ci hi.

⁷Tua ciangin amaute in, “Cik ciangin hih thu hong piang ding a, hih thu a pian ding ciangin bang lim hong om ding ahi hiam?” ci-in a dot uh ciangin

⁸Jesuh in, “Kidawm unla, mi’ khemsa-in ta kei un. Bang hang hiam cih leh keimah a kineih mi tampi hong pai ding uh a, ‘Keimah, Khrih ka hi hi; a hun hong tungta hi,’ hong ci ding uh hi. Tua bang mite’ nung zuikha kei un.

⁹Gal thu ahi a, gam kilumlet nading thu ahi zongin na zak uh ciangin lau kei un. Hih bang thute a hong piang masa ding mah hi a, ahi zongin bei nading hong naita hi, a cihnopna hi nai lo hi,” a ci hi.

¹⁰Tua ciangin Jesuh in a thugen zomlai a, “Gam khat le gam khat hong kido-in, kumpi khat le kumpi khat hong kido ding hi.

¹¹Mun khempeuhah nakpitakin zin hong lingin, kialpi le pulnatna zong hong tung ding hi. A kihtakhuai a tuamtuamte le lim lianpipi vanah hong kilang ding hi.

¹²Ahi zongin hihte khempeuh hong pianma-in keima hangin note hong kimanin hong kibawlsia ding hi. Kikhopna innte-ah thusitna thuakin thongah khiat dingin hong ki-ap ding a, ukpite le kumpite mai-ah hong kipaipih ding hi.

¹³Hih hun sung pen note in Lungdamna Thu na gentheih nading uh hunhoih ahi hi.

¹⁴Tua hun ciangin eite in bangci gen ding cih lunghihmawhin nei kei un.

¹⁵Bang hang hiam cih leh tua hun ciangin note’ gen ding thu le pilna kong guan ding a, na galte uh khat beek in note’ thugen hong nialzo loin, zong hong sel zo lo ding uh hi.

¹⁶Na nu na pate, na sanggamte, na behte, le na lawmte mahmah un note hong khia ding a, note pawlkhat in thahna na thuak ding uh hi.

¹⁷Mi khempeuh in keima hangin note hong mudah ding uh hi.

¹⁸Ahi zongin na samzang khat nangawn uh mangthang lo ding hi.

¹⁹Hih bangin thuakzo le-uhcin nuntakna taktak ngah ding na hih manun kiptakin om un.

²⁰“Galkapte in Jerusalem khuapi a umcihna na muh uh ciangin tua khuapi a siat nading naita hi, ci-in na thei ding uh hi.

²¹Tua ciangin Judea gam sunga omte mualtungah tai un. Jerusalem khuasunga omte zong taikhia unla, gam sung khuaneu-a om mite, Jerusalem khua sungah lut nawn kei un.

²²Bang hang hiam cih leh Lai Siangtho sungah a kigelh mah bangin, ‘Gim Piak Ni,’ ahi hi.

²³Tua huna naupaiite le naungek neite a dingin haksa mahmah ding hi. Hih leitungah gimna lianpi hong tung ding a, Pasian in hih mite gim a pia ding hi.

²⁴Mi pawlkhat, namsau tawh kithat ding a, pawlkhat, galmatin gam dangah kiciahpih ding hi. Tua ciangin Gentail mite’ uk hun a bei matengin Jerusalem khuapi a siacipin om ding hi.

²⁵“Ni, kha, le aksite tungah lim hong om ding hi. Tuipi ging le tuihual liante kihtakna hangin leitung mi khempeuh lau-in lunggim ding uh hi.

²⁶Leitungah tu-in bang hong piang ding, ci-in a ngaihsut kawmun mite lau-in sibup ding uh hi. Vantunga om nate a pai ngei bangin pai nawn loin lampial mangkhin ding uh hi.

²⁷Tua ciangin Mihing Tapa hong kilang ding a, minthanna le vangliatna tawh meii lakah hong pai ding hi.

²⁸Hih thute a pian ding hong kipat ciangin, note hong kihotkhiat ding hun hong naita ahih manin, dingin nuamna lungsim tawh khuadak un,” a ci hi.

²⁹Tua ciangin Jesuh in amaute kiangah thugentehna khat gen a, “Thei kung a kipan singkung khempeuh en dih un.

³⁰A teh hong no na muh uh ciangin khuakhal hong naita hi, ci-in na thei uh hi.

³¹Tua mah bangin hih thute hong piang na muh uh ciangin Pasian’ Ukna hun hong tungta ding hi, ci-in na thei ding uh hi.

³²Hih lai-a om mite a sihkhit ma-in hih thute hong piang ding ahihna phawk un.

³³Van le lei a mangthang zongin ka thugente maimang ngei lo ding hi.

³⁴“Limtakin kidawm un. Thakhat thu-in tua Ni hong tung kha ding ahih manin zune anne le leitung nuntakna lunghimawhin thamang kei un.

³⁵Theihkholh lohin thang kisai bangin leitung mi khempeuh tungah hih thu hong piangvat ding hi.

³⁶Hih thupiang khempeuh thuakzawh nading thahatna na neih nading uh, le Mihing Tapa mai-ah na dintheih nadingun a tawntungin thu ngenin vil niloh un,” a ci hi.

³⁷Tua sungteng nisimin Jesuh in biakinn-ah thu hilh a, nitak ciangin paikhia-in Oliv Mual tungah a giak zel hi.

³⁸Ama thuhilhna a ngai dingin mi khempeuh zingsang simin biakinn-ah hong pai baih uh hi.