Read Tedim Chin LUKA 22 Bible Online

LUKA 22 - Tedim Chin bible

LUKA 22

¹Tu-in Paisan Pawi a kici Silngo Sawh loh Anlum Pawi hun hong naita hi.

²Siampi liante le Thukham hilh siate in mihonpite kihta uh ahih manin kuama theih lohin Jesuh a kithah theih nading lampi a zong uh hi.

³Tua ciangin sawm le nihte sung panin Iskariot tapa Judas sungah Satan hong lut hi.

⁴Tua ahih manin Judas va paikhia a, siampi liante le biakinncing palikmangte tawh va kiho uh a, amaute’ khut sungah Jesuh a piaktheihna dingzia a kikum uh hi.

⁵Amaute na nuam mahmah uh a, sum tawh guaih dingin thuciam a na pia uh hi.

⁶Judas zong thukim a, mihonte’ theih lohin amaute’ khut sungah Jesuh a piaktheih nading lampi zon ding a kipan pah hi.

⁷Tua ciangin Silngo Sawh loh Anlum Pawi hun sungin Paisan Pawi an-a nek ding tuuno gawh ni hun hong tung hi.

⁸Jesuh in Peter le Johan kiangah, “Va pai unla, eite’ Paisan Pawi annek ding va vaihawm un,” ci-in a sawl hi.

⁹“Koi lai-ah va bawl le ung hong deih na hi hiam?” ci-in a dong uh hi.

¹⁰Amah in, “Jerusalem khuasung na lut uh ciangin tuibeel a pua pasal khat na mu ding uh hi. Ama lutna inn-ah zui unla,

¹¹a innteek pa kiangah, ‘Siapa in: Ka nungzuite tawh Paisan Pawi an ka nektheih nading uh inndei koi lai hiam, ci hi,’ ci-in va dong un.

¹²Amah in a baihsa-in a na kikoihsa inndei tungnung a zai khat hong lak ding hi. Tua lai-ah a kisam khempeuh a baihsa-in na koih un,” a ci hi.

¹³Amau tegel zong pai uh a, Jesuh’ gensa bang teekteekin va mu uh a, tua lai-ah Paisan Pawi annek ding a bawl uh hi.

¹⁴A hun a tun ciangin Jesuh zong sawltakte tawh sabuai-ah a tu hi.

¹⁵Tua ciangin Jesuh in amaute kiangah, “Sihna ka thuakma-in note tawh hih Paisan Pawi an i nekkhop ding ka ut mahmah khat ahi hi.

¹⁶A mantakin kong genin-ah, Pasian’ Ukna sungah a cingtaak Paisan Pawi hun hong tun mateng, Paisan Pawi an ka ne ngei nawn kei ding hi,” a ci hi.

¹⁷Tua ciangin Jesuh in a hai sang a, Pasian’ tungah lungdamna a kohkhit ciangin, “Hih hai hong sang unla, na vekpi-un na gual dawn un.

¹⁸Bang hang hiam cih leh Pasian’ Ukna hun hong tun mateng, tu a kipanin leenggahzu ka dawn nawn kei ding hi,” a ci hi.

¹⁹Tua ciangin anlum la-in Pasian tungah lungdamna a kohkhit ciangin amaute tungah pia a, “Hih pen note a dingin a hong kipia keima pumpi ahi hi. Keimah nong phawk nadingun na ne un,” a ci hi.

²⁰Tua mah bangin an a nekkhit uh ciangin amaute tungah hai pia a, “Hih leenggahzu pen note a dingin a luangkhia, Pasian’ thuciamna thak a kipsak ka sisan ahi hi.

²¹Ahi zongin kei hong lehhek ding pa’ khut in sabuai-ah kei tawh an a sawkkhawmna thu thei un.

²²Bang hang hiam cih leh Pasian’ sehsa bangin Mihing Tapa si ding a, ahi zongin amah a lehhek pa in gimna thuak ding hi,” a ci hi.

²³Tua ciangin hih bangin a gamta ding eite lakah kua hi ding ihi hiam, ci-in amaute khatlekhat a kidong uh hi.

²⁴Nungzuite lakah kua a lianpenin kingaihsun ding, ci-in kiselna thu hong piang hi.

²⁵Tua ciangin Jesuh in amaute kiangah, “Gentail mi hih leitung kumpite in a mite uh tungah ukna aana zang uh a, tua bangin mi a uk Gentail-te in amaute pen, ‘Mite’ nopsak nadingin nasemte,’ a kicih ding deih lai uh hi.

²⁶Ahi zongin note lakah tua bang hi lo ding hi; a lianpen pa a neupen bangin om ding a, a makai pen pa a nungzui nunungpen bangin om ding hi.

²⁷Anne dingin sabuai-ah a tupa le an a piapa kua lianzaw ahi hiam? Anne dingin a tupa lianzaw mah hi. Ahi zongin kei pen note lakah anpia-in na a sempa bangin ka hong om hi.

²⁸“Gimna ka thuak sung khempeuh note in kei nong ompih uh hi.

²⁹Ka Pa in uk nading aana kei tungah hong piak mah bangin kei zong note tungah ka hong pia ding hi.

³⁰Keima Ukna sungah anne tuidawnin sabuai kiimah na tu ding uh a, Israel minam sawm le nihte tungah thu a khen dingin thukhenna tokhom tungah na tu ding uh hi,” a ci hi.

³¹Tua ciangin Jesuh in, “Simon, Simon aw, lokho pa in buhhum a haih bangin note khempeuh hong ze-et nadingin Satan in thu a ngah khitna thu phawk in.

³²Ahi zongin, Simon aw, na upna na khahsuah loh nadingin nang a dingin thu kong ngetsak khin hi. Kei kiangah nong kiheikik ciangin nungzui na lawmte na hanthawn in,” a ci hi.

³³Tua ciangin Peter in, “Topa aw, nang tawh thong a kiakhawm ding le a sikhawm dingin a kigingsa-in ka om hi,” ci-in a gen hi.

³⁴Tua ciangin Jesuh in, “Peter aw, ke’n a mantakin kong genin-ah, ‘Amah ka thei kei hi,’ ci-in thumvei nong nialkhit matengin tuni-in ak khuang lo ding hi,” a ci hi.

³⁵Tua ciangin Jesuh in amaute kiangah, “Note in sumbawm, ip, le khedap keng loin kong sawlkhiat lai-in kitangsapna na nei uh hiam?” ci-in a dot ciangin, “Bangmah ka kitangsapna uh om lo hi,” ci-in a dawng uh hi.

³⁶Tua ciangin Jesuh in, “Ahi zongin, tu-in ahihleh, sumbawm ahi a, ip ahi zongin a neite in keng unla, namsau a nei lo peuhmah in na puansilh uh zuak unla khat lei un.

³⁷Bang hangin hih bangin hong gen ka hi hiam cih leh, Lai Siangtho in, ‘Mawhneite lakah amah kihelsak hi,’ ci-in keima thu a genna pen hong tung ding hi,” a ci hi.

³⁸Amaute in, “Topa aw, en in; hih lai-ah namsau nih om hi,” ci-in a gen uh ciangin Jesuh in, “Tua ahihleh phazo hi,” ci-in a dawng hi.

³⁹Tua ciangin Jesuh a pai ngei zel bangin, khuasung nusia-in Oliv Mual tungah pai a, a nungzuite in zong a zui uh hi.

⁴⁰Ama painopna mun a tun ciangin amaute kiangah, “Ze-etna na tuahkhak loh nadingun thu ngen un,” ci-in a gen hi.

⁴¹Tua ciangin amaute kiang panin suanglot khat tan bang pailai a, khukdinin thu ngen a,

⁴²“Pa aw, nangma ngaihsutna bang ahihkhak leh hih ka thuak ding gimna tawh hong kipelhsak in. Ahi zongin kei deihna bang hi loin nangma deihna bang hi ta hen,” a ci hi.

⁴³Tua ciangin vantung panin ama kiangah vantungmi khat hong pai a, Jesuh’ tha a hatsak hi.

⁴⁴Lunggim mahmah ahih manin nakpitakin thu ngen semsem a, leilak a si mal gol taak bangin a khua-ul a taak hi.

⁴⁵A thungetna panin dingin a nungzuite kiangah paikik a, amaute a dahna hangun gimin ihmu-in a om a mu hi.

⁴⁶Jesuh in, “Bang hangin ihmu na hi uh hiam? Tho unla ze-etna-ah na pukkhak loh nadingun thu ngen un,” a ci hi.

⁴⁷Tua bangin thu a gen laitakin mihonpi khat hong pai a, sawm le nihte sung panin Judas a kici mipa hong makai-in Jesuh a nam dingin hong naih hi.

⁴⁸Ahi zongin Jesuh in ama kiangah, “Judas aw, napna tawh Mihing Tapa lehhek na hi hiam?” a na ci hi.

⁴⁹Jesuh’ kiima om mite in a thupiang ding a muh ciangun, “Topa aw, ka namsau uh tawh ka sat ding uh hiam?” a ci uh hi.

⁵⁰Amaute khat in siampi lianpen pa’ nasempa sat a, a taklam bil a satkhia hi.

⁵¹Ahi zongin Jesuh in, “Tua bangin gamta nawn kei un,” ci-in a mipa’ bil lawnsakin a damsak hi.

⁵²Tua ciangin Jesuh in amah a man dingin a hong pai siampi liante, biakinncing palikmangte, le upate kiangah, “Namsau le molhtum tawh kei hih dingin nong kuan nadingun kei pen gal le sa ka hi hiam?

⁵³Nisimin biakinn-ah note tawh ka omkhawm a, bangmah nong cih kei uh hi. Ahi zongin hih hun pen nomau’ hun hi a, khuamial sung a uk Satan’ vangliat hunsung ahi hi,” a ci hi.

⁵⁴Tua ciangin Jesuh manin paikhiatpih uh a, siampi lianpen pa’ inn a tunpih uh hi. Peter in zong a kihalin nungzuih hi.

⁵⁵Inntualah meiphual kicih a, tua meiphual kiima tute lakah Peter zong a kihel hi.

⁵⁶Mei awi-a omte lakah Peter a omlam, nasem numei khat in a muh ciangin limtakin Peter en a, “Hih pa zong Jesuh tawh a kikhawlte khat hi,” a ci hi.

⁵⁷Ahi zongin Peter in, “Ka nau aw, amah ka thei kei hi,” ci-in a nial hi.

⁵⁸Tua khit a sawt loin midang khat in amah hong mu leuleu a, “Nang zong amaute tawh pawlkhat na hi hi,” a ci hi. Ahi zongin Peter in, “Lawm aw, ka hi kei hi,” a ci hi.

⁵⁹Tua khit nai lang bang ding ciangin midang khat in, “Hih mipa Galilee mi ahih manin amah zong Jesuh tawh a kipawlte hi taktak hi,” hong ci teitei hi.

⁶⁰Ahi zongin Peter in, “Lawm aw, na thugen ka thei kei hi,” ci-in a dawng hi. Tua bangin a pau laitakin thakhatin ak hong khuang hi.

⁶¹Jesuh zong kihei-in Peter hong en a, “Tuni-in ak a khuan’ ma-in thumvei nong nial ding hi,” ci-in Topa’ kampauna thu Peter in hong phawkvat hi.

⁶²Tua ciangin Peter paikhia-in nakpitakin a kap hi.

⁶³Jesuh a cingte in simmawh bawlin a sat uh hi.

⁶⁴Puan tawh a mit tuamsak uh a, “Kua’n hong sat ahi hiam, thei dih in,” a ci uh hi.

⁶⁵Amah simmawh bawlna kam tampi a pau uh hi.

⁶⁶Khua a vak ciangin upate, siampi liante, le Thukham hilh siate hong kikhawm uh a, uliante mai-ah Jesuh hong kipaipih hi.

⁶⁷Amaute in, “Khrih na hi hiam, hong gen in,” ci-in a dot uh ciangin Jesuh in, “Kong gen hangin nong um kei ding uh a,

⁶⁸thu kong dot hangin zong nong dawng kei ding uh hi.

⁶⁹Ahi zongin tu a kipanin a Vanglian Pasian’ taklamah Mihing Tapa tu ding hi,” ci-in a dawng hi.

⁷⁰Tua ciangin a vekpi-un, “Tua ahihleh Pasian’ Tapa na hi hiam?” a cih uh ciangin, “Pasian’ Tapa hi, nong ci uh hi,” ci-in a dawng hi.

⁷¹Tua ciangin amaute in, “Thudang bangmah kisam nawn lo hi. Ama kam mahmah panin i za khinta hi,” a ci uh hi.