Read Tedim Chin LUKA 23 Bible Online

LUKA 23 - Tedim Chin bible

LUKA 23

¹Tua ciangin a vekpi-in ding khia uh a, Pilat mai-ah a paipih uh hi.

²Tua lai panin amah mawhzon ding kipan uh a, “Hih mipa in ka mipihte uh lam khialsakin, kumpipa tungah siah piak loh dingin thu gen a, amahmah zong Khrih ahi kumpi khat ahihna a kigenna zong ka za uh hi,” a ci uh hi.

³Tua ciangin Pilat in, “Nang, Jew mite’ kumpipa na hi hiam?” ci-in a dot ciangin, “Nang zong tua mah nong ci hi,” ci-in a dawng hi.

⁴Tua ciangin Pilat in siampi liante le mihonte kiangah, “Hih mipa mawhsak nading thu bangmah ka mu kei hi,” a ci hi.

⁵Ahi zongin amaute in nawhsa takin nakpau semsem uh a, “Amah in mite a buai nadingin thu hilh a, Galilee gam pan hong kipanin Judea gam sung khempeuhah hong hilh a, tu-in hih lai mun hong tungta hi,” a ci uh hi.

⁶Pilat in hih thu a zak ciangin, “Hih mipa Galilee mi ahi hiam?” ci-in a dong hi.

⁷Jesuh pen Herod’ ukna sung mi ahihlam a theih ciangin, tua laitakin Herod mah zong Jerusalem-ah om ahih manin ama kiangah a paisak hi.

⁸Herod in Jesuh’ thu zaza a, amah a muhnop sawt mahmah khinta ahih manin Jesuh a muh ciangin a nuam mahmah hi. Jesuh in nalamdang a bawlte a mu dingin kilamen hi.

⁹Tua ahih manin Herod in thu tampi tak dong a, ahi zongin Jesuh in kam khat beek dawng lo hi.

¹⁰Siampi liante le Thukham hilh siate in hong neh uh a, Jesuh mawhsakna thu nakpitakin hong gen uh hi.

¹¹Tua ciangin Herod le galkapte in Jesuh zahko-in simmawh bawl uh a, kumpi puantualpi a silhsak khit uh ciangin Pilat kiangah a puakkik uh hi.

¹²Hih hun ma-in Herod le Pilat kilem loin kigalbawl uh a, ahi zongin tua ni mahmahin amau tegel kilem kikin kipawlbawl uh hi.

¹³Pilat in zong siampi liante, upate, le mihonpite sam khawmin

¹⁴amaute kiangah, “Hih mipa in i mipihte lam khialsak hi, ci-in mawhsakin kei kiangah nong paipih uh hi. Note khempeuh mai mahah amah thu ka sit a, amah na mawhsakna uh thute khat beekah a mawhna ka mu kei hi.

¹⁵Tua mah bangin Herod in zong ama mawhna mu lo a, eite kiangah amah hong puakkik hi. Hih mipa in sihna a thuak nadingin ama gamtatna bangmah om lo hi.

¹⁶Tua ahih manin amah satna tawh thuhilhin ka khah ding hi,” a ci hi.

¹⁷(Paisan Pawi hun simin Pilat in amaute’ deih thongkia khat a khah ding ahi hi.)

¹⁸Tua ciangin mihon khempeuh kiko uh a, “Amah that in! Barabbas hong khahsak in!” a ci uh hi.

¹⁹Barabbas pen khua sungah mi a buaisakna hang, le mi a thahna hangin thong sungah a kikhum ahi hi.

²⁰Pilat in Jesuh khahnuam ahih manin mihonpite tungah khatvei a genkik hi.

²¹Ahi zongin mihonpite in, “Singlamteh tungah that in, singlamteh tungah that in,” ci-in a kiko uh hi.

²²Tua ciangin amaute tungah a thumveina thu gen a, “Amah in bang mawhna bawl ahi hiam? Sihna a thuak nadingin ama gamtatna bangmah ka mu kei hi. Tua ahih manin amah satin ka khah ding hi,” a ci hi.

²³Ahi zongin a aw neihzah uh tawh amaute awng semsem uh a, singlamteh tungah Jesuh a thah nading gen uh ahih manin a tawpna-ah a zo uh hi.

²⁴Tua ahih manin amaute’ ngetna bangin piak dingin Pilat in thu a khen hi.

²⁵Mi buaisakna le mi thahna hangin thong sungah a kikhia mipa amau’ ngetna bangin khah a, amau’ deihna bangin a bawl dingun Jesuh a piakhia hi.

²⁶Tua ciangin amaute in Jesuh paikhiatpih uh a, gam sung panin khuapi sungah a hong pai, Sairin khuami Simon a kici mi khat tawh a kituak uh hi. Amaute in tua pa manpah uh a, a singlamteh suanin Jesuh’ nung zui-in a puasak uh hi.

²⁷Jesuh’ nung zui-in mi tampi tak pai uh a, tuate lakah Jesuh kahin a tamlawh numei pawlkhat zong a kihel hi.

²⁸Jesuh zong amaute lamah kihei a, “Jerusalem khua numeite aw, kei hong kah kei unla, note le na tate uh a dingin kap un.

²⁹Bang hang hiam cih leh mite in, ‘Ta a nei ngei lo, naungek nawi a teepsak ngei lo numei ciingte mi hampha mahmah ahi hi,’ a cih hun hong tung ding hi.

³⁰Tua hun hong tun ciangin mite in, ‘Mual lian mual neute in hong cipnelhin a si khin hi lehang utzaw hang,’ ci ding uh hi.

³¹Singkung hing bang ahi kei tungah hih bangin hong bawl uh ahihleh singkung keu bang ahi note tungah hong nak hihzaw kan ding uh hi lo ahi hiam?” a ci hi.

³²Mi that ahi, thonga kikhum mi nih zong, Jesuh tawh thahkhawm dingin a paipih uh hi.

³³“Lutang Guh,” a kicihna mun a tun uh ciangin singlamteh tungah Jesuh kilhcip uh a, tua mi that mi nihte zong, Jesuh’ taklamah khat, a veilamah khat kilhcip uh hi.

³⁴Ahi zongin Jesuh in, “Pa aw, amaute in bang hih ihi hiam cih thei lo uh ahih manin a mawhna uh na maisak in,” a ci hi. Tua ciangin amau’ ngah ding ciat a theih nadingun ai sanin a puante a hawm uh hi.

³⁵Jew mi upate in Jesuh zahko-in, “Amah in midangte honkhia hi. Pasian teelsa Khrih ahih takpi leh amah le amah kihonkhia ta hen,” ci-in a simmawhbawl laitakun tua lai-a ding mite in a enen uh hi.

³⁶Galkapte in zong zahpihbawl uh a, a kiangah hong pai-in leenggahzu thuk pia uh a,

³⁷“Jew Mite’ Kumpipa na hih takpi leh nang le nang kihonkhia in,” a ci uh hi.

³⁸“Jew Mite’ Kumpipa hi,” ci-in a kigelh lai zong ama tung sanah kisuang hi.

³⁹Amah tawh a kikhai khawm mi that pa khat in zong Jesuh zahko a, “Nang Khrih hi lo na hi hiam? Nangmah kihonkhia inla, tua ciangin kote zong hong honkhia in,” a ci hi.

⁴⁰Ahi zongin a khat pa in a lawmpa taii a, “Pasian nangawn kihta lo na hi hiam? I vekpi-in gim hong kipiakna kibangkim hi.

⁴¹Ei tegel pen i gamtatna tawh kizui-in thu hong kikhen ahih manin ahi ding mah ahi hi. Ahi zongin amah in khialhna bangmah nei lo hi,” a cih khit ciangin

⁴²Jesuh kiangah, “Jesuh aw, Kumpi-in nong pai ciangin kei zong hong phawk in,” a ci hi.

⁴³Jesuh in ama kiangah, “A mantakin ke’n kong cihin-ah: Tuni-in Paradais-ah kei tawh na omkhawm ding hi,” a ci hi.

⁴⁴Tua hun laitak pen sunkim nai sawm le nih pawl hi a, ni mial ahih manin nitak lam nai thum ciang dong leitung khempeuhah khua mial a,

⁴⁵tua hun sungin biakinn sung dalna puan kikekin phelnih a suak hi.

⁴⁶Tua ciangin nakpitakin Jesuh kiko a, “Pa aw, nangma khut sungah keimah kong ki-ap hi,” a cih khit ciangin a si ta hi.

⁴⁷Galkap mangpa in hih thupiang a muh ciangin Pasian phat a, “Hih pa, mihoih taktak khat ahi hi,” a ci hi.

⁴⁸Hih thute a en dingin a hong pai mihonpite in a thupiang teng a muh uh ciangin dahin dip humsa-in a ciah uh hi.

⁴⁹Galilee gam panin Jesuh a hong zui amah a thei ngei mite le numeite in gal et uh ahih manin a thupiang khempeuh a thei uh hi.

⁵⁰Tua laitakin Josef a kici mi khat om a, Judea gam sunga om Arimathea khuami ahi hi. Amah pen mihoih, a zahtakhuai mi khat hi a, Pasian’ Uk ding hun lamenin a ngakngak mi khat ahi hi. Amah pen ulian thuvaihawm sunga kihel hi a, ahi zongin a lawmte’ vaihawmna leh a nasepnate uh thukimpih lo hi.

⁵¹

⁵²Hih mipa Pilat kiangah va pai-in Jesuh’ luang a ngen hi.

⁵³Tua ciangin Jesuh’ luang la suk a, puankang tawh a tun khit ciangin kuamah a kivui ngei nai lohna suang kikhuak hankhuk sungah a vui hi.

⁵⁴Tua ni pen nipi zawh ni nga ni hi a, Sabbath ni hong hi dektak ta hi.

⁵⁵Galilee gam panin a hong zui numeite in zong a kivuina-ah zui uh ahih manin a hanphual le a luang kisialzia khempeuh zong a mu uh hi.

⁵⁶Tua ciangin amaute ciah uh a, Jesuh’ luang a nuh dingun paknamtui le sathau a bawlkhol uh hi. Thukham zui-in Sabbath ni tawlnga-in a om uh hi.