Read Tedim Chin LUKA 24 Bible Online

LUKA 24 - Tedim Chin bible

LUKA 24

¹Nipi ni zingsang tungin numeite in a bawlsa uh paknamtui tawi-in hanah va pai uh hi.

²Han phual a tun uh ciangin hankhuk hukna suang a kilikkhia mu uh ahih manin

³a sungah tumpah uh a, ahi zongin Topa Jesuh’ luang na om lo hi.

⁴Amaute in lamdangsa-in a om laitakun amaute gei-ah puanpak a silh mi nih hong dingvat uh hi.

⁵Numeite lau mahmah uh ahih manin lei lam nga-in kuncip uh hi. Tua mi nihte in, “Bang hangin misite lakah mihing zong na hi uh hiam?

⁶Hih lai-ah om nawn lo hi; kithosak zo hi. Galilee gamah a om lai-in note kiangah thu hong genin,

⁷‘Mawhnei mite’ khut sungah Mihing Tapa kipia ding a, singlamteh tungah kithatin, a ni thum ni-in hingkik ding hi,’ a cih thute phawk un,” a ci uh hi.

⁸Tua ciangin amaute in Jesuh’ thugente phawkkik uh a,

⁹han panin ciahkikin, nungzui sawm le khatte le midangte kiangah hih thute a gen uh hi.

¹⁰Sawltakte kiangah hih thu a gen numeite pen Magdala khuami Mary, Joanna, James’ nu Mary, le numei dangte ahi uh hi.

¹¹Ahi zongin hih numeite’ thugen pen thu phuahtawm bangin ngaihsun uh a, um lo uh hi.

¹²Ahi zongin Peter dingin hanah va tai a, han sung a etsuk ciangin a kitunna puan bek na om hi. Tua ciangin amah in zong tua thupiang lamdangsa-in inn-ah a ciahkik hi.

¹³Tua ni mahin, Jesuh’ thu a zui mi nih, Jerusalem khua panin tai sagih bang a gamla Emmaus kici khua-ah a pai uh hi.

¹⁴A paikawmun hih thupiangte kikumkum uh hi.

¹⁵Tua bangin kiho-in thu kikumin a om laitakun Jesuh mahmah in hong naihin amaute tawh hong tonkhawm hi.

¹⁶Amau tegel in a muh hangun Jesuh ahihlam thei lo uh hi.

¹⁷Jesuh in, “Na lam paikawmun bang gengen na hi uh hiam?” ci-in a dong hi. Amau tegel zong dinkhawl pah uh a, a maisuah uh dahmai mahmah lai hi.

¹⁸Tua ciangin amau tegel sung panin Kleopas a kici pa in, “Jerusalem-a hawhte lakah tusawng tenga tua lai-a thupiang a thei lo nang bek na hi ding hi,” ci-in a dawng hi.

¹⁹Tua ciangin Jesuh in amaute kiangah, “Bang thu ahi hiam?” ci-in a dot ciangin amaute in, “Nazareth khuami Jesuh tunga thupiang ahi hi. Amah pen kamsang khat hi a, Pasian le mite khempeuh in a thugen le a nasepna-ah vang a nei mahmah khatin a ngaihsut uh ahi hi.

²⁰Ahi zongin ka siampi liante uh le ka uliante un sihna thukhenna a thuak dingin Pilat tungah ap uh a, singlamteh tungah kithat hi.

²¹Amah pen Israel mite a honkhia ding pa hi, ci-in ka lamet uh ahi hi. Tua bang hinapi-in hih thuteng hong piang a, tu-in a thu pianzawh a ni thumna hita hi.

²²Ko pawlte’ sung panin numei pawlkhat in lamdang ka sak uh thu hong gen uh hi. Amaute, tu zingsang tungin hanah va pai uh a,

²³ahi zongin ama luang na om nawn lo hi. Tua ciangin amaute hong ciahkik uh a, vantung mite a muhna uh le tua vantung mite in Jesuh a hinkik khitna thu a gennate uh hong gensawn uh hi.

²⁴Tua ciangin ka lawmte uh pawlkhat zong hanah va pai uh a, numeite’ gen bang teekteekin va mu uh a, ahi zongin Jesuh mu lo uh hi,” ci-in a dawng hi.

²⁵Tua ciangin Jesuh in amau tegel kiangah, “Bangzah takin hai a, bang dingin kamsangte’ thugen um thei lo na hi uh hiam?

²⁶Khrih in minthanna a ngah nadingin hih bangteng a thuak ding kisam hi lo ahi hiam?” a ci hi.

²⁷Tua ciangin Jesuh in Lai Siangtho sungah ama thu a kigennate khempeuh, Moses laibu a kipanin kamsangte’ laibu khempeuh a khiatna a gen hi.

²⁸Tua khua a tun uh ciangin Jesuh a paisuak ding bangin hong om a,

²⁹ahi zongin amau tegel in kho-in, “Tu-in nitak lam hita a, ni tum dektak ahih manin ko tawh hong tamkhawm in,” a ci uh hi. Tua ahih manin Jesuh zong amaute tawh a tam hi.

³⁰Amaute tawh an ne dingin a tut ciangin Jesuh in anlum la a, Pasian tungah lungdamna a kohkhit ciangin balnenin amaute a pia hi.

³¹Tua laitakin a haktawm bangin Jesuh ahih lamtak mu-in thei uh a, ahi zongin amau’ muhna panin Jesuh a mangpah hi.

³²Amau tegel in, “Lampi-ah i paikawmin Lai Siangtho khiatna hong gen laitakin i lungsim hong lawpsak mahmah hi mah lo ahi hiam?” a kici uh hi.

³³Amau zong thakhatin ding pahin Jerusalem-ah paikik uh a, nungzui sawm le khatte le adangte na kikhawmin,

³⁴“Topa hingkik khin takpi hi. Simon kiangah na kilak khinzo hi,” ci-in a kigengen laitak uh a tuak uh hi.

³⁵Tua ciangin tua mi nihte in zong a lam pai laitak uha thupiang teng le anlum a balnen ciangin Topa ahih lamtak a theihnate uh a gen uh hi.

³⁶Amaute hih thu kikumin a om laitakun thakhat thu-in Jesuh mahmah amaute lakah hong ding a, “Nopna ngah ta un,” ci-in amaute a hopih hi.

³⁷Ahi zongin amaute lau-in linglawng gawp uh a, sikha a mu hi ni, ci-in a ngaihsun uh hi.

³⁸Tua ciangin Jesuh in amaute kiangah, “Bang hangin lungmang a, bang hangin lungka na hi uh hiam?

³⁹Ka khut le ka khete en un; kei mahmah ka hi hi. Hong lawng unla hong thei un. Tu-a keima neih bangin sikha in pum le tak nei ahi hiam?” a cih khit ciangin

⁴⁰a khut le a khete a lak hi.

⁴¹Amaute nuamlua kisa-in lamdangsa-in um zo lo phialin a om laitakun, “Nektheih khat peuhpeuh na nei uh hiam?” ci-in a dot ciangin

⁴²amaute in zong ngasa haankeu khat pia uh a,

⁴³Jesuh in saangin amaute’ muhin a ne hi.

⁴⁴Tua ciangin Jesuh in amaute kiangah, “Tu-a thupiang khempeuh pen note tawh kong omkhawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi.

⁴⁵Tua ciangin Lai Siangtho sung thu a theih nadingun a lungsim uh honsak a,

⁴⁶amaute kiangah, “Khrih in sihna thuakin, a ni thum ni-in sihna panin hingkik ding a,

⁴⁷Jerusalem khua a kipan minam khempeuh tungah a mawhna uh kisikin a kimaisak nading thu, ama min tawh kihilh ding hi, ci-in kigelh hi.

⁴⁸Note pen hih thu khempeuh a thei teci na hi uh hi.

⁴⁹Ka Pa’ hong ciamsa thu, note tungah ka hong pia ding hi. Ahi zongin vantung panin tua vangliatna na ngah mateng uh hih Jerusalem khuapi-ah na ngak un,” a ci hi.

⁵⁰Tua ciangin Jerusalem khuasung panin Bethany khuagei ciang amaute paipih a, tua lai panin a khut laamto-in amaute thupha a pia hi.

⁵¹Amaute thupha a piak laitakin amaute kiang panin paikhia-in vantungah amah a kilato hi.

⁵²Amaute in amah bia uh a, lungdam mahmahin Jerusalem khua-ah a ciahkik uh hi.

⁵³Tua ciangin Pasian tungah lungdamna a ko dingin biakinn-ah a pai tawntung uh hi.