Read Tedim Chin LUKA 3 Bible Online

LUKA 3 - Tedim Chin bible

LUKA 3

¹Gam tampi a uk Sisar Tiberius in a ukzawh a kum sawm le ngana, Pontias Pilat in Judea gam ukin, Herod in Galilee gam ukin, a nau Filip in Iturea gam le Trakhonitis gam ukin, Lysanias in Abilene gam uk a,

²Annas le Kaiafas in siampi lianpen a sep laitakin sehnel gamah a om, Zekhariah’ tapa Johan’ tungah, Pasian’ thu hong tung hi.

³Tua ahih ciangin Jordan Gun kiim gam khempeuhah Johan pai kawikawi a, kamsang Isaiah in Lai Siangtho sungah a gelh mah bangin, “Na mawhna panun kisik unla tui kiphum un. Tua hileh Pasian in na mawhnate uh hong maisak ding hi,” ci-in thu a hilh hi.

⁴Isaiah in hih bangin na gelh hi: “Gam sungah mi khat kiko a, ‘Topa’ pai nading lampi bawl unla, a tot ding lampi tangsak un.

⁵Kuam thuk khempeuh kivukdim ding a, mual lian mual neu khempeuh kitotam ding hi. Lam kawite kitangsak ding a, a leihumte kinelsak ding hi.

⁶Mi khempeuh in Pasian’ hotkhiatna ngah ding uh hi,’” ci-in a kigelh hi.

⁷Ama tuiphum ding utin a hong pai mi tampite kiangah Johan in, “Gul bangin ngian a zang note aw, hong tung ding Pasian’ hehna panin na suahtak theih nading uh kua in hong gen ahi hiam?

⁸Na kisikna uh a kilat nadingin gamta un. Note khatlekhat in, ‘Abraham’ suante ihi ngawn hi,’ mawkcih kei un. Ke’n kong cihin-ah, Pasian in hih suangte nangawn Abraham’ suanlekhakte-in bawl thei lel hi.

⁹Tu mahmahin sing a bulphuk dingin hei tawh kingimzo hi. Gah hoih a gah lo singkung khempeuh kiphukin meikhuk sungah kikhul ding hi,” a ci hi.

¹⁰Tua ciangin mihonpite in, “Tua bang ahihleh bangci gamtat ding ka hi uh hiam?” ci-in a dot uh ciangin

¹¹Johan in, “Puanak nih a nei mipa in a nei lote hawm unla, annek ding a neite in a nei lote hawm un,” ci-in a dawng hi.

¹²Siahdongte pawlkhat zong tui a kiphum dingin hong pai-in Johan kiangah, “Sia aw, bangci gamtat ding ka hi uh hiam?” ci-in a dong uh hi.

¹³Amah in, “Na don’ dingun a kilawm zahval na dong kei un,” ci-in a dawng hi.

¹⁴Galkap pawlkhatte in zong ama kiangah, “Kote, bangci gamtat ding ka hi uh hiam?” ci-in a dot uh ciangin, “Zawhthawh thu tawh ahi a, a man lopi-in mawhsakna tawh ahi zongin kuama sum sut kei unla, na khasum ngahzah uh tawh lungkim un,” ci-in a dawng hi.

¹⁵Thulian khat peuhpeuh hong piang ding hi, ci-in mite’ lawpna hong khang semsem a, hih pa pen Khrih hi kha ding hi, ci-in mite in a lungsim uhah a ngaihsun uh hi.

¹⁶Tua ahih ciangin Johan in amaute kiangah, “Keimah in tui sungah note ka hong phum hi; ahi zongin kei sangin nakpitakin a lianzaw khat hong pailai ding hi. Ama khedap khau a sutsak ding nangawnin kei ka kilawmzo nai kei hi. Amah in Kha Siangtho le mei sungah note hong phum ding hi.

¹⁷A buh cilsate a zapsiang nadingin amah in a khut sungah lawhpi tawi a, a takteng ansal sungah koihin, a siteng a mit ngei lo mei sungah a khul ding hi,” ci-in a gen hi.

¹⁸Tua bangin a lam tuamtuamin Johan in mite hanthawnin Lungdamna Thu a hilh hi.

¹⁹Ahi zongin, gam ukpa Herod in ama naupa’ zi Herodias a tenpihna hang le a gamtat hoih lohna a tuamtuamte’ hangin Johan in Herod a taii hi.

²⁰Tua ciangin Herod in thong sungah Johan khia a, a gamtatsiatna a behlap lailai hi.

²¹Mi khempeuh a kituiphum khit uh ciangin Jesuh zong a kituiphum hi. Jesuh in thu a nget laitakin vantung kihong a,

²²vakhu pumpi lim nei-in Kha Siangtho ama tungah hong kumsuk hi. Tua laitakin vantung panin aw khat hong ging a, “Nang pen ka it ka Tapa na hi a, nangma tungah ka lungkim mahmah hi,” a ci hi.

²³Nasep a kipat ciangin Jesuh ama khan kum sawmthum bang a pha hi. Mite in ama pa Josef hi, ci-in a ngaihsun uh hi. Josef’ pa Heli,

²⁴Heli’ pa Matthat, Matthat’ pa Levi, Levi’ pa Melkhi, Melkhi’ pa Jannai, Jannai’ pa Josef,

²⁵Josef’ pa Mattathias, Mattathias’ pa Amos, Amos’ pa Nahum, Nahum’ pa Esli, Esli’ pa Naggai,

²⁶Naggai’ pa Maath, Maath’ pa Mattathias, Mattathias’ pa Semein, Semein’ pa Josek, Josek’ pa Joda,

²⁷Joda’ pa Joanan, Joanan’ pa Resa, Resa’ pa Zerubbabel, Zerubbabel’ pa Shealtiel, Shealtiel’ pa Neri,

²⁸Neri’ pa Melkhi, Melkhi’ pa Addi, Addi’ pa Kosam, Kosam’ pa Elmadam, Elmadam’ pa Er,

²⁹Er’ pa Joshua, Joshua’ pa Eliezer, Eliezer’ pa Jorim, Jorim’ pa Matthat, Matthat’ pa Levi,

³⁰Levi’ pa Simeon, Simeon’ pa Judah, Judah’ pa Josef, Josef’ pa Jonam, Jonam’ pa Eliakim,

³¹Eliakim’ pa Melea, Melea’ pa Menna, Menna’ pa Mattatha, Mattatha’ pa Nathan, Nathan’ pa David,

³²David’ pa Jessi, Jessi’ pa Obed, Obed’ pa Boaz, Boaz’ pa Salmon, Salmon’ pa Nahshon,

³³Nahshon’ pa Amminadab, Amminadab’ pa Admin, Admin’ pa Hezron, Hezron’ pa Perez, Perez’ pa Judah,

³⁴Judah’ pa Jakob, Jakob’ pa Isaac, Isaac’ pa Abraham, Abraham’ pa Terah, Terah’ pa Nahor,

³⁵Nahor’ pa Serug, Serug’ pa Reu, Reu’ pa Peleg, Peleg’ pa Eber, Eber’ pa Shelah,

³⁶Shelah’ pa Kainan, Kainan’ pa Arpakshad, Arpakshad’ pa Shem, Shem’ pa Noah, Noah’ pa Lamek,

³⁷Lamek’ pa Methuselah, Methuselah’ pa Enok, Enok’ pa Jared, Jared’ pa Mahalaleel, Mahalaleel’ pa Kainan,

³⁸Kainan’ pa Enos, Enos’ pa Seth, Seth’ pa Adam, Adam’ pa Pasian ahi hi.