Read Tedim Chin LUKA 5 Bible Online

LUKA 5 - Tedim Chin bible

LUKA 5

¹Khatvei, Gennesaret Tuili gei-ah Jesuh dingin a om laitakin, mite in Pasian’ thu zanuamin Jesuh hong nehcip uh hi.

²Jesuh in tui gei-ah gunkuang nih a om a mu hi. Tua gunkuang nei ngasa bengte a gunkuang panun tuakkhia-in tui sungah a ngente a sawp uh hi.

³Tua gunkuangte sung panin Simon’ gunkuang sungah Jesuh tuang a, lei tawh tawm a kigamla zek dingin a gunkuang tawm a hawh nadingin Simon kiangah a gen hi. Tua ciangin gunkuang sungah tu a, tua lai panin thu a hilh hi.

⁴Thuhilh a tawp ciangin Simon kiangah, “Tui thukna lamah na gunkuang hot inla, na ngen tawh ngasa khuh in,” a ci hi.

⁵Tua ciangin Simon in, “Sia aw, tu zanthapai ngasa ka khuh uh hangin khat zong ka man kei uh hi. Ahi zongin khuh in, nong cih leh, ka khuh ding hi,” ci-in a dawng hi.

⁶A ngen a khuh le ngasa tampi tak awk a, a ngen kikeek dektak hi.

⁷A gunkuang dang khatah a om a lawmte hong pai-in a huh nadingun a khut uh a van uh hi. Amaute zong hong pai uh a, gunkuang tegel sungah ngasa a dimtakin guang uh ahih manin a gunkuang tum dektak hi.

⁸Simon Peter in hih thu a muh ciangin Jesuh’ mai-ah khukdin a, “Topa aw, kei mawhnei mi ka hih manin ka kiang panin paikhia in,” a ci hi.

⁹Tua zahin ngasa tampi a matna hangun amah le a lawmte in lamdang a sa mahmah uh hi.

¹⁰Tua mah bangin Simon’ lawmte ahi, Zebedi’ tapa James le Johan-te in zong lamdang a sa uh hi. Jesuh in Simon kiangah “Lau kei in. Tu a kipanin ngasa mat bangin mi tampi a huai pa na suak ding hi,” a ci hi.

¹¹Tui gei-ah a gunkuangte uh a tunpih khit uh ciangin a na khempeuh uh nusia-in Jesuh a zui uh hi.

¹²Khatvei, khuasung khatah Jesuh a om laitakin tua khua sungah a pumtangin phaknatna a vei mi khat a om hi. A phakpa in Jesuh a muh ciangin a mai-ah bokin, “Topa aw, hong damsak nuam peuh lecin kei nong damsak thei ding hi,” ci-in a thum hi.

¹³Jesuh in zong a khut zanin amah lawng a, “Kong damsak nuam hi; dam ta in,” ci-in a dawng hi. Tua khit phetin a phaknatna a dampah hi.

¹⁴Tua ciangin Jesuh in ama kiangah, “Hih thu kuamah dang kiangah gen kei in. Siampipa kiangah paisuakpah inla kivelsak in. Tua ciangin na damna thu a kilat nadingin Moses thupiak mah bangin biakna pia in,” ci-in thu a pia hi.

¹⁵Ahi zongin Jesuh’ thu kitheithang semsem zawsop a, ama thu a ngai ding le a natna panun damna a ngah nadingun mi tampi tak a hong pai uh hi.

¹⁶Ahi zongin gamdaihna munah Jesuh paikhia-in thu a ngen hi.

¹⁷Khatvei, Jesuh in thu hilhin a om laitakin Galilee gam, Judea gam, le Jerusalem khua panin a hong pai Farisi mi pawlkhat le Thukham hilh siate pawlkhat hong om hi. Cina damsak theih nading Topa’ vangliatna, Jesuh tungah kipia hi.

¹⁸Mi pawlkhat in khutlekhezaw mi khat a lupna pheek tawh hong pua uh a, inn sungah paipihin Jesuh mai-ah koih ding a hanciam uh hi.

¹⁹Mihon tamlua ahih manin a lutpih nading uh lampi om lo hi. Tua ahih ciangin innkhum zangah kahpihto-in innkhum hong let uh a, mihonte’ lak, Jesuh’ omna mai sanah a lupna pheek tawh a khaisuk uh hi.

²⁰Jesuh in amaute’ upna a muh ciangin a mipa kiangah, “Lawm aw, na mawhnate hong kimaisak khinta hi,” a ci hi.

²¹Tua ciangin Thukham hilh siate le Farisi mite in a lungsim sung uhah, “Hih bangin Pasian tawh a kikimin a pau ngam mipa kua ahi hiam? Mihing kuamah in mawhna maisak thei lo a, Pasian bek in maisak thei hi,” a ci uh hi.

²²Jesuh in amaute’ ngaihsutna thei ahih manin amaute kiangah, “Bang hangin tua bangin ngaihsun na hi uh hiam?

²³‘Na mawhnate hong kimaisak hi,’ cih ding baihzaw ahi hiam, tua ahih kei leh, ‘Tho inla, lam pai in,’ cih ding baihzaw ahi hiam?

²⁴Mihing Tapa in mawhna maisak theih nading leitungah vangliatna nei hi, ci-in na theih nadingun kong lak ding hi,” a ci hi. Tua ahih ciangin khutlekhezaw mipa kiangah, “Tho inla na lupna pheek pua-in na inn-ah ciah in,” a ci hi.

²⁵Thakhat thu-in amaute khempeuh’ muhin a mipa zong tho-in a lupna pheek la a, Pasian phatkawmin a inn-ah a ciah hi.

²⁶Tua ciangin amaute khempeuh in lamdangsa mahmah uh a, lau mahmah kawmin Pasian phatin, “Tuni-in a lamdang mahmah na khat i mu hi,” a ci uh hi.

²⁷Tua khit ciangin Jesuh paikhia a, siahdongpa Levi, a zumah a tu a mu hi. Jesuh in, “Kei hong zui in,” a ci hi.

²⁸Levi zong dingpah a, a na khempeuh nusia-in Jesuh a zui hi.

²⁹Tua ciangin Levi in ama inn-ah Jesuh vakna annek pawipi bawl a, annekna sabuai-ah siahdong dang tampite le midangte zong tawh a tukhawm uh hi.

³⁰Farisi mite le amau sung panin Thukham hilh siate, nungzuite tungah phun uh a, “Bang hangin siahdongte le thukham khial mite tawh an nekhawm na hi uh hiam?” a ci uh hi.

³¹Tua ciangin Jesuh in, “Cidamte in siavuan kisam lo uh a, cina mite bek in kisam uh hi.

³²Mite in a zahtak mihoihte a kisik nadingun a sam dingin hong pai ka hi kei a, mite in a pampaih mite a kisik nadingun a sam dingin a hong pai ka hi hi,” ci-in a dawng hi.

³³Tua ciangin amaute pawlkhat in Jesuh kiangah, “Johan’ nungzuite in an tangin thu ngen zelzel uh a, Farisi mite’ nungzuite zong tua bangmahin gamta napi-in, bang hangin nangma nungzuite in tang loin om se uh ahi hiam?” ci-in a dong uh hi.

³⁴Jesuh in amaute kiangah, “Mopawi-ah zineipa le pawisimte a omkhawm laitakin a pawisimte an tangsak thei ding na hi uh hiam?

³⁵Amaute kiang panin zineipa a kipaikhiatpih hun hong tung ding a, tua hun ciangin tang ding uh hi,” ci-in a dawng hi.

³⁶Tua ciangin Jesuh in thugentehna dang khat zong gen a, “Mi khat in puan thak khat eukhia-in puan lui thuapna-in nei lo hi. Tua bangin hih leh a puan thak pen a keeksak suak ding a, a puan thak eukhiat zong a puan lui tawh etlawm lo ding hi.

³⁷Kuamah in savun um lui sungah leenggahzu a thak thun ngei lo hi. Thun zenzen leh leenggahzu thak in a savun um phukham ding a, a leenggahzu bua-in, a savun um zong kisia ding hi.

³⁸Tua ahih manin savun um thak sungah leenggahzu thak a kikoih ding ahi hi.

³⁹Kuamah in leenggahzu lui a nek khit ciangin a thak nenuam nawn lo hi. Bang hang hiam cih leh amah in, ‘A lui khumzaw hi,’ ci hi,” a ci hi.