Read Tedim Chin LUKA 8 Bible Online

LUKA 8 - Tedim Chin bible

LUKA 8

¹Tuazawh tawlkhat khit ciangin khuapite le khuaneute-ah a ban banin Jesuh pai a, Pasian’ Ukna hangin Lungdamna Thu hilhin a vak kawikawi hi. Tua a vak kawikawina-ah nungzui sawm le nihte,

²le a sungpan dawi a hawlkhiatsakte le natna tuamtuam pan a damsak numei pawlkhat in zong a zui uh hi. Tua numeite: A sung panin dawi sagih a kihawlkhiatna Mary (Magdala khuami Mary a kici nu),

³Herod’ khutnuai-a ulian Khuza’ zi Joanna, Susanna, le numei dang tampite hi uh a, amau’ neihsa tawh Jesuh le a nungzuite a huh uh hi.

⁴Khua khat khit khua khat panin Jesuh kiangah a hong pai mi hong kibehlaplap a, mi tampi tak hong om ciangin Jesuh in thugentehna khat gen a,

⁵“Khaici vawhpa khaici vawh dingin a kuankhia hi. Khaici a vawh ciangin pawlkhatte lampidung tu a, khe tawh kisik gawpin vasate in a ne hi.

⁶Pawlkhatte, suang kitawphahna leilak tu a, a po tei hangin leisung a nom tam lo ahih manin a vulkik pah hi.

⁷Pawlkhatte, lingbulsum omna leilak tu a, lingte a khan ciangin a deplum hi.

⁸Pawlkhatte, leihoihna lak tu-in khang a, a zah zakhat ciang dong a piang hi,” a ci hi. Tua ciangin Jesuh nakpitakin kiko a, “Zak nading bil a neite in hih thu za ta un,” ci-in a thugen a khum hi.

⁹Hih thugentehna bang a cihnopna ahi hiam, ci-in a nungzuite in a dot ciangin

¹⁰Jesuh in, “Pasian’ Ukna thu tawh kisai thusim, note tungah hong kigen hi. Ahi zongin midangte in, en en napi-un a muh loh nading za za napi-un a tel loh nadingun amaute tungah thugentehna tawh thu kigen hi,” a ci hi.

¹¹Tua ciangin Jesuh in, “Thugentehna a khiatna pen hih bang ahi hi: Khaici pen Pasian’ thu hi.

¹²Lamdungah khaici a tukna munte pen Pasian’ thu a zate a cihnopna ahi hi. Tuate in Pasian’ thu a zak hangun a thu um loin, hotkhiatna a ngah loh nadingun Dawimangpa hong pai-in a lakkhiatsak hi.

¹³Suang kitawphah leilak a tukna munte pen Pasian’ thu a zak ciangin lungdam takin a sangte a cihna ahi hi. Ahi zongin amaute sungah thuktum lo ahih manin tawlkhat sung bek um uh a, ze-etna hun a tun ciangin a puk uh hi.

¹⁴Lingbulsum omna a tukna munte pen Pasian’ thu za napi-in a nuntakna sung uhah leitung lunghihmawhna, hauhna, le nopsaknate in depgawp ahih manin bangmah a suakkhia zo lote a cihnopna ahi hi.

¹⁵Leihoih a tukna munte pen Pasian’ thu a zak ciangin lungsimtak tawh a thu mangin kip tawntung uh ahih manin amau a dingin man a neite a cihnopna ahi hi,” a ci hi.

¹⁶Tua ciangin Jesuh in, “Mei a vak khit ciangin lawh a khuh ahi a, lupna nuai-ah a koih ahi zongin kuamah om lo hi. Innsungah a lut uh ciangin mite in khua a muhtheih nadingin meivak koihna kho sangah koih bek uh hi.

¹⁷Bang hang hiam cih leh, thusimin a kikoih peuhmah, khatvei teitei thulang a suak lo ding, a kiselcip peuhmah, khatvei teitei a kipholak lo ding, bangmah om lo hi.

¹⁸Tua ahih ciangin thu na ngaih uh ciangin limtakin kingaihsun un. Bang hang hiam cih leh a neisa mipa tungah Pasian in piathuah ding a, a nei lo mipa tung panin themkhat nei-a a kingaihsut nangawn lakkhiatsak ding hi,” a ci hi.

¹⁹Tua laitakin Jesuh’ nu le a naute hong pai uh a, ahi zongin mihon kinehlua uh ahih manin ama kiangah pai thei lo uh hi.

²⁰Tua ahih manin mi khat in Jesuh kiangah, “Na nu le na naute in nang hong munuam uh a, innpua-ah om uh hi,” a ci hi.

²¹Tua ciangin Jesuh in a dawnna-in mihon khempeuh tungah, “Pasian’ thu za a, a zuite khempeuh pen ka nu le ka sanggamte ahi hi,” a ci hi.

²²Nikhat, Jesuh a nungzuite tawh gunkuang tungah tuang a, amaute kiangah, “Tuili galkhatah pai ni,” ci-in a pai uh hi.

²³Tua bangin a pai laitakun Jesuh a ihmu hi. Tui tungah nakpitakin huihpi hong nungin gunkuang sungah tui dim dingin hong kipan a, lauhuai mahmah hi.

²⁴Nungzuite in Jesuh hong naihin phong uh a, “Topa aw, Topa aw, kote ka si dektak uh hi,” a ci uh hi. Jesuh zong tho-in huihpi le tui kilok a daih nadingin thu pia a, a thupiak bangin hong dai dide pah hi.

²⁵Tua ciangin Jesuh in a nungzuite kiangah, “Na upna uh koi-ah om khinta ahi hiam?” a ci hi. Ahi zongin amaute lau-in lamdangsa uh a, khatlekhat in, “Hih pa kua ahi hiam? Thu a piak ciangin huihpi le tuihualte nangawn in a thu mang uh hi,” a kici uh hi.

²⁶Tua ciangin Galilee Tuili galkhat, Gadara gam a tung uh hi.

²⁷Gunkuang tung panin leilakah Jesuh hong paisuk laitakin tua khuasunga om dawivei mi khat in a na dawn hi. Tua dawivei pa pen sauveipi sung puan silhloin omkhin a, inn-ah zong om loin han lak khawngah om tawntung hi.

²⁸Jesuh a muh ciangin nakpitakin awngin a mai-ah khukdin a, “A Lian Pasian’ Tapa Jesuh aw, kei bang hong nuammawh na hi hiam? Kei, gim nong piak loh nadingin ka hong thum hi,” ci-in nakpitakin a kiko hi.

²⁹Hih bangin a cihna pen, ama sung panin dawi a paikhiat nadingin Jesuh in thu a piakna hang ahi hi. Dawi in tua mipa tamveipi tak man a, a khut le a khete sikkhau tawh khihin a kikepcip hangin a sikkhaute peksat a, dawi in gamlakah a paikhiatpih hi.

³⁰Jesuh in ama kiangah, “Na min bang ahi hiam?” ci-in a dot ciangin, ama sungah dawi tampi lut ahih manin, “A Honpi,” ci-in a dawng hi.

³¹Leihawm thukpi sungah amaute a khiat loh nadingin Jesuh kiangah a thum uh hi.

³²Tua laitakin tua kiim mualpang to-ah vok honpi khat gamta-in a om hi. Tua vokte sungah a luttheih nadingun dawite in Jesuh kiangah thum uh a, Jesuh in zong amau’ ngetna bangin a pia hi.

³³Tua ahih manin dawite zong mipa sung panin paikhia-in vokte sungah lut uh a, vokte zong tui gei keen tung khawngah tuaksuk gawpin a vekpi-in tui a kia hi.

³⁴Vokcingte in hih thupiang a muh uh ciangin amaute tai-in khuasung le gam sung tengah a zasak uh hi.

³⁵Hih thupiang a en dingin mite hong pai uh a, Jesuh kiang a tun uh ciangin dawi a paikhiatna mipa Jesuh kiangah omin, puan silhin, a pilkikna thu a muh uh ciangin a vekpi-un lamdangsa-in a lau uh hi.

³⁶Tua thupiang a mu masa mite in dawivei pa a damnazia thute, amaute tungah a na gen uh hi.

³⁷Tua ciangin Gadara gam kiima om khempeuh lau mahmah uh ahih manin Jesuh a paikhiat nadingin a sawl uh hi. Jesuh zong gunkuang tungah tuangin a ciah hi.

³⁸Dawi a paikhiatna mipa in Jesuh kiangah, “Kei zong hong zuisak in,” ci-in a thum hi; ahi zongin Jesuh in,

³⁹“Na inn-ah ciah inla, Pasian in nang a dingin bangzah takin na hong sepsak hiam, cihna thu va gen in,” ci-in a sawlkhia hi. A mipa zong ciah a, ama a dingin Jesuh’ sepsakna thu khempeuh, khuasung tengah a gengen hi.

⁴⁰Tuili galkhatah Jesuh hong ciahkik ciangin, ama hong ciahkik ding ngakin om niloh uh ahih manin mite na nuam mahmah uh hi.

⁴¹Tua laitakin kikhopna inn ukpi Jairas a kici mi khat hong pai-in Jesuh’ khe phungah hong khukdin a, ama inn-ah a pai nadingin a thum hi.

⁴²Bang hang hiam cih leh kum sawm le nih a pha tanu khat a neihsun pen a ci na-in a si dektak hi. Jesuh zong tua inn zuan dingin a pai laitakin mihonpite in zui-in a nehcip uh hi.

⁴³Tua laitakin kum sawm le nih tawntung siluang natna vei-in, a neih khempeuh siavuante cialna-in a zat hangin kuamah in a damsak zawh loh numei khat,

⁴⁴mihonte lak Jesuh nungah hong pai-in Jesuh’ puanmongteep lawngsim a, thakhatin a siluang a kangpah hi.

⁴⁵Tua ciangin Jesuh in, “Kua in hong lawng na hi uh hiam?” a ci hi. Kuamah in, “Hong lawng ing,” a cih loh ciangin Peter in, “Topa aw, mi khempeuh in nang hong umcihin hong nehcip uh hi,” a ci hi.

⁴⁶Ahi zongin Jesuh in, “Ka sung panin vangliatna a paikhiat lamtak phawk ka hih manin mi khat in hong lawng hi,” a ci hi.

⁴⁷Numei in amah a kiphawkna thu a theih ciangin a lingsa-in hong pai-in Jesuh mai-ah hong bok a, Jesuh a lawnna thu le amah a dampahna thuteng, tua lai-a om mi khempeuh’ zakin Jesuh kiangah a pulak hi.

⁴⁸Tua ciangin Jesuh in numei kiangah, “Ka tanu aw, na upna in nang hong damsakzo hi; lungnuam takin na ciah in,” a ci hi.

⁴⁹Tua bangin thu a gen laitakin kikhopna inn ukpa’ inn panin kamtai khat hong tung a, “Na tanu si khinzo ta hi. Siapa gimsak nawn kei in,” a hong ci hi.

⁵⁰Ahi zongin Jesuh in hih thu a zak ciangin, kikhopna inn ukpa kiangah, “Lunghimawh kei in; upna nei peuh lecin na tanu a hingkik ding hi,” a ci hi.

⁵¹Tua inn-ah Jesuh a tun ciangin Peter, Johan, le James le numeino’ nu le pa simloh kuamah dang, inn sungah zuisak lo hi.

⁵²Tua lai-a om mi khempeuh, tua numeino’ sihna hangin kapin, thumin na om uh hi. Ahi zongin Jesuh in, “Kap nawn kei un, amah a si hi lo hi; a ihmu bek ahi hi,” a ci hi.

⁵³Amah a sihkhitna thei uh ahih manin Jesuh a nuihsan lel uh hi.

⁵⁴Ahi zongin Jesuh in numeino a khutin lenin, “Numeino aw, tho in,” a ci hi.

⁵⁵Numeino zong hingkik a, thakhatin a thopah hi. Tua ciangin numeino’ nek ding an pia un, ci-in Jesuh in a sawl hi.

⁵⁶Numeino’ nu le pa in lamdangsa mahmah uh a, ahi zongin hih thupiangte kuama kiangah a gen loh nadingun Jesuh in a kham hi.