Read Tedim Chin LUKA 9 Bible Online

LUKA 9 - Tedim Chin bible

LUKA 9

¹Tua ciangin Jesuh in nungzui sawm le nihte sam a, dawite a hawlkhiat theih nading uh le cinate a damsak theih nadingun vangliatna le aana a pia hi.

²Tua ciangin Pasian’ Ukna thu a hilh ding le cinatnate a damsak dingin kuankhia sakin

³amaute kiangah, “Tu-a na khualzinna uhah bangmah keng kei un. Ciangkhut ahi a, ip ahi a, an ahi a, sum ahi zongin keng kei unla, puan-ak zong a valin kengthuah kei un.

⁴Khua khatpeuhah na lut uh ciangin tua khua panin na paikhiat matengun a inn-ah hong tungsakte’ inn mahah om paisuak un.

⁵A inn uhah a hong tunsak nop lohna khua peuhpeuh panin na paikhiat uh ciangin amaute hilhkholhna-in na khe uha leivui bangte sinsan un,” ci-in a vaikhak hi.

⁶Nungzuite zong kuankhia uh a, khua khempeuhah pai-in Lungdamna Thu hilh uh a, a paina khempeuh uhah cinate a damsak uh hi.

⁷Galilee gam sungteng a uk Herod in hih thupiangte a zak ciangin lungmang mahmah hi. Bang hang hiam cih leh mi pawlkhat in, “Johan hong hingkik hi,” ci uh hi.

⁸Pawlkhat in, “Elijah hong kilangkik hi,” ci uh a, pawlkhat in, “Tanglai kamsangte khat hong hingkik hi,” a ci uh hi.

⁹Herod in, “Johan a ngawng ka tansak khitsa ahi hi; hih a thu ka zak mipa kua hi ding ahi hiam?” a ci hi. Tua ahih manin Jesuh tawh kimuh ding a hanciam hi.

¹⁰Sawltakte a khualzinna panun a hong tunkik uh ciangin a sepna teng uh Jesuh kiangah a gen uh hi. Jesuh in zong amauteng bek a om theih nadingun amaute samkhia a, Bethsaida khua lamah a paipih hi.

¹¹Mihonte in hih thu a theih uh ciangin Jesuh nungdelh uh a, Jesuh in zong amaute na nolh loin, amaute tungah Pasian’ Ukna thu na hilh a, natna a neite zong a damsak hi.

¹²Ni a tum kuan ciangin nungzui sawm le nihte in Jesuh kiangah, “Hih lai mun gamlak ahih manin, hih kiima om khuate-ah mite va pai-in annek ding le giah nading a zon nadingun mihonte sawlkhia in,” a ci uh hi.

¹³Ahi zongin Jesuh in amaute kiangah, “A nek dingun nektheih khat peuhpeuh pia un,” a cih ciangin amaute in, “Kote va pai-in hih mi khempeuhte a dingin an va lei ding ka hih kei buang uhleh, anlum nga le ngasa tawn nih cih simloh bangmah dang om lo hi,” ci-in a dawng uh hi.

¹⁴Tua lai-ah mi tulnga bang a om hi. Tua ciangin Jesuh in a nungzuite kiangah, “Mite sawmnga, sawmnga-in a pawlpawlin tusak un,” ci-in a sawl hi.

¹⁵A nungzuite in zong tua a sawl mah bangin mite a tusak uh hi.

¹⁶Tua ciangin Jesuh in anlum nga le ngasa tawn nih la-in vantung lam nga a, Pasian tungah lungdamna ko-in balnen a, mite tungah a lui dingin a nungzuite tungah a pia hi.

¹⁷Mi khempeuh in ne-in a khamkhit uh ciangin, a nungzuite in a kikhamval teng khawm uh a, paipel sawm le nih a dim hi.

¹⁸Khatvei, Jesuh guak thungenin a om laitakin a nungzuite zong ama kiangah om uh hi. Jesuh in a nungzuite kiangah, “Mite in kei kua hi, hong ci uh ahi hiam?” ci-in a dong hi.

¹⁹Amaute in, “Pawlkhat in, Tuiphumpa Johan hi, hong ci uh hi. Pawlkhat in Elijah hi, hong ci uh a, pawlkhat in, tanglai kamsangte khat peuhpeuh hong hingkik hi ding hi, hong ci uh hi,” ci-in a dawng uh hi.

²⁰Tua ciangin Jesuh in, “Tua ahihleh note in kei kua hi, hong ci na hi uh hiam?” ci-in a dong hi. Tua ciangin Peter in, “Nang pen Pasian’ Khrih na hi hi,” ci-in a dawng hi.

²¹Tua ciangin Jesuh in, “Hih thu kuama kiangah gen kei un,” ci-in a nungzuite thu a pia hi.

²²Tua ciangin Jesuh in a nungzuite kiangah, “Mihing Tapa in tampi tak thuak ding a, upate, siampi liante, le Thukham hilh siate in amah nial ding uh hi. Amah kithat ding a, a ni thum ni-in kihing kiksak ding hi,” a ci hi.

²³Tua ciangin Jesuh in a nungzuite le mi khempeuh kiangah, “Mi khatpeuh in kei hong zuihnop leh ama deihna bangin gamta nawn loin nisimin a singlamteh pua-in hong zui ding hi.

²⁴Hih leitung nuntakna a hu nuamte in a nuntakna bulpi nangawn tawh suplawh ding a, kei’ hangin a nuntakna a suplawhte in a nuntakna bulpi hu zo ding hi.

²⁵Mi khat in leitung khempeuh a ngah hangin a nuntakna bulpi suplawh leh bang phattuamna om ding ahi hiam?

²⁶Keima hang le ka thuhilhnate hangin a maizum peuhmah, a Pa’ minthanna vang le a siangtho vantung mite’ minthanna tawh a minthangin hong paikik ciangin Mihing Tapa zong ama hangin a maizum ding hi.

²⁷Ke’n kong cihin-ah, hih lai-ah a om mi pawlkhatte in Pasian’ Ukna a muh khit uh matengin si lo ding uh ahihna phawk un,” a ci hi.

²⁸Hih thu a genkhit nipikal khat bang khit ciangin Jesuh in Peter, Johan, le James te sam a, mualtungah thungen dingin a paipihto hi.

²⁹Jesuh in thu a nget laitakin a mel hong kikheel a, a puante zong pakin tee mahmah hi.

³⁰Thakhat thu-in mihing nih tawh a kiho-in hong omvat hi. Tua mi nihte pen Moses le Elijah hi a,

³¹vantung minthanna vang lim nei uh a, Jerusalem khua-ah pai-in sihna tawh Pasian’ deihna a tunsak nading thu a kikumkum uh ahi hi.

³²Peter le a lawm tegel lusu-in ihmu uh a, ahi zongin amaute hong khanglo-in, Jesuh’ minthanna vang le amah tawh a dingkhawm mi nihte a mu uh hi.

³³A mite, Jesuh kiang panin a paikhiat laitakin Peter in bang gen ka hi hiam, cih mel zong a thei lopi-in Jesuh kiangah, “Topa aw, hih lai-a i om, nuam mahmah hi. Nang a’ ding buk khat, Moses a’ ding buk khat, Elijah a’ ding buk khat, buk thum kong lamsak ding uh hi,” a ci hi.

³⁴Hih bangin thu a gen laitakin meii hong kai a, a liim in amaute hong liah hi. Meii in a tuamcip ciangin nungzuite a lau uh hi.

³⁵Tua ciangin meii lakah aw khat hong ging a, “Hih pa, ka Teelsa ka Tapa ahi hi; ama thu na ngai un,” a ci hi.

³⁶Tua awging a bei khit ciangin Jesuh guak bek hong om hi. Nungzuite in hih a muhsa uh thu tua hun sawngteng kuama kiangah gen loin a imcip uh hi.

³⁷A zing ciangin mualtung panin hong paisuk uh a, mi tampi in Jesuh na dawn uh hi.

³⁸Mihon lak panin mi khat hong kiko a, “Sia aw, ka tapa nong etsak nadingin kong thum hi. Amah bek ta a ka neih ahi hi.

³⁹Dawi in amah man a, thakhat thu-in kikogawp hi. A cilphuan a buak dongin kongkawcipsak a, gimsak gawp a, nusia nuam lo hi.

⁴⁰Na nungzuite in a dawi hong hawlkhiatsak nading uh ka thum a, ahi zongin hong hawlkhiatsak thei lo uh hi,” a ci hi.

⁴¹Jesuh in, “Note in bangzahin upna nei lo a, bangzahin khial na hi uh hiam? Note bang tanvei hong ompih ding a, bang tanvei hong kikholhpih ding ka hi hiam?” a ci hi. Tua ciangin a mipa kiangah, “Na tapa hong paipih in,” ci-in a dawng hi.

⁴²A naupang hong pai laitakin dawi in leilakah tuksakin a kongkawcipsak hi. Ahi zongin Jesuh in a dawi taii a, naupang damsakin, a pa kiangah a piakik hi.

⁴³Hih bangin Pasian a vang a liatna hangin mi khempeuh in lamdang a sa uh hi. Mite in Jesuh’ hihnate khempeuh lamdangsa-in a om laitakin Jesuh in a nungzuite kiangah,

⁴⁴“Mihingte’ khut sungah Mihing Tapa kipia ding ahihna thu mangngilh het kei un,” a ci hi.

⁴⁵Ahi zongin amaute in a cihnopna thei lo uh hi. Amaute in a theihtel loh nading mahun a kibawl hi a, bang a cihnopna hiam, ci-in Jesuh kiangah lah a dong ngam kei uh hi.

⁴⁶Kua lianpen ding ihi hiam, ci-in nungzuite lakah kiselna khat hong om hi.

⁴⁷Jesuh in amaute’ lungsim ngaihsutna a phawk ciangin naupang khat la-in a gei-ah omsak a,

⁴⁸a nungzuite kiangah, “Keima hangin hih naupang a limbawl mi peuhmah in kei hong limbawl hi a, kei hong limbawl mi peuhmah in kei hong sawl pa zong a limbawl ahi hi. Note khempeuh lakah a neupen pa a lianpen pa ahi hi,” a ci hi.

⁴⁹Tua ciangin Johan in, “Topa aw, nangma min tawh dawi a hawlkhia mi khat ka mu uh a, amah pen eima pawl sungah a om hi lo ahih manin ka kham uh hi,” a hong ci hi.

⁵⁰Ahi zongin Jesuh in ama kiangah, “No hong langpang lote note’ pawl ahih manin kham kei un,” a ci hi.

⁵¹Jesuh vantungah a kilaktoh ding hun a nai kuan ciangin Jerusalem khua manawh dingin a ngaihsun hi. Ama mai-ah nungzui pawlkhat mapaisak a,

⁵²Jesuh a dingin a kisam khempeuh a vaihawmsak dingin Samaria khua khatah a lut uh hi.

⁵³Ahi zongin Jesuh in Jerusalem khua manawh sawm ahih manin tua khuamite in Jesuh na tungsak nuam lo uh hi.

⁵⁴A nungzuite sung pan James le Johan in hih thu a theih uh ciangin Jesuh kiangah, “Topa aw, vantung panin meikuang ngenin amaute kangtumsak le ung nong awi hiam?” a ci uh hi.

⁵⁵Ahi zongin Jesuh kihei-in amaute a taii hi.

⁵⁶Tua ciangin khua dang khatah a paisuak uh hi.

⁵⁷Lampi-ah a pai laitakun mi khat in Jesuh kiangah, “Na paina khempeuhah kong zui ding hi,” a ci hi.

⁵⁸Jesuh in, “Ngiate in lup nading kua nei uh a, vasate in zong giah nading bu nei uh hi. Ahi zongin Mihing Tapa in a luptheih nading mun koimahah nei lo hi,” a ci hi.

⁵⁹Tua ciangin Jesuh in midang khat kiangah, “Kei hong zui in,” a ci hi. Ahi zongin amah in, “Topa aw, kei hong ciahsak inla, ka pa hong vuisak masa in,” a ci hi.

⁶⁰Ahi zongin Jesuh in, “Misi bang ahi mite in misite na vui tahen. Nang ahihleh va pai inla Pasian’ Ukna thu va hilh in,” a ci hi.

⁶¹Tua ciangin midang khat in, “Topa aw, nang ka hong zui ding hi. Ahi zongin ka inn-ate, mangpha hong khasak masa in,” a ci hi.

⁶²Jesuh in ama kiangah, “Bawng lokhawhna lenkawmin a nunglam a en mi pen Pasian’ Ukna tawh kituak lo hi,” ci-in a dawng hi.