Read Tedim Chin THU HILHKIKNA 1 Bible Online

THU HILHKIKNA 1 - Tedim Chin bible

THU HILHKIKNA 1

¹Hihte pen Jordan galkhat gamlak, Suf galkhat Arabah gam sung, Paran le Tofel, Laban, Hazeroth le Dizahab kikalah Moses in Israel-te khempeuh tungah a gen thute ahi hi.

²Tua mun pen Horeb panin Seir Mual tawnin Kadeshbarnea lamah ni sawm le ni khat paina ahi hi.

³Heshbon gamah a teng Amor kumpipa Sihon, le Ashtaroth le Edrei gamah a teng Bashan kumpipa a zawh khit ciangin, a kum sawmlina, kha sawm le kha khatna, a ni masa ni-in, amaute’ tungah thupiakna-in TOPA in ama tungah a piak bangbangin Moses in Israel mite tungah a gen hi.

⁵Moab gam Jordan galkhatah Moses in hih thu gentel a,

⁶“Horeb gam sungah TOPA i Pasian in eite’ kiangah, ‘Hih mualah sauvei na om khinzo uh hi.

⁷Kithawi-in na khualzin uh kipan kik unla, Amor mite’ mualtung gam le Arabah kiim, mualtung gam, lei niamna gam, Negeb gam khempeuh, le Kanaan mite’ gam tuipi gei le Lebanon, gun golpi ahi Eufratis gun dongin pai un.

⁸En un, note’ mai-ah leitang ka koihzo hi. Pai unla, TOPA in na pate uh Abraham, Isaac, Jakob, le amau’ nunga a suanlekhakte uh tungah piak dingin a ciam leitang luah un,’ hong ci hi.

⁹“Tua hun laitakin note kiangah, ‘Kei guak bek in note kong enzo kei ding hi.

¹⁰TOPA na Pasian un note tampi hong phasakzo hi. En un, note tuhunin vantung aksite zahin tampi na pha uh hi.

¹¹TOPA, na pate uh Pasian in tu-a zah tulin note hong bawl hen la, note tungah hong ciamsa bangin thupha hong pia ta hen!

¹²Kei guak in note’ thu kineihnate siansak nading tavuan lianpi bangci puakzawh ding ka hi hiam?

¹³Na minam uh tawh a kizui-in a pil, thuthei, thuphawksa mite teel unla, note’ lutangin amaute ka koih ding hi,’ kong ci hi.

¹⁴Note in, ‘Nangma hong gen thu pen kote a dingin hoih hi,’ ci-in nong dawng uh hi.

¹⁵Tua ahih ciangin na minam lutang uh ahi, a pil thu phawksa mite ka la a, note’ tungah lutangin a tul uk, a za uk, a sawmnga uk, a sawm ukte, le uliante na minam khempeuh sung uhah ka koih hi.

¹⁶“Tua hun laitakin na thukhente uh ka thuhilh a, ‘Na sanggamte uh thu neihte za unla, mi khat le a sanggampa ahi a, amah tawh a om khualmipa tawh ahi zongin thu a mantakin khen un.

¹⁷Thukhenna-ah angvan na nei kei ding uh hi. A neu le a liante a kibangin a thu na ngai ding uh a, maitang zahtak tuam na nei kei ding uh hi. Bang hang hiam cih leh thukhenna pen Pasian-a’ ahi hi. Note a dingin a haksa lua thute kei kiangah nong paipih ding uh a, keimah in tua thu ka za ding hi,’ ka ci hi.

¹⁸Amaute’ hih ding na khempeuh tua hunin amaute kiangah thu ka pia hi.

¹⁹“Tua ciangin Horeb gam panin i ding khia a, TOPA i Pasian in hong thupiak bangin Amor mite mualtung gam zuatna lamkalah note’ muhsa a lian a lauhuai sehnel gam i nawk khit ciangin Kadeshbarnea i tung hi.

²⁰Tua ciangin note’ kiangah, ‘TOPA i Pasian in eite hong piak Amor mite’ mualtung gam na tung khin uh hi.

²¹En un, TOPA na Pasian un note’ mai-ah leitang koihzo hi. TOPA, na pate uh Pasian in note tungah hong gensa bangin paito-in luah un. Lau kei unla, lungkia kei un,’ kong ci hi.

²²“Tua ciangin na vekpi-un ka kiangah nong pai uh a, ‘Eite a dingin gam va enin, i paitoh nading lampi le i zuat ding khuapite hong genkik thei ding eite’ mai-ah mi sawl ni,’ nong ci uh hi.

²³“Tua thu hoihtuak ka sa a, minam khatah khat, note mi sawm le nih kong la hi.

²⁴Amaute kithawi-in mualtung gamah paito uh a, Eshkol kuamah pai-in va en uh hi.

²⁵Amaute in tua gam singgah pawlkhat a khutun hong tawi-in i kiangah hong tunpihsuk uh a, amaute in eite kiangah thu hong zasakkikin, ‘TOPA i Pasian in eite hong piak gam pen leitang hoih ahi hi,’ hong ci uh hi.

²⁶“Ahi zongin note paito nuam loin, TOPA na Pasian un hong thupiak na nial uh hi.

²⁷Na puanbukte uh sungah na phun uh a, ‘TOPA in eite hong mudah ahih manin eite a hong susia ding Amor mite’ khut sungah hong pia dingin Egypt gam panin eite hong paikhiatpih hi.

²⁸Koi lai-ah paito ding ihi hiam? I sanggamte in i lungsim hong siasak khin uh a, “A mite ei sangin lianzaw-in sangzaw uh hi. A khuapite lianin van banin ki-um hi. Tua tham loin Anak mite tua munah ka mu uh hi,” hong ci uh hi,’ na ci uh hi.

²⁹“Tua ciangin note kiangah, ‘Lau kei unla, amaute kihta kei un.

³⁰Egypt gam sungah note’ mit muhah a hih bangin, mi khat in a tapa a puak bangin hih mun na tun matengun lam tawntung ah TOPA na Pasian un note hong puak na muhsa uh sehnel gam a mah bangin, note’ mai-ah a pai TOPA na Pasian un note a dingin hong dosak ding hi,’ kong ci hi.

³²Ahi zongin hih bang thu om hinapi-in, na puanbuk lamna mun ding uh hong lak ding le na pai nading lampi uh hong lak dingin zanin mei, sunin meii tawh note’ mai lampi-ah a pai TOPA na Pasian uh note in na um kei uh hi.

³⁴“TOPA in note’ thu hong za a, a heh suakin kiciam a,

³⁵‘Hih a gi lo khang mite khat beek in, na pate uh tungah piak dinga ka ciam gam hoih na mu kei ding uh a, Jefunneh’ tapa Kaleb bek in tua gam mu ding hi. Amah in a lungsim khempeuh tawh TOPA zui ahih manin amah le a tate tungah ama totsa leitang ka pia ding hi!’ a ci hi.

³⁷Note’ hangin kei tungah zong TOPA heh a, ‘Nang zong tua gamah na pai kei ding hi.

³⁸Nun’ tapa Joshua, nangma mai-ah a ding pa lut ding hi. Amah hanthawn in; bang hang hiam cih leh amah in Israel mite tua gam luahsak ding hi.

³⁹“Tua tham loin galte’ mat suak ding hi, na cih uh na taneute uh le, tuhun laitakin a sia le a pha a khenthei nai lo na tate uh, tua gamah pai ding a, amaute tungah tua gam pia-in, amaute in tua gam luah ding uh hi.

⁴⁰Ahih hangin note ahihleh, kihei unla, San Tuipi lam manawhin sehnel gamah pai un,’ hong ci hi.

⁴¹“Tua ciangin note in kei nong dawng uh a, ‘TOPA’ tungah ka khial khin uh hi. TOPA i Pasian in hong thupiak bang teekteekin paito-in i do ding hi,’ nong ci uh hi. Na milipun na galhiam uh tawh na kithawi uh a, mualtung gamah paitoh ding na baih ngaihsut uh hi.

⁴²“Tua ciangin TOPA in kei kiangah, ‘Amaute kiangah gen in: Note lakah kei om lo ka hih manin kuanto kei unla, do kei un. Tua bangin kuanto le-uhcin na galte uh na lel ding uh hi, ci in,’ hong ci hi.

⁴³Tua ahih ciangin note kiangah kong gen a, note in na ngai nuam kei uh hi. TOPA’ thupiakna na nial uh a, mualtung gamah na kuanto hamtang uh hi.

⁴⁴Tua ciangin tua mualtung gamah a teng Amor mite hong kuanin, Seir gam Hormah ciang dongah khuai bangin hong delhin hong zo uh hi.

⁴⁵Note hong ciahkikin TOPA’ mai-ah na kap uh hi. Ahih hangin TOPA in na aw uh hong ngai loin, a bil zong hong ngat lo hi.

⁴⁶Tua ahih ciangin tua thu hangin ni tampi sung Kadesh munah na om uh hi.