Read Tedim Chin THU HILHKIKNA 10 Bible Online

THU HILHKIKNA 10 - Tedim Chin bible

THU HILHKIKNA 10

¹“Tua hun laitakin TOPA in kei kiangah, ‘A masa-a bangin suangpek nih seekin, mualtung ka kiangah hong pai inla, sing singkuang khat bawl in.

²A masa-a suangpek na sukkhapte’ tunga thute tua suangpeekte tungah ka gelh ding a, singkuang sungah tuate na koih ding hi,’ hong ci hi.

³“Tua ahih ciangin singkha sing tawh singkuang khat bawlin, a masa-a bangin suangpek nih ka seek a, ka khut sungah a peek nihte tawi-in mualtungah ka paito hi.

⁴Kikhop ni-in mei sung panin mualtungah TOPA in note tungah hong gensa thupiak sawmte, a masa-a a kigelh bangin tua suangpeekte tungah amah in gelh a, tua ciangin TOPA in kei tungah tua suangpeekte hong pia hi.

⁵Tua ciangin kihei-in mualtung panin ka paisuk a, ka bawlsa singkuang sungah tua suangpeekte ka koih hi. TOPA in kei hong thupiak bangin suangpeekte tua sungah a om hi.

⁶(Beeroth Benejaakan panin Moserah-ah Israel mite zin uh hi. Tua lai-ah Aaron si a, tua lai munah kivui hi. Ama tangin a tapa Eleazar in siampi na sem hi.

⁷Tua lai panin Gudgodah-ah pai uh a, Gudgodah panin lui tuite a omna gam Jotbathah-ah pai uh hi.

⁸Tua hun laitakin TOPA in, tuni dongin ama na a sem ding le ama min tawh thupha a pia dingin TOPA’ mai-ah dingin, TOPA’ thuciamna singkuang a pua dingin Levi minamte a tuam koih hi.

⁹Tua ahih ciangin a sanggamte uh bangin Levi mite in tanh ahi a, luah ahi zongin nei lo uh a, TOPA na Pasian un amau kiangah a gen bangin TOPA pen amau’ luah ahi hi.)

¹⁰“A masa-a bangin sun sawmli le zan sawmli sung mualtungah ka om a, TOPA in tua hunin zong ka thu hong ngai a, TOPA in note hong susia nawn lo hi.

¹¹TOPA in kei kiangah, ‘Amaute tungah piak dingin a pu a pate uh tungah ka kiciam leitangah pai-in a luah theih nadingun ding inla, na khualzin uh zomin mite mai-ah pai in,’ hong ci hi.

¹²“Israel-te aw, tu-in, TOPA na Pasian uh zahtak ding, ama lampite tot ding, amah it ding, na lungsim khempeuh uh le na nuntakna khempeuh uh tawh TOPA note’ Pasian’ na sep ding,

¹³le nomau’ hoih nadingin tuni-a kong gen thupiaknate le TOPA’ thukhamte zuih ding cih simloh, TOPA na Pasian un note’ tung panin bang dang hong kal ahi hiam?

¹⁴En un, vantung le vantung a sangpente le leitung le a sunga om khempeuh pen TOPA note’ Pasian-a’ ahi hi.

¹⁵Tua hi napi-in TOPA in na pu na pate uh a itna lian mahmah ahih manin tuni-a mah bangin midangte khempeuh sangin amau’ suanlekhakte hong teelzaw hi.

¹⁶Tua ahih ciangin TOPA’ thu mang unla, lungkhauh nawn kei un.

¹⁷Bang hang hiam cih leh TOPA na Pasian uh a lian, a vanglian, a kihtakhuai Pasian, angvan nei loin, sumgolh a la lo, pasian-te’ Pasian, topate’ Topa ahi hi.

¹⁸Amah in pa nei lote le meigong numeite a dingin thutang semin, peemtate itin an le puan a pia hi.

¹⁹Tua ahih ciangin peemtate it un; bang hang hiam cih leh note zong Egypt gamah peemta na hi uh hi.

²⁰TOPA note’ Pasian na zahtak ding uh a, ama na semin, amah beelin, ama min tawh na kiciam ding uh hi.

²¹Amah pen nomau’ phat ding ahi hi. Na mitte un a muhsa hih a lian a kihtakhuai nate note a dingin hong bawlsak pa pen na Pasian uh ahi hi.

²²Na pu na pate uh mihing sawmsagih bek Egypt-ah paisuk uh a, ahi zongin tu-in TOPA na Pasian un vantung aksi zahin note hong tamsak hi.