Read Tedim Chin THU HILHKIKNA 12 Bible Online

THU HILHKIKNA 12 - Tedim Chin bible

THU HILHKIKNA 12

¹“Hihte pen, leitungah na nuntak laiteng uh TOPA, na pu na pate uh Pasian in na neih dingun no hong piaksa gam sungah limtakin na zuih ding uh thukhamte le ngeina kipte ahi hi.

²Na suankhiat ding uh minamte in a biakna mun mual sangte tung le mual neute tung le singniim nuai, mun khempeuh na susia taktak ding uh hi.

³Amaute’ biakna taute phelkhia-in, a biakna songte dengzanin, amaute’ Asherah milimte mei tawh na hal ding uh hi. A kiseek amau’ pasian-te’ limte na phukpai ding uh a, tua mun panin amau’ min na maimangsak ding uh hi.

⁴“Ahih hangin TOPA na Pasian uh tungah tua bangin na hih kei ding uh hi.

⁵TOPA na Pasian un na minam khempeuh uh sung panin ama min koih nadingin teelin, ama omna dinga a bawlna mun na zong ding uh hi.

⁶Tua lai-ah na pai ding uh a, na meihal biaknate uh le na biakpiaknate uh, note in na piak uh sawm-ah-khat le na piak thuahte uh, thuciamna biakpiakna, utthu-a na piakna, na bawnghon tacilte uh le na tuuhon tacilte uh tua lai-ah na paipih ding uh hi.

⁷TOPA na Pasian uh mai tua lai munah na ne ding uh a, TOPA na Pasian un note thupha hong piakna hangin na hihna khempeuh uhah note le na innkuanpihte na lungdam ding uh hi.

⁸“Tua hun ciangin mi khempeuh in ama hoihsak bangin a gamtat ngei ciat bangin na gamta nawn kei ding uh hi.

⁹Bang hang hiam cih leh TOPA na Pasian un note hong piak tawlngakna le luahna-ah na tung nai kei uh hi.

¹⁰Ahih hangin Jordan galkhatah pai-in, TOPA na Pasian un luah dingin note hong piak leitangah tengin, nuamtakin na nuntak theih nadingun na kiim uha na langte khempeuh uh kiang panin tawlngakna hong piak ciangin,

¹¹TOPA na Pasian un ama min om nading munin a teelna munah note kong sawl khempeuh na paipih ding uh hi. Na meihal biaknate uh le na biakpiaknate uh, note in na piak uh sawm-ah-khat le na piak thuahte uh le TOPA’ tungah na ciam uh na thuciam piaknate uh na paipih ding uh hi.

¹²TOPA na Pasian uh mai-ah note le na tapate uh le na tanute uh, na nasem numeite uh le na nasem pasalte uh, le note’ neih bangin tanh ahi a, luah ahi zongin a nei lo na khuasung uha om Levi mite tawh lungdam khawm un.

¹³Na tuahna mun peuh uhah na meihal biaknate uh na piak loh nadingun kingaihsun un.

¹⁴Na minamte uh sung panin TOPA in a teelna mun khatah na meihal biaknate uh pia-in, note kong thupiakte khempeuh tua lai munah na hih ding uh hi.

¹⁵“Ahi zongin, TOPA na Pasian un note tungah hong piak thupha tawh kizui-in na khuapite uh khat peuhpeuh sungah sa na deih zahzah uh go-in na ne thei ding uh hi. Sanang le sakhitalte a kinek mah bangin mi a nin le a siang kideidan loin na ne thei ding uh hi.

¹⁶A si na ne kei bek ding uh hi; tui bangin leitungah a si na bua ding uh hi.

¹⁷Na an uh sawm-ah-khat ahi a, na leenggahzu uh ahi a, na sathau uh ahi zongin, na bawnghon uh le na tuuhonte uh sung pan tacilte ahi zongin, na kiciamna uh ahi na thuciam uh biakpiakna khat peuhpeuh ahi zongin, utthu-a na piakte uh ahi zongin, nomau’ piak thuahte ahi zongin na khuapite uh sungah na ne thei kei ding uh hi.

¹⁸TOPA na Pasian un a teelna munah note le na tapate le na tanute, na nasem numeite le na nasem pasalte, le na khuapite uh sunga om Levi mite in TOPA na Pasian uh mai-ah na ne ding uh hi. Na hihna khempeuh uhah TOPA na Pasian uh mai-ah na lungdam ding uh hi.

¹⁹Na gam sung uhah na ten laiteng uh Levi mite na mangngilh loh nadingun kingaihsun un.

²⁰“No tungah hong ciamsa bangin TOPA na Pasian un na gamgi uh hong sotsak ciangin, sa na duh manun, ‘Sa ka ne ding uh hi,’ na cih uhleh, na duh zahzah uh sa na ne thei ding uh hi.

²¹TOPA na Pasian un ama min koih nadingin a teelna mun pen note kiang panin a gamla lua ahihleh, note kong thupiaksa bangin TOPA in no hong piaksa na bawnghon uh pan ahi a, na tuuhon uh pan ahi zongin khat peuhpeuh na go thei ding uh a, na duh zahzah uh na khuasung uhah na ne thei ding uh hi.

²²Sanang ahi a, sakhital ahi zongin a kinek mah bangin na ne thei ding uh a, mi a nin le a siang kideidan loin a kibangin na ne thei ding uh hi.

²³A si na nek loh ding uh theitel un. Bang hang hiam cih leh si pen nuntakna hi a, nuntakna pen sa tawh na ne khawm kei ding uh hi.

²⁴Si na ne kei ding uh a, tui bangin leitungah na buakhia ding uh hi.

²⁵TOPA’ muhna-ah a manin na gamtat uh ciangin note le note’ khit cianga na tate uh a nopsak theih nadingin si na ne kei ding uh hi.

²⁶Ahih hangin na bat uh a siangtho nate le na thuciamna uh na piaknate uh note in la-in TOPA in a teelna munah na paipih ding uh a,

²⁷TOPA na Pasian uh biakna tau tungah na meihal biakna uh, a sa le a si na pia ding uh hi. Na biakpiakna uh site TOPA note’ Pasian’ biakna tau tungah kibuakhia ding a, ahih hangin a sa na ne thei ding uh hi.

²⁸TOPA na Pasian uh muhna-ah a hoih le a manin na gamtat uh ciangin note le note’ khit cianga na tate uh a nopsak theih nadingin note kong thupiak khempeuh na kin ding uh limtakin ngaihsun un.

²⁹“TOPA na Pasian un na mai panun na suankhiat ding uh minamte beimangsakin, amaute suankhia-in amau’ leitangah na ten uh ciangin,

³⁰na mai uhah amaute a kisuksiat khit ciangin amaute zui-in na awk khak loh nading uh le, ‘Kei zong amau’ hih bangin ka hih theih nadingin hih minamte in a pasian-te uh bangci biak ahi uh hiam?’ ci-in a pasian-te uh thu na kan loh nadingun kingaihsun un.

³¹TOPA na Pasian uh tungah tua bangin na hih kei ding uh hi. Bang hang hiam cih leh TOPA in a muhdah a kihhuai nam khempeuh amaute in a pasian-te uh a dingin hih uh hi. A pasian-te uh a dingin a tapate uh le a tanute nangawn uh mei sungah a hal uh hi.

³²“Note kong thupiak khempeuh na hih ding uh na lim ngaihsut ding uh hi. Na behlap kei ding uh a, zong na khiam kei ding uh hi.