Read Tedim Chin THU HILHKIKNA 13 Bible Online

THU HILHKIKNA 13 - Tedim Chin bible

THU HILHKIKNA 13

¹“Note lakah kamsang khat ahi a, mangman khat ahi zongin hong khangin, lim ahi a, nalamdang ahi zongin hong lak a,

²ama hong gen lim ahi a, nalamdang ahi zongin hong tungin, na theih ngei loh uh, ‘Adang pasian-te’ nung zui-in amaute va bia ni,’ hong cih leh,

³tua kamsangpa’ thu ahi a, mangman pa’ thu ahi zongin na ngai kei ding uh hi. Bang hang hiam cih leh TOPA note’ Pasian na lungsim khempeuh uh le na nuntakna khempeuh uh tawh na it uh hiam cih a kitheih nadingin TOPA na Pasian un no hong ze-etna ahi hi.

⁴TOPA na Pasian uh nung zui-in, amah na zahtak ding uh a, a thupiaknate zui-in a thu na ngai ding uh a, amah bia-in amah na beel ding uh hi.

⁵Ahih hangin tua kamsangpa ahi a, mangman pa ahi zongin kithat ding hi. Bang hang hiam cih leh TOPA na Pasian un na pai nadingun a hong thupiak na nusiat theih nading uh le Egypt leitang panin hong paikhiatpihin salsuahna panin hong honkhia TOPA na Pasian uh langpangin na lehdo nading uh thu hong hilh ahi hi. Tua bangin note’ lak panin siatna na siangkhiasak ding uh hi.

⁶“Na sanggampa ahi a, na tanu ahih kei leh na tapa in ahi a, na ang sunga om na zi ahi a, nangmah banga na ngaihsut na lawm it in ahi zongin nang hong zol simin, leimong khat pan mong khat dong kikalah, nang kiang pan a nai ahi a, a gamla ahi zongin, nang hitaleh na pu na pate hitaleh in a theih ngei loh, na kiima om mite’ pasian-te, ‘Va pai-in pasian dangte va bia ni,’ hong cih leh

⁸ama cih mang loin, a thu ngai loin, amah hehpih loin, amah khahkhong loin, amah na im kei ding hi.

⁹Nangmah in amah na that ding hi. Amah a that dingin nangmah a masa pen na hi ding a, tua khit ciangin midangte khempeuh in hong zui ding uh hi.

¹⁰Salsuahna ahi Egypt gam panin a hong paikhiatpih TOPA na Pasian uh kiang panin note hong paikhiatpih ding ngaihsun ahih manin suang tawh amah na denglum ding uh hi.

¹¹Tua ciangin Israel-te khempeuh in za-in lau ding uh a, hih banga gitlohna note lakah bawlkik ngei nawn lo ding uh hi.

¹²“TOPA na Pasian un tenna dinga hong piak na khuapite uh khat peuhpeuh sungah,

¹³mi ginalo pawlkhat note lakah hong pai-in, ‘Pai-in pasian dangte va bia ni,’ ci-in na theih ngei lohte uh lamah khuapi sunga teng mite a paikhiatpihna na zak uhleh,

¹⁴note in a thu na kan ding uh a, zongin limtakin na dong ding uh hi. Note lakah tua banga a kihhuai-in gamtatna thu a om mah ahih takpi leh,

¹⁵tua khua sunga mite namsau tawh na that ding uh a, khua sunga om mi khempeuh le a ganhingte, namsau tawh na susiamang ding uh hi.

¹⁶Note in van kinusiate khempeuh khua laizang mun awngah khawmin, TOPA na Pasian uh tungah khuapi le van kinusia khempeuh meihal biakna bupin mei tawh na hal ding uh hi. Tua khuapi pen ninkikholna hi tawntung ding a, kilamkik nawn lo ding hi.

¹⁷Tuni-a kong gen ama thupiaknate khempeuh zui-in TOPA na Pasian uh mai-ah a manin gamtatna tawh TOPA na Pasian uh’ aw na ngaih uhleh, na pu na pate uh tungah a ciamsa bangin, a kihtakhuai ama hehna panin TOPA kihei-in note tungah migitna hong lakin, note tungah hehpihna hong nei-in, note tampi tak hong phaksak theih nadingin a ki-apsa na khat beek zong note a dingin na kem kei ding uh hi.