Read Tedim Chin THU HILHKIKNA 14 Bible Online

THU HILHKIKNA 14 - Tedim Chin bible

THU HILHKIKNA 14

¹“Note pen TOPA na Pasian uh mite na hi uh hi. Misite hangin note ki-atkeh loin, na sam uh zong na mettol kei ding uh hi.

²Bang hang hiam cih leh note pen TOPA na Pasian uh tungah a siangtho mite na hi uh a, leitung a om mite khempeuh sung panin ama neih dingin TOPA in note hong teel ahi hi.

³“A kihhuai na khat peuhpeuh na ne kei ding uh hi.

⁴Na nek theih ding uh ganhingte: Bawng, tuu, keel,

⁵sakhital, sanang, simsakhi, sathak, saza, zosakhi, le gamtuu ahi hi.

⁶Ganhingte lak panin a khecin a ka, eknel a hai ganhing peuhmah na ne thei ding uh hi.

⁷Ahi zongin eknel a hai a, a khecin a ka ahi zongin na nek theih loh dingte uh: Kalaoh, bilpi, le sakikhte in eknel a hai hangin a khecin ka lo ahih manin note a dingin a nin ahi hi.

⁸Vok pen a khecin a kat hangin eknel hai lo ahih manin note-a’ dingin a nin ahi hi. Tuate’ sa ne loin, a sisate zong na lawng kei ding uh hi.

⁹“Tui sunga om khempeuh lak panin phe le lip a nei peuhmah na ne thei ding uh hi.

¹⁰Phe le lip a nei lo peuhmah na ne kei ding uh a, tuate pen no-a’ dingin a nin ahi hi.

¹¹“Vasa a siang khempeuh na ne thei ding uh hi.

¹²Ahih hangin na nek loh dingte uh: Muvanlai, musane, luimu,

¹³mupi, mumeika, amau nam ciat;

¹⁴va-ak nam khempeuh;

¹⁵vasa-kalaoh, pengpelep, vatawt, musi nam khempeuh;

¹⁶keising le simbu, gam vatawt

¹⁷le tui vatawt, samuat ne musane le tuimu,

¹⁸gun vapi, gun vazonei nam khempeuh; huihtun le bak ahi hi.

¹⁹“Kha a nei insek ganhing khempeuh no a dingin a nin ahi hi; tuate kine lo ding hi.

²⁰A leng thei insek ganhing a siangte khempeuh na ne thei ding uh hi.

²¹“Ama thu-a a si tawm ganhing peuhmah na ne kei ding uh hi. A nek dingun na khuasung uha om khualmite tungah na pia thei ding uh a, tua ahih kei leh zong gamdang mite tungah na zuak thei ding uh hi. Bang hang hiam cih leh note pen TOPA na Pasian uh tungah a siangtho mi na hi uh hi. “Keelno a pi’ nawizu tawh na huan kei ding uh hi.

²²“A kum kumin na lo uhah a piang, na khaici panun a piang khempeuh sawm-ah-khat na pia ding uh hi.

²³TOPA na Pasian uh na zahtak tawntung nading uh na theih nadingun, ama min a ten nadingin a teelna mun TOPA note’ Pasian’ mai-ah na an uh, na leenggahzu uh, na sathau uh sawm-ah-khat, le na bawnghon uh le na tuuhon tacilte uh na ne ding uh hi.

²⁴TOPA na Pasian un a min koih nadingin a teelna mun pen, TOPA na Pasian un no thupha hong piak ciangin note kiang panin gamla lua a, no a dingin lam a sau luat manin sawm-ah-khat na paipih zawh kei uhleh,

²⁵tuate sum na suah ding uh a, a sumte tunin, TOPA na Pasian un a teelna munah na pai ding uh a,

²⁶na deih peuhpeuh uh bawng ahi a, tuu ahi a, leenggahzu ahi a, khamtheihzu ahi zongin, na duh peuhpeuh uh leina-in a sum na zang ding uh hi. TOPA na Pasian uh mai tua lai munah na ne ding uh a, note le na innkuanpihte uh na lungdam ding uh hi.

²⁷“Note bangin amaute in tanh le luah nei lo ahih manin na khuasung uha om Levi mite na mangngilh kei ding uh hi.

²⁸“Kum thum simin tua kum-a note’ anpiang sawm-ah-khat khempeuh hong paikhiatpihin na khuasung uhah na khol ding uh hi.

²⁹TOPA na Pasian un na sepnate khempeuh uhah thupha hong piak theih nadingin, note tawh kibangin amaute in tanh ahi a, luah ahi zongin nei lo uh ahih manin note’ khua sunga om Levi mite, peemtate, pa nei lote, leh meigong numeite hong pai-in tua ante ne-in a gilvah ding uh hi.