Read Tedim Chin THU HILHKIKNA 15 Bible Online

THU HILHKIKNA 15 - Tedim Chin bible

THU HILHKIKNA 15

¹“Kum sagih a cin simin leiba maisakna na nei ding uh hi.

²Maisak nading zia in: Leitawi a pia mi khempeuh in a vengte tungah leitawi a a piaksate maisak ding hi. TOPA’ maisakna thu kigen khin ahih manin a vengpa, a sanggampa’ tung pan kuamah in leiba siik nawn lo ding hi.

³Gamdang mite’ tung pan na siik thei ding uh a, ahih hangin na sanggamte uh tung panin no-a’ hong bat peuhmah na maisak ding uh hi.

⁴“Ahih hangin tuni-a kong gen hih thupiakna khempeuh zui-in TOPA note’ Pasian’ aw na ngaih nak-uhleh note’ lakah a zawng om lo ding hi (bang hang hiam cih leh TOPA na Pasian un na neih dingun gamhluahin hong piak leitang tungah TOPA in note thupha hong pia ding hi).

⁶Bang hang hiam cih leh TOPA na Pasian un hong ciamsa bangin note thupha hong pia ding a, minam tampi tungah leitawi na pia ding uh a, ahih hangin note in lei na tawi kei ding uh hi. Minam tampite na uk ding uh a, ahih hangin amaute in note hong uk lo ding uh hi.

⁷“TOPA na Pasian un note hong piak gam sunga na khuate uh khat peuhpeuh sungah na sanggam khat uh note lakah a zawng a om leh na lungsim uh khauhsak loin, na sanggam zawng pa uh huh loin na om kei ding uh hi.

⁸Ama tungah na cingh gamtat ding uh a, bangbang hitaleh ama kisap zah na leitawi ding uh hi.

⁹Na lungsim uhah ngaihsutna hoih lo omin, ‘Kum sagihna, maisakna kum hong nai hi,’ ci-in na sanggampa galmi et-in amah bangmah na piak loh uh ciangin na langkhatah TOPA’ tungah amah kiko-in, no tungah khialhna a suahkhak ding kingaihsun un.

¹⁰Citna tawh amah na pia ding uh a, amah na piak uh ciangin lungsim neihna na nei kei ding uh hi. TOPA na Pasian un na sepna na hihna khempeuh uhah hih thu hangin note thupha hong pia ding hi.

¹¹Bang hang hiam cih leh leitang tungah mizawng bei ngei lo ding hi. Tua ahih ciangin, ‘Gam sungah a om na sanggampa, na a kisam mite le mizawngte tungah na cingh mahmah ding uh hi,’ ci-in thu kong pia hi.

¹²“Na sanggampa, Hebru pasal khat ahi a, Hebru numei khat ahi zongin nang tungah hong kizuak leh, amah in nangma na kum guk sung hong sem ding a, a kum sagihna ciangin nang kiang panin a suakta-in na paikhiasak ding hi.

¹³Na kiang panin a suakta-in na paikhiatsak ciangin khuthawm guakin na paisak kei ding hi.

¹⁴Na tuuhon lak, na ancilna le na leenggah sukna panin citna tawh tampi na pia ding a, TOPA na Pasian in nang thupha hong piak zahin amah na pia ding hi.

¹⁵Egypt gamah sila na hihna uh le TOPA na Pasian un note hong suahtaksakna na phawk ding uh hi. Tua ahih manin hih thu tuni-in kong pia hi.

¹⁶“Ahih hangin amah in note nuam hong sa-in, nang le na innkuanpihte hong it ahih manin ‘Nang kiang panin ka paikhia kei ding hi,’ hong cih leh,

¹⁷phimpi khat la-in, kongkhak dapphahin a bil na vut ding a, na sila hi tawntung ding hi. Na sila numei zong tua bangmahin na hih ding hi.

¹⁸Na kiang panin a suakta-in amah na paisak ciangin haksa sa kei in; bang hang hiam cih leh a kicial nasem thaman lang tawh amah in nangma na kum guk sung hong sem khinzo hi. Tua ahih ciangin TOPA na Pasian un na hihna khempeuh uhah thupha hong pia ding hi.

¹⁹“Na bawnghon uh le na tuuhon uh panin tacil a pa khempeuh TOPA note’ Pasian’ tungah na ap ding uh hi. Na bawnghon tacilte uh tawh na na sem kei ding uh a, na tuuhon tacilte uh zong a mul na met kei ding uh hi.

²⁰TOPA in a teelna munah a kum kumin TOPA note’ Pasian’ mai-ah na innkuanpihte uh tawh na ne ding uh hi.

²¹Ahih hangin poina khatpeuh, a khebai a mittaw, ahih kei leh poina lian khat peuhpeuh a neih leh, TOPA note’ Pasian’ tungah biakna-in na pia kei ding uh hi.

²²Na khuasung uhah na ne ding uh hi. Sanang ahi a, sakhi ahi zongin a kinek bangin mi nin le mi siangte in a kibangin ne thei ding uh hi.

²³A si na ne kei bek ding uh a, tui bangin leilakah a si na buakhia ding uh hi.