Read Tedim Chin THU HILHKIKNA 16 Bible Online

THU HILHKIKNA 16 - Tedim Chin bible

THU HILHKIKNA 16

¹“Abib kha tang unla, TOPA na Pasian uh a dingin Paisan Pawi bawl un. Bang hang hiam cih leh Abib kha sungin TOPA na Pasian un Egypt gam panin zanin note hong paikhiatpih hi.

²Tuuhon pan ahi a, bawnghon pan ahi zongin TOPA in ama min om nadingin a teelna munah Paisan Pawi biakpiakna TOPA na Pasian uh tungah na pia ding uh hi.

³Silngo sawh anlum tawh na ne kei ding uh a, ni sagih sung silngo sawh loh anlum, gimna anlum tawh na ne ding uh hi. Egypt gam panin nawhsa-in na taikhia uh hi. Egypt gam panin na taikhiat uh hun na nuntak sung tawntung uh na phawk theih nading uh ahi hi.

⁴Na gam sung khempeuh uhah ni sagih sung note lakah silngo kimu lo ding hi. A ni masa nitakin biakpiakna-ah na piak uh sa khat peuhpeuh zong a zingsang dong zan tawntung na omsak kei ding uh hi.

⁵“TOPA na Pasian un note hong piak khua khempeuhah Paisan Pawi biakpiakna na pia thei kei ding uh hi.

⁶TOPA na Pasian un ama min om nadingin a teelna mun bekah ni a tum khit nitak, Egypt panin na paikhiat uh hunin Paisan Pawi biakpiakna na pia ding uh hi.

⁷TOPA na Pasian un a teelna munah huanin na ne ding uh a, zingsang ciangin na puanbukte uhah na ciah thei ding uh hi.

⁸Ni guk sung silngo sawh loh anlum na ne ding uh a, a ni sagih ni-in TOPA na Pasian uh a dingin a thupi kikhopna khat na nei ding uh hi. Tua ni-in na na sem kei ding uh hi.

⁹“An na lak masak ni uh a kipanin nipikal sagih na simto ding uh hi.

¹⁰Tua ciangin TOPA na Pasian un note thupha hong piakna tawh kizui-in na piak ding uh ahi note’ khutsung panin utthu-a piakna tawh TOPA na Pasian uh tungah nipikal pawi na bawl ding uh hi.

¹¹TOPA na Pasian uh mai, ama min om nadingin TOPA na Pasian un a teelna munah, note a kipan na tanute le na tapate, na nasem numeite le na nasem pasalte, na khua sunga om Levi mite, peemtate, pa nei lote, le note lakah a om meigong numeite tawh na lungdam khawm ding uh hi.

¹²Egypt-ah sila na hihna uh na phawk ding uh a, hih thukhamte zuih ding limtakin na ngaihsun ding uh hi.

¹³“Na ancilna uh le na leenggah sukna panun an na kaihkhop uh ciangin ni sagih sung buk pawi na bawl ding uh hi.

¹⁴Tua pawi sungah nang a kipan na tanute le na tapate, na nasem numeite le na nasem pasalte, Levi mite, peemtate, pa nei lote, le na khua sunga om meigong numeite tawh na lungdam khawm ding uh hi.

¹⁵TOPA in a teelna munah ni sagih sung TOPA na Pasian uh tungah pawi na bawl ding uh hi. Bang hang hiam cih leh note na lungdam khawm theih nadingun na khawhsa uh le na khut uh tawh na sepna khempeuh uhah TOPA na Pasian un note thupha hong pia ding hi.

¹⁶“Amah in a teelna mun, TOPA na Pasian uh mai-ah pasal khempeuh kum khatin thumvei, silngo sawh loh anlum pawi, nipikal pawi, le buk pawi-ah kilaak ding uh hi. Amaute khut hawmguakin TOPA’ mai-ah kilak lo ding uh hi. TOPA na Pasian un note thupha hong piaknasa tawh kizui-in mi khempeuh in ama hih theih bang ciatin pia ding uh hi.

¹⁸“Na minam uh tawh kizui-in TOPA na Pasian un note hong piakna khuate-ah thukhente le uliante na koih ding uh a, amaute in a manin mite tungah thu khen ding uh hi.

¹⁹Thutang na heikhia kei ding uh a, angvan tuam na nei kei ding uh hi. Sumgolh in mipilte’ mit tawsakin thumante’ thu heikhia ahih manin sumgolh na la kei ding uh hi.

²⁰Note nungta-in TOPA na Pasian un hong piak leitang na luah theih nadingun a thuman bekbekin na gamta ding uh hi.

²¹“Note in na bawlsa uh ahi, TOPA na Pasian uh biakna tau kiangah Asherah milim dingin khuam khat peuhpeuh na phut kei ding uh hi.

²²TOPA na Pasian un a muhdah biakna songpi na phut kei ding uh hi.