Read Tedim Chin THU HILHKIKNA 17 Bible Online

THU HILHKIKNA 17 - Tedim Chin bible

THU HILHKIKNA 17

¹“Bawng ahi a, tuu ahi zongin, poina a nei, kisapna khat peuhpeuh a om peuhmah TOPA note’ Pasian’ tungah biakpiakna-in na pia kei ding uh hi. Bang hang hiam cih leh tua pen TOPA note’ Pasian a dingin a kihhuai ahi hi.

²“TOPA note’ Pasian in note hong piak khua khat peuhpeuh sungah numei ahi a, pasal ahi zongin, ama thuciamna palsatin, TOPA na Pasian uh muhna-ah a sia-in a gamtatna kimu-in,

³pasian dangte’ na semin tuate bia ahi zongin, keimah in ka kham ahi ni ahi a, kha ahi a, vantung na khat peuhpeuhte’ na semin bia ahi zongin,

⁴no kiangah hong kigenin tua thu na zak uhleh, note in limtakin na kantel ding uh a, Israel-te sungah tua bang a kihhuai na a kigamtatna thu a om mah ahih takpi leh,

⁵numei ahi a, pasal ahi zongin tua banga a sia-in a gamta mi pen na khua pua uhah na paipih ding uh a, tua numei ahi a, pasal ahi zongin suang tawh na denglum ding uh hi.

⁶Teci nih ahih kei leh thum bang genna tawh a si ding pa kithat ding a, teci khat bek thugenna tawh mi kithat lo ding hi.

⁷A that dingin tecite masa ding a, tua khit ciangin midang khempeuh in hih ding uh hi. Tua bangin note’ sung panin hoih lohna na siangsak ding uh hi.

⁸“Mi khatlekhat kithah khakna, khatlekhat thu kituhna, mi khatlekhat kisatna, note a dingin a haksalua thu khat peuhpeuh note’ khua sungah khen ding hong om leh, note kithawi-in TOPA na Pasian un a teelna mun,

⁹Levi siampite le tua huna thukhente kiangah pai-in thu na dong ding uh a, amaute in note kiangah thukhen nading hong gen ding uh hi.

¹⁰Tua ciangin TOPA in a teelna mun panin note’ tungah hong gen bangun na hih ding uh hi. Amaute in note tungah hong lah bangin limtakin na hih ding uh na ngaihsun ding uh a,

¹¹amaute in note tungah hong piak thuhilhna le note tungah hong gen uh thukhensatna tawh kizui-in na hih ding uh hi. Amaute in note tungah hong gen bang teekteekin na hih ding uh hi.

¹²TOPA note’ Pasian’ mai-ah nasem dingin a ding siampipa’ thu ahi a, thukhen pa’ thu ahi zongin man lohna tawh a khengvala a gamta mi peuhpeuh kithat ding hi. Tua bangin Israel-te’ sung panin hoih lohna na siangsak ding uh hi.

¹³Tua hileh mi khempeuh in za-in, kihta-in, a khengvalin gamta ngam nawn lo ding uh hi.

¹⁴“TOPA na Pasian un note hong piak leitangah tungin, note in tua leitang nei-in a tungah na ten uh ciangin, ‘Eite’ kimkota om minamte khempeuh mah bangin eite’ tungah kumpi khat i koih ding hi,’ na ci nuam kha ding uh hi.

¹⁵TOPA note’ Pasian in a teel mipa note’ tungah kumpi-in na koih thei takpi ding uh hi. Ahi zongin na mipihte bek uh lak panin kumpi-in mi khat na koih ding uh a, na sanggam uh ahi lo gamdang mi khat no’ tungah na koih thei kei ding uh hi.

¹⁶Amah in ama aituam dingin sakol tampi nei lo ding hi. TOPA in no kiangah, ‘Hih lampi tawnin na kilehkik ngei kei ding uh hi,’ hong ci ahih manin, amah in sakolte a lei dingin Egypt gamah mite paisak lo ding hi.

¹⁷A lungsim heikhia kha ding ahih manin zi la thuah lo ding a, ama a dingin ngun le kham zong nakpitakin behlap lo ding hi.

¹⁸Ama kumpi tokhom tungah a tut ciangin Levi siampite’ kep hih thukhamte ama a dingin laibu khat sungah gelh ding hi.

¹⁹Hih thukham sunga thute le hih ngeinate kemin zuihna tawh TOPA a Pasian zahtak ding a theih nading, a mipihte tungah ama lungsim a kiliatsak loh nading, thupiaknate them khat zong a pelh loh nading, le Israel-te sung ahi ama kumpi gam sungah amah le a tate saupi a om theih nadingin amah in a nuntak sung tawntung tua sunga thute sim ding hi.