Read Tedim Chin THU HILHKIKNA 18 Bible Online

THU HILHKIKNA 18 - Tedim Chin bible

THU HILHKIKNA 18

¹“Siampi ahi Levi minam khempeuh in Israel-te bangin tanh ahi a, luah ahi zongin nei lo ding uh a, amaute in TOPA’ tungah mei tawh kihal biaknate le a kaih ngeite uh ne ding uh hi.

²Amaute in a sanggamte uh lakah gamhluah nei lo ding uh a, amah in amaute tungah a ciam mah bangin TOPA pen amaute’ luah ahi hi.

³“Bawng hitaleh tuu hitaleh biakna-in a pia mite’ tung panin siampite’ kaih dingte: Amaute in siampite’ tungah a liang le a paang nihte le a gilpi pia ding uh hi.

⁴Na anpal, na leenggahzu, na sathau, le na meet masak uh na tuumul uh na pia ding uh hi.

⁵Bang hang hiam cih leh Levi minamte TOPA’ na a sem tawntung dingin na minam khempeuh uh sung panin TOPA na Pasian un a teel ahi hi.

⁶“Levi mi khat, Israel-te sung na khuapi uh khat peuhpeuh ahi ama tenna panin ama ut hun peuh ciangin TOPA’ teelna munah hong pai thei ding hi.

⁷Tua ciangin TOPA’ mai-ah nasem dingin a om a lawm Levi midangte khempeuh mah bangin TOPA a Pasian’ min tawh na sem thei ding hi.

⁸Amah in a gamhluah a zuakna pan a sum ngahte banah nek ding a kikimin amaute tawh tanh ngahkhawm ding hi.

⁹“TOPA na Pasian un note hong piak leitangah na tun uh ciangin, tua minamte’ gamtatna a kihhuaite zuih ding na kisin kei ding uh hi.

¹⁰Note lakah a tanu ahi a, a tapa ahi zongin biakna-in a zang, ai a saan, khong a khai, mailam thu a gen, ai a tawi,

¹¹bum a zang, van a kah, sikhate tawh a kiho, sikha thu a dong kuamah na om kei ding uh hi.

¹²Bang hang hiam cih leh hihte a hih mi peuhmah TOPA a dingin a kihhuai ahi hi. Hih bang a kihhuai gamtatnate hangin note’ mai panin TOPA na Pasian un amaute hawlkhia hi.

¹³Note pen TOPA na Pasian uh mai-ah paubaang loin na om ding uh hi.

¹⁴Bang hang hiam cih leh note in na suankhiat ding uh hih minamte in khongkhaite le aisante thu ngai uh hi. Ahih hangin note ahihleh tua bangin na gamtat ding uh TOPA na Pasian un hong phal lo hi.

¹⁵“TOPA na Pasian un note lak ahi na sanggamte uh lak panin note a dingin kei tawh a kibang kamsang khat hong khangsak ding hi. Note in ama thu na ngai ding uh hi.

¹⁶“Note in, ‘Si kha ding ka hih manun TOPA kote’ Pasian’ aw hong zasakkik kei in. Hih a lian mei zong hong musak nawn kei in,’ ci-in na kikhop ni-un Horeb-ah TOPA na Pasian uh tung pan na deih bang uh hi ding hi.

¹⁷TOPA in kei kiangah, ‘Amaute’ hong ngetna thuman taktak hi.

¹⁸Amau sanggamte lak panin nang tawh a kibang kamsang khat amaute a dingin ka khangsak ding hi. Ama gen dingte ka hilh ding a, amah ka thupiak khempeuh amaute tungah a gen ding hi.

¹⁹Amah in keima min tawh a gen ka thute a don lo mi peuhmahte kei mahmah in ka thuk ding hi.

²⁰Ahih hangin keimah in thugen dingin thu pia lo napi-in keima min tawh thu a gen ngam kamsangpa hitaleh pasian dangte’ min tawh thu a gen pa hitaleh, tua bang mite si ding hi,’ hong ci hi.

²¹“Na lungsim sung uhah, ‘TOPA’ gen ahi lo thu bangci theih ding ihi hiam?’ na cih uhleh,

²²kamsang khat in TOPA’ min tawh thu genin, tua thu pen hong tung lo ahi a, a man lo ahi zongin hong hih leh, tua thu pen TOPA’ gen loh thu ahi hi. Kamsangpa in ama utthu a gen hi a, amah na kihtak ding uh kul lo hi.