Read Tedim Chin THU HILHKIKNA 19 Bible Online

THU HILHKIKNA 19 - Tedim Chin bible

THU HILHKIKNA 19

¹“TOPA na Pasian un amaute’ leitang note hong piak minamte beisakin, note in amaute suankhia-in, amaute’ khuapite le innte-ah na ten uh ciangin,

²TOPA na Pasian un note’ neih dingin hong piak gam sungah note a dingin khuapi thum na tuamkoih ding uh hi.

³Mi a thatkha peuhpeuh a tai theih nadingin TOPA na Pasian un na neih dingun a hong piak leitang seh thumin khenin seh khat sungah khuapi khat ciat koihin a lampite na puah ding uh hi.

⁴Mi khat sing a phuk dingin a vengpa tawh gamlakah pai-in, sing a phuk dingin a khut tawh a hei vaanin, a heitang a ga panin kikhongin a vengpa kha-in a sih bang danin, mi khat in sawm lohpi, a beisa hunah amah tawh kigal neihna om lopi-in a vengpa a sihsak khak leh, hih khuapite khat peuhpeuhah amah tai-in a nuntakna hu thei ding hi.

⁶Tua bang hikeileh, amah in a beisa hunah a vengpa tawh kigal neihna nei lo ahih manin sih nading thu om lo napi-in, a hehna tawh phula nuampa in mi that khapa delhin lampi a gamlatna hangin amah pha-in a si dingin liamsak kha ding hi.

⁷Tua ahih ciangin, khuapi thum tuamkoih un, ci-in note thu a hong pia ka hi hi.

⁸“Note in TOPA na Pasian uh itin, ama lampi zuih tawntungna tawh tuni-a kong gen hih thupiakna khempeuh limtakin na zuih uh a, amah in na pu na pate uh tungah a kiciam mah bangin TOPA na Pasian un na gamgite uh hong keeksakin, na pu na pate uh piak dingin a ciam leitang note tungah hong piak leh, hih khuapi thum banah khuapi thum mah na behlap ding uh hi.

¹⁰Tua hikeileh TOPA na Pasian un luah dingin note hong piak leitang tungah mawhbaang lo mi kithat kha ding a, tua mi thahna hanga mawhna note’ tungah hong tu ding hi.

¹¹“Ahih hangin mi khat in a vengpa mudahin, amah pangsim a, amah satin liamsakin a sihsak a, tua mipa hih khuapi khat peuhpeuhah a tai leh,

¹²ama khua upate in amah hong puakin hong paipih ding uh a, a sih theih nadingin phulapa tungah ap ding uh hi.

¹³Note na nopsak theih nadingun amah hehpih loin, Israel-te sung panin mi that pa na beisak ding uh hi.

¹⁴“TOPA na Pasian un na neih dingun hong piak leitang tungah note’ kep ding na gamhluahna sung uhah khanglui mite in a phuhsa na vengte’ gisuang na khin kei ding uh hi.

¹⁵“Mi khat in a hihkhak mawhna lian ahi a, khialhna khat peuhpeuh a gamtatna-ah ahi zongin tua mipa’ langah teci khat guak kicing lo ding a, teci nih ahih kei leh teci thum bang thugenna tawh mawhsakna kikipsak bek ding hi.

¹⁶Elna lungsim a nei teci khat in mi khat gamta khial hi, ci-in a mawhsak leh,

¹⁷thuneite a langnih tuakin, tuahun laitak a siampite le thukhente’ mai, TOPA’ mai-ah pai ding uh hi.

¹⁸Thukhente in limtakin kan ding uh a, teci pa pen zuau teci hi-in, a man lopi-in a sanggampa a mawhsak ahihleh,

¹⁹a sanggampa tungah amah in hih dinga a sawm bang teekin ama tungah na hih ding uh hi. Tua bangin note sung panin gitlohna na siangsak ding uh hi.

²⁰Tua hileh a omlai mite in za-in lau ding a, note lakah tua bang gitlohna bawlkik ngei nawn lo ding uh hi.

²¹Amah na hehpih kei ding uh hi. Nuntakna tang ding nuntakna, mit tang ding mit, ha tang ding ha, khut tang ding khut, khe tang ding khe na hisak ding uh hi.