Read Tedim Chin THU HILHKIKNA 2 Bible Online

THU HILHKIKNA 2 - Tedim Chin bible

THU HILHKIKNA 2

¹“Tua ciangin TOPA in kei tungah hong gen bangin eite kihei-in San Tuipi lam manawhin sehnel gamah i pai a, ni tampi sung Seir Mual tung gamah i pai kawikawi hi.

²“Tua ciangin TOPA in kei tungah,

³‘Hih mual kiimah sauvei khop na pai khinta uh hi; leilu lamah kihei un.

⁴Mite’ tungah hih bangin thu pia in: Seir gamah a teng Esau’ suanlekhak, na behte uh gam sung a nawk ding na hi uh hi. Amaute in note hong kihta ding uh hi. Ahi zongin note kidawm un.

⁵Amaute tawh kisel kei un; bang hang hiam cih leh amau’ leitang themkhat zong no kong pia peuhmah kei ding hi. Esau’ neih dingin ama tungah Seir Mual pia khin ka hih manin khe a ta khopzah zong no kong pia kei ding hi.

⁶Na nek ding uh an amaute’ tung panin sum tawh na lei ding uh a, na dawn ding uh amau’ tui zong sum mah tawh na lei ding uh hi.

⁷“‘Bang hang hiam cih leh na sepna khempeuh uhah TOPA na Pasian un note thupha hong pia hi. Hih a zai sehnel gam na paina uh amah in hong thei hi. Hih kum sawmli sung TOPA na Pasian uh no tawh hong om hi. Bangmah na kisam kei uh hi, ci-in gen in,’ hong ci hi.

⁸“Tua ahih ciangin Seir gamah a teng Esau’ suan i behte, le Elath le Eziongeber khua pan hong kipan Arabah lampi panin i paikhia suak hi. “Tua ciangin eite kihei-in Moab gam lamah i pai hi.

⁹TOPA in kei kiangah, ‘Amau’ leitang na neih dingun note’ tungah hong pia lo ding ka hih manin Moab mite gimsak kei unla, amaute tawh galin kido kei un; bang hang hiam cih leh a neih dingun Lot’ suanlekhakte tungah Ar khua ka piazo hi,’ hong ci hi.

¹⁰(Anak mite zahin a tun a sang, a lian, a tam Emim mite tua lai-ah teng ngei hi.

¹¹Anak mite mah bangin amaute zong Refaim mite kici a, ahih hangin Moab mite in Emim ci uh hi.

¹²Hor mite zong Seir-ah nidangin teng ngei a, ahih hangin TOPA in amaute’ tungah a piak amau’ leitang tungah Israel mite in a hih mah bangin, Esau’ suanlekhakte in amaute suankhia-in susia uh a, amau’ munah teng uh hi.)

¹³“Tua ciangin TOPA in, ‘Tu-in ding unla Zered lui kantan un,’ hong cih bangin Zered lui i kantan hi.

¹⁴Amaute tungah TOPA a kiciam mah bangin galsim mi ahi tua khangmite khempeuh gam sungah a sih khit dong ahi, Kadeshbarnea i nusiat a kipan Zered lui i kantan dong kikal kum sawmthum le kum giat ahi hi.

¹⁵Amaute a bei khit mateng gamlakah amaute a susia dingin TOPA langpang takpi hi.

¹⁶“Tua ahih ciangin mihingte lak panin galsim mite bei-in a sih khit ciangin

¹⁷TOPA in kei kiangah,

¹⁸‘Tuni-in Ar khua san takah Moab gamgi a kantan ding na hi uh hi.

¹⁹Ammon mite’ leitang na neih dingun khat zong hong pia lo ding ka hih manin, Ammon mite’ gamgi na nai uh ciangin amaute gimsak kei unla, amaute tawh kido kei un; bang hang hiam cih leh a neih dingun Lot’ suanlekhakte tungah ka pia khin hi,’ hong ci hi.

²⁰(Tua pen Refaim gamgi ci-in zong kithei ngei hi. Refaim mite tua lai-ah teng ngei a, ahih hangin Ammon mite in amaute pen, Anak mite bangin lianin a tun a sang ahi Zamzummim mite ci uh hi. Ahih hangin TOPA in amaute’ mai-ah tua mite susia hi. Amaute in tua mite suankhia uh a, amau’ munah teng uh hi.

²²Amah in Seir-ah a teng Esau’ suanlekhakte a dingin amaute’ mai-ah Hor mite a suksiat mah bangin amaute in tua mite susia-in tuni dongin amau’ munah teng uh hi.

²³Gaza ciang dong khuaneute-ah a teng Avvim mite ahihleh Kaftor pana hong pai Kaftor mite in susia-in amau’ munah teng uh hi.)

²⁴“Moab gam sung i khen’ ciangin TOPA in, ‘Ding un, na khualzin uh kipan unla, Arnon kuam kantan un. En un, Heshbon kumpipa, Amor mi Sihon le ama leitang note’ khut sungah kong piazo hi. Amah suankhiat ding kipan unla, gal sungah amah tawh kido un.

²⁵Nomau’ thu za-in note’ hangin lingin a gim ding ahi, mun khempeuhah a om mite’ tungah note hong kikihtakna le note’ hanga launa ka tunsak ding tuni-in ka kipan ding hi,’ hong ci hi.

²⁶“Tua ahih ciangin Kedemoth sehnel gam panin Heshbon kumpipa Sihon’ kiangah kilemna ding thu genin kamtai ka sawl a,

²⁷‘Na gam sung hong nawksak in. Lampi bekah ka pai ding uh a, taklam ahi a, veilamah ahi zongin ka pial kei ding uh hi.

²⁸Ka nek ding uh an sum tawh lei dingin nong zuak ding a, ka dawn ding uh tui sum tawh lei dingin nong pia ding hi. Khe tawh hong nawksak bek in.

²⁹Jordan kantanin TOPA ka Pasian un kote hong piak leitangah ka tun matengun Seir-a a teng Esau’ suante le Ar-a a teng Moab mite in kei hong paisak mah bangun hong paisak in,’ ka ci hi.

³⁰“Ahih hangin Heshbon kumpipa Sihon in eite hong paisak lo hi; bang hang hiam cih leh tuhuna mah bangin na khutsung uhah amah hong piak theih nadingin TOPA na Pasian un a lungsim khauhsakin, amah paupeengsak hi.

³¹“Tua ciangin TOPA in kei kiangah, ‘En in, Sihon le a leitang nang tungah piak kong kipan khinzo hi. Ama leitang na luah theih nadingin suankhiat kipan in,’ hong ci hi.

³²Tua ciangin Sihon le a mite khempeuh eite a do dingin Jahaz-ah hong pai uh hi.

³³TOPA i Pasian in amah hong pia a, amah le a tapate le a mi khempeuh i zo hi.

³⁴Tua hunin a khuapi khempeuh i la a, a khuapi khempeuh, papi, nupi, le naupangte i susia maimang a, bangmah i siit kei hi.

³⁵I laksa a khuapi sunga van kinusiate tawh a ganhingte uh eima a dingin i la bek hi.

³⁶Arnon kuam mong a a om Aroer le tua kuam sunga om khuapi Gilead ciang dongah eite a dingin khuapikulh a sanglua khat beek om lo a, TOPA i Pasian in a vekpi-in eite’ khut sungah hong pia hi.

³⁷Ammon mite’ leitang ahi Jabbok gun pang khempeuh le mualtung gam khuapite le TOPA eite’ Pasian in hong khamna munte bek i va neh kei hi.