Read Tedim Chin THU HILHKIKNA 21 Bible Online

THU HILHKIKNA 21 - Tedim Chin bible

THU HILHKIKNA 21

¹“TOPA na Pasian un note’ neih dingin a hong piak leitangah mi khat kithatin gamlakah lum a, a that a kitheih kei leh,

²na upate uh le na thukhente uh hong paikhia-in, a kithat mipa’ omna kiima khuapite a gamlatna teh ding uh hi.

³Tua ciangin a kithat mipa’ omna tawh a kinai pen khuapi upate in a kisin nai lo, kol a kai nai lo bawngla khat la ding uh hi.

⁴Tua khuapi upate in a kikho nai lo, khaici a kivawh nai lo, tuiluang a omna kuam khatah a bawngla paipihsuk ding uh a, tua kuam sungah a bawngla ngawng attan ding uh hi.

⁵TOPA na Pasian un Levi mi siampite ama na a sem ding le TOPA’ min tawh thupha a pia dingin teelkhia ahih manin amaute hong pai ding uh a, kithuneihna le kitotna peuhmah amau’ thu tawh kivengsak ding hi.

⁶A kithat mipa tawh a kinai pen khuapi upate khempeuh in kuam sunga a ngawng a kitan bawngla tungah a khut uh sil ding uh a,

⁷amaute in teci pangin, ‘Kote in hih mipa ka that kei uh a, a kithahlam zong ka thei kei uh hi.

⁸TOPA aw, na hotkhiatsa Israel mite’ mawhna hong maisak inla, mawhna nei lo mipa a kithahna hanga mawhna na Israel mihingte hong thuaksak kei in. Mi thahna hanga mawhna pan hong maisak in,’ ci ding uh hi.

⁹TOPA’ muhna-ah a manin na gamtat uh ciangin note lak panin mawhna nei lo mi thahna hanga mawhna tua bangin na siangsak ding uh hi.

¹⁰“Na galte uh a do dingin kuan khia-in, TOPA na Pasian un note’ khut sungah amaute hong pia a, amaute salin na mat ciangun,

¹¹salte lakah numei a melhoih khat mu-in, tua nu deihin na zi dingin na lak nop leh,

¹²na inn-ah tua numei na ciahpih ding a, amah in a lu metin a cinte tan ding hi.

¹³Amah in sal hihna puan suahkhia-in, na inn-ah om ding a, a nu le a pa’ hangin kha khat bit sung kap ding hi. Tua khit ciangin amah na luppih thei pan ding a, nang pen ama pasal hi-in, amah pen na zi hi ding hi.

¹⁴Tua ciangin, amah na deih nawn kei leh, ama utna peuhah na paisak ding hi. Ahih hangin amah daisak khin na hih manin sumin amah zuak loin, sila bangin na bawl kei ding hi.

¹⁵“Mi khat in zi nih nei a, khat itin a khat mudah a, a it leh a muhdah a zi tegel in ta nei tuakin, tapa a neih cil pen a muhdah nu tawh a neih ahihleh,

¹⁶a tapate tungah gamhluah dingin ama neihsa a hawm ciangin, a muhdah nu’ tapa cil sangin deihzawkna hangin a it nu’ tapa pen a ta cil-in bawl thei lo ding hi.

¹⁷Ama neihsa khempeuh tanh nih piakna tawh a muhdah nu’ tapa a tacil mahin sang ding hi. Bang hang hiam cih leh tua pa pen ama sung panin a piang masa pen ahih manin tacil hihna za pen ama a’ ahi hi.

¹⁸“Mi khat in a lungkhauh, a langpang thei, a nu’ thu ahi a, a pa’ thu ahi zongin a mang lo, a tai hangun amau’ thu a ngai lo tapa khat a neih leh,

¹⁹a nu le a pa in tua mipa manin ama khuapi upate kiang, a tenna mun kongpi-ah paipihin,

²⁰amaute in a khuapi upate kiangah, ‘Hih ka tapa uh lungkhauhin hong langpang thei a, amah in ka thu uh hong mang lo a, an hai, zu hai bek ahi hi,’ ci ding uh hi.

²¹Tua ciangin khuapi pasal khempeuh in suang tawh amah denglum ding uh hi. Tua bangin note’ sung panin siatna na siangsak ding uh hi. Tua hileh Israel-te khempeuh in za-in lau ding uh hi.

²²“Mi khat in sihna thuak theih nading mawhna bawlin amah kithat a, sing tungah na khai uhleh,

²³zan tawntung sing tungah ama luang na omsak kei ding uh a, a ni mahin na phum ding uh hi. Bang hang hiam cih leh khuam tungah a kikhai siluang hawm pen Pasian in muhthadah sa hi. TOPA na Pasian un luah dingin note hong piak na leitang uh na ninsak kei ding uh hi.