Read Tedim Chin THU HILHKIKNA 22 Bible Online

THU HILHKIKNA 22 - Tedim Chin bible

THU HILHKIKNA 22

¹“Na mipihte’ bawngtal ahi a, a tuu ahi zongin a gammang na muh uhleh huh loin na om kei ding uh hi. A nei pa kiangah na ciahpih kik ding uh hi.

²Amah na veng nai uh hi lo a, a nei na theih kei uhleh, na inn uhah a gan ciahpihin a nei pa in hong zon mateng na kem ding uh a, hong zon ciangin na piakik ding uh hi.

³Tua bangin a la, a puan, a mangsa na muh, na mipihte’ na a mang khat peuhpeuh na hih ding uh a, huh loin na om kei ding uh hi.

⁴“Na mipihte’ la ahi a, a bawngtal ahi zongin lam gei-ah a kia na muh uhleh, tuate huh loin na om kei ding uh a, tuate phottohsakkikna tawh na huh ding uh hi.

⁵“Numei in pasal puan khat peuhpeuh silh lo ding a, pasal in zong numei puan silh lo ding hi. Bang hang hiam cih leh hih bangin a gamta peuhmah TOPA na Pasian uh tungah a kihhuai ahi hi.

⁶“Vasabu khat, sing tung ahi a, leilakah ahi zongin, a no ahi a, a tui ahi zongin omin, a pi in a no a ompih ahi a, a op ahi zongin na muh khak zenzen uhleh, a pi pen a no tawh na la khawm kei ding uh hi.

⁷A pi na khah ding uh a, a no na la thei ding uh hi. Hih bang gamtatna pen na nopsak nading uh, sauveipi na nuntak theih nading uh ahi hi.

⁸“Na inn tung panun mi khat kia-in mi sihna hanga mawhna na innsung uhah na tunsak khak loh nadingun inn thak na lam uh ciangin na innkhumzang uhah tangban na khung ding uh hi.

⁹“Na leenggui lo uhah khaici nam nih na vawh kei ding uh hi. Vawh le-uh cin na vawh uh an le na leenggui lo uhah a piang khempeuh a nin suak ding hi.

¹⁰“Bawngtal khat le la khat tawh lo na khokhawm kei ding uh hi.

¹¹“Samul le khau a kigankhawm puan na silh kei ding uh hi.

¹²“Na puanza uh kiu lite tungah puanmongteep na bawl ding uh hi.

¹³“Mi khat in zi la-in, amah a luppih khit ciangin amah mudahin,

¹⁴a zumhuai gamtatna tawh tua nu mawhsakin, ‘Keimah in hih numei ka la a, amah tawh ka lupkhop ciangin ama sungah nungakna lim ka mu kei hi,’ cihna tawh tua nu tungah minsia a tut leh,

¹⁵tua numei’ nu le a pa in a tanu uh’ nungakna lim a kilatna puan lakhia-in upate kiang kongpi-ah paipih ding uh hi.

¹⁶Numei’ pa in upate kiangah, ‘Hih mipa tungah a zi dingin ka tanu ka pia a, amah in deih nawn lo a,

¹⁷“Na tanu’ sungah nungakna lim ka mu kei hi,” cihna tawh a zumhuai-in amah mawhsak hi. Ahi zongin hihte pen ka tanu’ nungakna a kilatna limte ahi hi,’ ci-in a puan lak ding hi. Amaute in khua upate mai-ah a puan phah ding uh hi.

¹⁸Tua ciangin tua khua upate in tua mipa la-in sat ding uh hi.

¹⁹Amaute in ngun shekel zakhat liausak ding uh a, a numei’ pa’ tungah tuate pia ding uh hi. Bang hang hiam cih leh amah in Israel nungak tungah minsia tun hi. Tua ciangin a numei pen ama zi mah hi ding a, a nuntak laiteng tua nu ma thei lo ding hi.

²⁰“Ahih hangin a mawhsakna thumanin, numei sungah nungakna lim a kimuh kei takpi leh,

²¹amaute in a pa’ inn kongah a numei paipih ding uh a, ama khuapi pasalte in suang tawh amah denglum ding uh hi. Bang hang hiam cih leh amah in a pa’ inn sungah paktat gamtatna tawh Israel sungah haina tun hi. Tua bangin note’ lak panin siatna na siangsak ding uh hi.

²²“Mi khat, midang khat’ zi tawh a lumkhawm a kimuh leh, numei tawh a lum pa le a numei, a nih tuakun kithat ding hi. Tua bangin Israel sung panin siatna na siangsak ding uh hi.

²³“A kidongsa nungak khat om a, mi khat in khuapi sungah tua nu tuakin amah tawh a lupkhop leh,

²⁴tua khuapi kongpi-ah amau tegel na paipih ding uh a, a numei khuapi sungah a om hinapi-in mi’ huhna ngen dingin a kiko lohna hang le, tua pasal in a vengpa’ zi a va suksakna hangin, suang tawh a nihun na denglum ding uh hi. Tua bangin note’ lak panin siatna na siangsak ding uh hi.

²⁵“Ahih hangin mi khat in a kidongsa nungak khat gamlakah tuakin, mipa in tua nu buanin a luppih leh, tua numei tawh a lum mipa bek kithat ding hi.

²⁶A numei’ tungah bangmah na hih kei ding uh hi. Numei’ tungah sih nading mawhna om lo hi. Bang hang hiam cih leh hih thu pen mi khat in a vengpa do-in a thah tawh kibang hi.

²⁷Hih mipa in gamlakah numei hih ahih manin, a kidongsa numei in huhna ngen dingin a kiko hangin amah a hon ding kuamah om lo hi.

²⁸“Mi khat in a kidong nai lo nungak khat tuakin, tua numei buanin luppih a, amau tegel a kimuh leh,

²⁹numei tawh a lum pa in nungak’ pa tungah ngun shekel sawmnga pia ding a, tua numei ama zi hi ding hi. Bang hang hiam cih leh amah in a numei va su khin hi. A nuntak laiteng tua numei ma thei lo ding hi.

³⁰“Mi khat in a pa’ zidangte tenpih lo ding a, a pa-a’ ahi numei tawh mawh lo ding hi.