Read Tedim Chin THU HILHKIKNA 24 Bible Online

THU HILHKIKNA 24 - Tedim Chin bible

THU HILHKIKNA 24

¹“Mi khat in zi la-in a tenpih ciangin, tua nu tungah kilawm lohna a om manin numei in a pasal’ mitah maipha mu lo a, amah in makna lai gelhin ama tungah pia-in ama inn panin sawlkhia a, a pasal’ inn panin amah kihem khia-in,

²amah pai-in midang khat’ zi va suak a,

³a pasal nunung in amah deih lo leuleu a, makna lai gelhin a numei’ khut sungah koih a, a inn panin tua nu sawlkhia-in, tua ahih kei leh zi dinga a la a pasal nunung a sih leh,

⁴tua numei a hawlkhia a pasal masa in, tua nu a kinitsak khit ciangin a zi dingin lakik thei nawn lo ding hi. Bang hang hiam cih leh tua pen TOPA’ mai-ah kihhuaina hi a, TOPA note’ Pasian un luah dingin hong piak leitang tungah mawhna na tunpih kei ding uh hi.

⁵“Mi khat in zi a neih tungin galkapte tawh kuankhia lo ding a, nasep khat peuhpeuh zong kisawl lo ding hi. A laksa a zi tawh a lungdam khawm dingin inn-ah kum khat sung maang ding hi.

⁶“Kuamah in an gawina ahi a, an gawina suangpek a tungnung ahi zongin khapna-in la lo ding hi. Bang hang hiam cih leh khapna-in nuntakna a la suak ding hi.

⁷“Mi khat in Israel mi a sanggamte khat gu-in, amah in sila bangin a bawl ahi a, a zuak ahi zongin a kimuh leh, tua guta pa kithat ding hi. Tua bangin note’ lak panin siatna na siangsak ding uh hi.

⁸“Phaknatna hong tun ciangin Levi siampite in hong gen bangin na gamtat ding uh ngaihsun un. Amaute ka thupiakna bangin na gamtatna dingun na kingaihsun ding uh hi.

⁹Egypt panin na paikhiat lai-un lampi-ah TOPA na Pasian un Miriam’ tungah a hihna phawk un.

¹⁰“Na vengte uh tungah na khat peuhpeuh leitawi na piak uh ciangin ama hong khapna a la dingin a inn-ah pai kei un.

¹¹A pualamah na ding ding uh a, leitawi na piakna mipa in nang kiangah a na khap hong paipih ding hi.

¹²Amah mizawng ahihleh ama hong khap puan na zantaamsak kei ding uh a,

¹³ni a tum ciangin, a puanza silhin nang thupha hong piak theihna dingin tua hong na khap ama kiangah na piakik ding uh hi. Tua pen TOPA note’ Pasian’ mai-ah note a dingin thumanna hi ding hi.

¹⁴“A zawng a cimawh a kicial nasempa, na sanggamte khat ahi a, na gam sung na khuapite sunga om peemta khat peuhpeuh ahi zongin, na nengniam kei ding uh hi.

¹⁵A sep ni-in ama thaman, nitum ma-in na pia ding uh hi (bang hang hiam cih leh amah zawng a, tua bek a lungsimah om hi). Tua hikeileh TOPA’ tungah amah in hong khia ding a, note na mawh ding uh hi.

¹⁶“Tate’ tangin pate kithat lo ding a, pate’ tangin zong tate kithat lo ding hi. Mi khempeuh ama khialhna hang bekin kithat ding hi.

¹⁷“Peemta’ thu ahi a, pa nei lo mi’ thu ahi zongin tuate a’ ding thutang na heisak kei ding uh a, meigong numei’ puan zong khapna-in na laksak kei ding uh hi.

¹⁸Egypt-ah sila na hihna uh le TOPA note’ Pasian in tua lai panin hong hotkhiatna na phawk ding uh hi. Tua ahih manin hih banga na gamtat nading uh thu kong pia hi.

¹⁹“Na lo-ah an la-in lo lai-ah anlom na mangngilh uh ciangin a tawm dingin na paikik kei ding uh hi. Tuate pen peemta, pa nei lo, le meigong numeite a’ ding ahi hi. Hih pen TOPA note’ Pasian in na khut uh tawh na sepna khempeuh uhah note thupha hong piak theih nading ahi hi.

²⁰Na oliv kungte uh na sat uh ciangin a hiangte na sat kikkik kei ding uh hi. Tuate pen peemta, pa nei lo, le meigong numeite a’ ding ahi hi.

²¹Na leenggui lo panun leenggah na kaihkhop uh ciangin a sang na nung khop kik kei ding uh hi. Tuate pen peemta, pa nei lo, le meigong numeite a’ ding ahi hi.

²²Egypt gamah sila na hihna uh na phawk ding uh hi. Tua ahih manin hih bangin na gamtat nadingun thu kong pia hi.