Read Tedim Chin THU HILHKIKNA 25 Bible Online

THU HILHKIKNA 25 - Tedim Chin bible

THU HILHKIKNA 25

¹“Mite kikalah thu kineihna om a, thukhen zumah amaute pai-in, thukhente in amau’ thu khensakin, a dikpa khahin a mawh pa lelsak a,

²a mawh pa satna thuak dinga kilawm ahihleh, thukhen pa in amah lumsuksakin a khialhna zahin ama muhin satsak ding hi.

³Sat sawmli kipia thei ding a, ahih hangin tua val hi lo ding hi. Tua hikeileh, hih sangin a tamvei zaw mi khat in sat lai leh note’ muhna-ah na sanggampa uh a kineubawl suak ding hi.

⁴“Bawng in an a cil laitakin a muk na tuam kei ding uh hi.

⁵“Sanggam pasalte teng khawmin, tuate khat si-in tapa a neih kei le, a sipa’ zi pen innkuan pualam khualmi tawh kiteng lo ding hi. A pasal’ sanggampa in luppihin a zi dingin amah la ding a, ama tungah pasal’ sanggampa’ nasep sem ding hi.

⁶Ama min Israel tungah a maiman’ loh nadingin tua nu in a neih masak a tapa pen a sisa a pasal’ ta-in kiseh ding hi.

⁷Mipa in a sanggampa’ zi a laknop kei leh, upate kiang kongpi-ah a sanggampa’ zi pai ding a, ‘Ka pasal’ sanggampa in a sanggampa’ min Israel sungah a zop ding ut lo a, pasal’ sanggampa’ nasep kei tungah hong sem nuam lo hi,’ ci ding hi.

⁸Tua ciangin mipa’ khuapi upate in amah samin thu genpih ding uh hi. Amah in, ‘Tua nu ka la nuam kei hi,’ a cih teitei leh,

⁹upate’ omin a sanggampa’ zi ama kiangah paito-in a khe panin a khedap kaihkhiatsakin a maitang cilphih ding hi. Tua ciangin tua nu in, ‘A sanggampa’ innkuan a zomto lo mipa hih bangin kibawl ta hen,’ cikhia ding hi.

¹⁰Israel mite lakah ama innkuan pen, ‘A khedap a kikaih khiatsak mipa’ innkuan,’ kici ding hi.

¹¹“Mi khatlekhat a kilai ciangin, a satpa’ kiang panin a pasal a honkhia dingin a khat pa’ zi hong pai a, a khutin a selsimte a matsak leh,

¹²tua nu’ khut na sattansak ding uh a, amah na hehpih kei ding uh hi.

¹³“Na ipsung uhah tawisuang nam nih, a lian le a neu, na neikhawm kei ding uh hi.

¹⁴Na innsung uhah tehna nam nih, a lian le a neu, na neikhawm kei ding uh hi.

¹⁵Tawisuang a cing a man na nei ding uh a, tehna a cing a man na nei ding uh hi. TOPA note’ Pasian in hong piak leitangah na khan uh a sau theih nading ahi hi.

¹⁶Bang hang hiam cih leh tua bangin gamta-in, a thuman lote khempeuh, TOPA note’ Pasian’ tungah a kihhuai ahi hi.

¹⁷“Egypt panin nong paikhiat lai-un lampi-ah Amalek mite in note hong bawlna,

¹⁸note gimin lungkhamin na om laitakun lampi-ah a hong simna, le note’ nungah a nunung khempeuh hong thahna uh phawk un; amaute in Pasian kihta lo uh hi.

¹⁹Tua ahih ciangin TOPA note’ Pasian in note’ neih dingin gamh-in hong piak leitang tungah, TOPA na Pasian un na kiim uha na galte khempeuh panun tawlngakna hong piak ciangin, mun khempeuh panin Amalek mite a kiphawkna na phiatkhiat ding uh na mangngilh kei ding uh hi.