Read Tedim Chin THU HILHKIKNA 26 Bible Online

THU HILHKIKNA 26 - Tedim Chin bible

THU HILHKIKNA 26

¹“TOPA na Pasian un luah dingin a hong piak leitangah va pai-in, tua leitang luahin a tungah na ten uh ciangin,

²TOPA na Pasian un a hong piak leitang pana piang gah khempeuh panin a gah masa pawlkhat la-in lawh khat sungah na koih ding uh a, ama min na omsak nadingun TOPA na Pasian un a teelna munah na pai ding uh hi.

³Tua hun laitakin na a sem siampipa kiangah pai-in ama kiangah, ‘TOPA in kote piak dingin ka pu ka pate uh tungah a ciam leitangah ka tun khitna uh tuni-in TOPA na Pasian kiangah kong ko uh hi,’ na ci ding uh hi.

⁴“Tua ciangin siampipa in note’ khut panin a lawh hong saang ding a, TOPA note’ Pasian biakna tau mai-ah koih ding hi.

⁵“TOPA note’ Pasian mai-ah note in, ‘A vak kawikawi kote’ pupi pen Aram mi hi a, amah Egypt-ah paisukin tua munah a peem lai-in mi tawmno ahi hi. Tua lai-ah amah a lian, a thahat, tampi a pha minam khat a suak hi.

⁶Egypt-te in kote hong ngong bawlin hong gimsak a, kote sal bangin hong bawl uh hi.

⁷Tua ciangin ka pu ka pate uh Pasian ahi TOPA Pasian’ tungah ka kiko uh a, TOPA in kote’ aw hong za-in, ka gimnate uh, ka sepnate uh le hong netniamnate uh a mu hi.

⁸TOPA in a vangliatna le a thahatna, launa lianpi, lim le na lamdangte tawh Egypt panin kote hong paikhiatpih hi.

⁹Amah in hih mun hong tunpihin, bawngnawi le khuaizu tui bangin a luanna gam hih leitang ko tungah hong pia hi.

¹⁰Tua ahih ciangin en in, TOPA, nangmah in kote nong piaksa leitang panin a gah a min masa kong paipih uh hi,’ na ci ding uh hi. Tua ciangin TOPA note’ Pasian’ mai-ah na koihsuk ding uh a, TOPA note’ Pasian’ mai-ah na bia ding uh hi.

¹¹TOPA note’ Pasian in note le na innkuanpihte uh tungah hong piak na a hoih khempeuhte hangin note le Levi mite le note lakah a om peemtate na lungdam khawm ding uh hi.

¹²“Sawm-ah-khat piak kum ahi, a kum thumna kumin, amaute in na khuapite uh sungah an ne-in, gilvahin a om theih nadingun Levi mite, peemtate, pa nei lote, le meigong numeite tungah na piak uh, na khawhsa uh sawm-ah-khat na piak khit uh ciangin,

¹³TOPA note’ Pasian’ mai-ah, ‘Ka innsung panin a siangtho dingteng ka tuamkoih khin hi. Tua tham loin kei nong sawlna bangin na thupiaknate khempeuh tawh kizui-in Levi mite, peemtate, pa nei lote, le meigong numeite tungah ka pia khin hi. Hih tungtangah na thupiakna khat zong ka khial kei a, ka mangngilh zong om lo hi.

¹⁴Dahin ka kah sungin zong sawm-ah-khat ka ne kei a, ka nit sungin zong ka khenkhia kei a, misite tungah zong ka pia kei hi. TOPA ka Pasian’ thu ka mang a, kei nong thupiakna khempeuh bangin ka hih khin hi.

¹⁵Vantung, nangma omna a siangtho panin hong ensuk inla, kote’ pulepate tungah bawngnawi le khuaizu tui bangin a luanna gam na ciam mah bangin, nangma mi Israel-te le na hong piaksa leitang thupha hong pia in,’ na ci ding uh hi.

¹⁶“Tuni-in TOPA na Pasian un hih thukhamte le ngeina kipte na zuih ding uh note tungah thu hong pia hi. Tua ahih ciangin na lungsim khempeuh uh le na nuntakna khempeuh uh tawh na hih ding uh limtakin na ngaihsun ding uh hi.

¹⁷Tuni-in, TOPA pen note’ Pasian ahihna le note in ama lampite tawnin, ama thukhamte le ama thupiaknate le ama ngeina kipte zui-in, ama thu na man’ ding uh na gen khin uh hi.

¹⁸Tuni-in TOPA in note pen amah in note tungah hong ciamsa bangin ama neih ding mi na hihna uh, le note in ama thupiaknate khempeuh na zuih nading uh,

¹⁹ama bawlsa minam dangte khempeuh sangin phatna le minthanna le pahtawina a lianzaw a ngahin hong koih nading, le ama gensa mah bangin TOPA note’ Pasian a dingin a siangtho mi na hih nading uh hong gen khin hi,” a ci hi.