Read Tedim Chin THU HILHKIKNA 27 Bible Online

THU HILHKIKNA 27 - Tedim Chin bible

THU HILHKIKNA 27

¹Tu-in Moses le Israel upate in mite thu pia-in, “Tuni-a kong gen uh thupiakna khempeuh na zui ding uh hi.

²TOPA na Pasian un note hong piak leitangah pai dingin Jordan na kantan ni-un suangtumpite na phut ding uh a, buan tawh na zut ding uh hi.

³Na pu na pate uh Pasian ahi TOPA in note tungah hong ciam mah bangin bawngnawi le khuaizu tui bangin a luanna leitang, TOPA na Pasian un note hong piakna gamah a lut dingin na galkah uh ciangin tua suangte tungah hih thute na gelh ding uh hi.

⁴Jordan na galkah khit uh ciangin Ebal Mual tungah tuni-a kong thupiakna uh tawh kizui-in hih suangte na phut ding uh a, buan tawh tua suangte na zut ding uh hi.

⁵Tua lai-ah TOPA na Pasian uh a dingin suang kibawl biakna tau khat na bawl ding uh a, tuate tungah sik tawh a kibawl nazatte na liik kei ding uh hi.

⁶TOPA na Pasian uh a dingin a kiseek lo suangtumte tawh biakna tau na bawl ding uh a, tua biakna tau tungah TOPA na Pasian uh a dingin meihal biaknate na pia ding uh hi.

⁷Tua ciangin thunuama biaknate na pia ding uh a, tua lai munah ne-in, TOPA na Pasian uh mai-ah na lungdam ding uh hi.

⁸Hih thute khempeuh tua suangte tungah a kitel takin na gelh ding uh hi,” a ci uh hi.

⁹Tua ciangin Moses le Levi siampite in Israel-te khempeuh tungah, “Israel-te aw, gamdai unla ngai un: Tuni-in TOPA note’ Pasian’ mi na suak uh hi.

¹⁰Tua ahih ciangin TOPA note’ Pasian’ thu mangin, tuni-a kong gen uh ama thupiaknate le ama thukhamte na zui ding uh hi,” a ci uh hi.

¹¹Moses in tua ni mahin mite thuhilhin,

¹²“Jordan na galkah khit uh ciangin mite thupha a pia dingin Gerizim Mual tungah a ding ding minamte: Simeon, Levi, Judah, Issakhar, Josef, le Benjamin ahi hi.

¹³Ebal Mual tungah hamsia a pia dingin a ding ding minamte: Reuben, Gad, Asher, Zebulun, Dan, le Naftali ahi hi.

¹⁴Levi mite in awging lianpi tawh Israel mite khempeuh tungah hih bangin ci ding uh hi.

¹⁵“‘TOPA a dingin a kihhuai ahi, khutsiampa’ khut tawh a kibawl, a kiseek ahi a, a kisung ahi zongin milim bawlin, mun simthamah a koih mipa in gimna ngah ta hen,’ ci ding uh hi. Tua ciangin mi khempeuh in dawngin, ‘Amen,’ ci ding uh hi.

¹⁶“‘A nu ahi a, a pa ahi zongin a zahtak lo mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

¹⁷“‘A vengpa’ gisuang a botkhia mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

¹⁸“‘Mittaw pa lam a lakkhial mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

¹⁹“‘Peemta, pa nei lo, le meigong numeite a’ ding thutang a heikhiatsak mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

²⁰“‘Amah in a pa’ tungah maizumna tun ahih manin, a pa’ zidang tawh a lumkhawm mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

²¹“‘Ganhing khat peuhpeuh tawh nulepa mawhna a bawl mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

²²“‘A nu’ tanu, a pa’ tanu, ahih kei leh a sanggamnu tawh a lumkhawm mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

²³“‘A sungnu tawh a lumkhawm mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

²⁴“‘A vengpa a thatsim mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

²⁵“‘Mawhna nei lopa thah nadingin sumgolh a la mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

²⁶“‘Hih thute zuihna tawh hih thu a kipsak lo mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.