Read Tedim Chin THU HILHKIKNA 28 Bible Online

THU HILHKIKNA 28 - Tedim Chin bible

THU HILHKIKNA 28

¹“Note in TOPA na Pasian uh thu mangin, tuni-a kong gen ama thupiakna khempeuh limtakin na zuih uhleh TOPA na Pasian un leitung minam dangte khempeuh sangin a lianzaw-in note hong bawl ding hi.

²TOPA na Pasian uh thu na man’ uhleh hih thuphate khempeuh note tungah hong tung ding hi.

³“Khuapi sungah thupha ngah mi na hi ding uh a, lote-ah zong thupha ngah mi mah na hi ding uh hi.

⁴“Note’ sung pana piangte, le na leitang uh pana piangte, le na ganhing uh pana piang, na bawngte uh pungin na tuuhonte uh tungah thupha om ding hi.

⁵“Na seengte uh le na annel mekna kuangte uhah thupha om ding hi.

⁶“Na sepna khempeuh uhah thupha na ngah ding uh hi.

⁷“TOPA in, note’ langah hong pang na galte uh na mai uhah lelhna thuaksak ding hi. Amaute lampi khat tawnin hong kuan ding uh a, note’ mai panin lam sagih tawnin taikeek ding uh hi.

⁸“TOPA in note’ ansal tung le na hihna khempeuh uhah thupha hong puak ding hi. TOPA na Pasian un note hong piakna leitangah amah in note tungah thupha hong pia ding hi.

⁹“Note in TOPA na Pasian uh hong thupiaknate zui-in ama lampi na tot uhleh amah in note tungah hong ciamsa bangin ama a dingin a siangtho mi dingin TOPA in note hong kipsak ding hi.

¹⁰TOPA in note hong sapna thu midang khempeuh in thei ding uh a, amaute in note hong kihta ding uh hi.

¹¹Note piak dingin na pu na pate uh tungah TOPA in a ciamsa gam sungah note’ sung pana piangte, na gan khawi pan uha piangte, le na leitang pan uha piangte-ah TOPA in note nakpitakin hong hausak ding hi.

¹²Note’ leitangah ama hunin guah a zusak ding le na sepna khempeuh uh thupha a pia dingin TOPA in a na hoih kholna vantung note hong hon ding hi. Note in minam tampite tungah leitawi na pia ding uh a, ahih hangin note in leitawi na la kei ding uh hi.

¹³Note in tuni-a kong thugente limtakin zuihna tawh TOPA na Pasian uh thupiaknate mangin, tuni-a no kong thupiakna kammalte panin, pasian dangte’ na semin a bia dingin na pial kei nak-uhleh, TOPA in a makai-in note hong bawl ding a, mi’ nung zui-in hong bawl lo ding hi. Tunglam bekah na kah ding uh a, na nuaikiat ngei kei ding uh hi.

¹⁴

¹⁵“Ahih hangin note in TOPA na Pasian uh thu mang loin, tuni-a kong gen ama thupiaknate le ama thukhamte khempeuh limtakin na zuih kei uhleh, hih samsiatna khempeuh note tungah hong tung ding a, note hong ban ding hi.

¹⁶“Khuapi sungah hong kisamsia ding a, lo-ah zong hong kisamsia ding hi.

¹⁷“Na lawhte uh le na annel mekna kuangte un zong samsiatna ngah ding hi.

¹⁸“Note’ sung pana piangte le na leitang uh pana piangte, na bawngte uh le na tuuhon note uh in zong samsiatna ngah ding hi.

¹⁹“Na sep na bawlna khempeuh uhah hamsia na ngah ding uh hi.

²⁰“Note in TOPA na nusiat uh a, na gamtatsiat uhleh, note sia-in na sihmang khit matengun TOPA in note tungah samsiatna, buaina, cihmawhnate hong tungsak ding hi.

²¹A luah dingin na lutna uh leitang panin note hong beisak matengin note lakah pulnatna a tun nadingin TOPA in bawl ding hi.

²²TOPA in pulnatna le cisa natna, meima nasia le a sa mahmah keutumna, huihpi’ mutgawpna le a nom tawh note hong vatgawp ding a, note na sih matengun tuate na thuak ding uh hi.

²³Na lu tung uha om vantungte pen sumngo bangin sanin guah zu lo ding a, na nuai uha om leitung pen sik bangin sak ding hi.

²⁴TOPA in na gam sung uha guahte tang dingin leivui le sehnel hong zusak ding a, note na sih matengun vantung panin note tungah tuate hong kiasuk ding hi.

²⁵“TOPA in na galte uh mai-ah note hong guallelsak ding hi. Amaute a do dingin lam khatah na kuan khawm ding uh a, amau’ mai-ah lam sagihin na taikeek ding uh hi. Leitung kumpi gamte khempeuh’ muhna-ah note a cikzethuai na hi ding uh hi.

²⁶Note’ luanghawmte pen huih lak a leeng vasate khempeuh le leitung a ganhingte khempeuh’ an hi ding a, tuate a bengkhia ding mihing om lo ding hi.

²⁷TOPA in note na damkik theih loh nading uh Egypt meimatumte le meima daite, meima lipneite le cithak tawh note hong vatgawp ding hi.

²⁸TOPA in haina, mittawtna, le lungsim buaina tawh note hong vatgawp ding hi.

²⁹Mittawte in khuamial lakah khua a zawt bangin sunin khua na zawt ding uh a, na hihnate uhah na maavang kei ding uh hi. Note hong kinengniamin na tate uh hong kisut niloh ding a, note hong huh ding kuamah om lo ding hi.

³⁰“Zi dingin lawm khat na dong ding uh a, midang khat in na luppih ding hi. Inn na lam ding uh a, tua sungah na teng kei ding uh hi. Leenggui lo na zuan ding uh a, a gah na ne kha kei ding uh hi.

³¹Na muh tangpi-un na bawngtal uh kigo ding a, a sa na ne kha kei ding uh hi. Note’ mai panin na la uh hong kingawh laksak ding a, note kiangah hong kipia kik nawn lo ding hi. Na tuute uh na galte uh tungah kipia ding a, note hong huh ding kuamah om lo ding hi.

³²Na tapate uh le na tanute uh midang tungah kipia ding a, amaute ngai-in sun nilohin na mit un enin na mit uh gim ding hi. Tuate pen nomau’ tha tawh na dalzawh ding uh hi lo ding hi.

³³Na theih nai loh uh minam khat in na leitang panun a piangte le na nasepsa khempeuh uh ne tum ding a, note hong kinengniamin hong kisugawp tawntung lel ding hi.

³⁴Tua ahih ciangin na mit un a muh ding nate in note hong hehsak mahmah ding hi.

³⁵TOPA in note na kidamsakkik theih loh ding uh a nasia mahmah meimatumte tawh na khukte uh le na khete uh meimasak gawpin, na khenuai panun na luzang dong uhah na thuak ding uh hi.

³⁶“Note le na pu na pate un a theih ngei loh minam khat kiangah TOPA in note le note tungah na koih uh na kumpipa uh hong tunpih ding a, tua lai-ah singlesuang tawh a kibawl pasian dangte’ na na sem ding uh hi.

³⁷TOPA in note hong paikhiatpihna mite lakah a cikzethuai, paunak, le gentehna na suak ding uh hi.

³⁸“Khaici tampi lo-ah na tuh ding uh a, ahi zongin tawmno bek na khawm ding uh hi; bang hang hiam cih leh kauphe in nemang ding hi.

³⁹Note in leenggah lo zuanin na puah ding uh a, ahih hangin leenggahzu dawn loin, leenggah zong na ne kei ding uh hi; bang hang hiam cih leh lung in tuate ne ding hi.

⁴⁰Na gam sung khempeuh uhah oliv kung na nei ding uh a, ahih hangin a thau tawh note na kizut kei ding uh hi; bang hang hiam cih leh na oliv gahte uh pulh ding hi.

⁴¹Tanute le tapate na nei ding uh a, ahih hangin amaute pen nomau a’ hi lo ding uh hi; bang hang hiam cih leh amaute galmat suak ding uh hi.

⁴²Na singte khempeuh uh le, na leitang panun a piang khempeuh kauphete in tang ding uh hi.

⁴³“Note lakah a om peemtate lian semsem ding uh a, note na neu semsem ding uh hi.

⁴⁴Amaute in note’ tungah leitawi hong pia ding uh a, note in amaute tungah leitawi na pia kei ding uh hi. Amaute a makai hi-in, note a nungzui na hi ding uh hi.

⁴⁵“Amah in note hong piak thupiaknate le thukhamte zui loin, TOPA na Pasian uh thu mang lo na hih manun, note na sih matengun hih samsiatnate khempeuh note’ tungah hong tungin, note hong delhin hong pha ding uh hi.

⁴⁶Note le na suanlekhakte uh tungah a tawntungin tuate pen lim le nalamdang hi ding hi.

⁴⁷Hih a tampi nate khempeuh om napi-in note in lungdamna le lungsim kipahna tawh TOPA note’ Pasian’ na sem lo na hih manun,

⁴⁸TOPA in note’ langah a hong sawl ding na galte uh’ na, gilkialna le dangtakna, pum guakin omna, le na khempeuh kitangsapna tawh, na sem ding uh hi. Na galte un note hong suksiat matengin note’ ngawngah sik hakkol hong thuah ding uh hi.

⁴⁹TOPA in a gamlapi leimong panin muvanlai leeng bangin a manlang, amau’ pau na theih loh uh minam, thukhualna a nei lo minam, khangham mite a zahtak lo, khangno mite tungah maipha zong a lak tuan lo minam khat, note’ langkhatah hong paipih ding a,

⁵⁰

⁵¹note na sih matengun amaute in na ganhon note uh le na leitang panun a piang gahte hong neksak ding uh hi. Amaute in note hong beisak matengun note a dingin an, leenggahzu, ahih kei leh sathau, na ganhingte uh ahih kei leh na tuuhon note uh zong hong nusiat lo ding uh hi.

⁵²Na gam sung uha a om na muan uh, a sang a muanhuai na kulhpite uh a cip khit dong matengin note’ khuapite khempeuh sungah amaute in note hong umcih ding uh hi. TOPA na Pasian un note hong piaksa na gam sung khempeuh uhah a om na khuapite khempeuh sung uhah note hong umcih ding uh hi.

⁵³“Na galte un hong umcihna le hong lungkhamsak nading ahi na lungkham hun sung uhah TOPA na Pasian un note a hong piaksa, na sung panun a piang na tanute uh le na tapate uh’ sate na ne ding uh hi.

⁵⁴Note lakah a ngeksuak, a cithei pen mipa in a sanggampa, a it a zi, le amah tawh a om a tate a nunung pen’ tungah an pia nuam lo ding hi.

⁵⁵Na khuapite khempeuh sung uhah hong umcihna le na galte un note hong lungkhamsak nading hun sungah bangmah kinei nawn lo ding ahih manin ama nek a tate’ sate kuamah in midang hawm nuam lo ding hi.

⁵⁶Note lakah a om a ngeksuak, a cithei pen numei, amah ngekin a ci neel lua ahih manin a khenuai tawh lei sik ding a ngaihsun ngei vet lo nu in a it a pasal, a tanute le a tapate a dingin ama sung panin a piang a tate le ama sung panin a paikhia a nau-nungzuite phal lo ding hi. Bang hang hiam cih leh hong umcihna le na galte un na khuapite uhah note hong lungkhamsak nading lungkhamna sungah bangmah neih lohna hangin amah in tuate nesim ding hi.

⁵⁷

⁵⁸“Hih a minthang, a zahtakhuai min, TOPA na Pasian uh na kihtak theih nadingun hih laibu sunga kigelh hih thute limtakin zuih ding na ngaihsut kei uhleh,

⁵⁹TOPA in note le na suan na khakte uh tungah nasia-in sauvei a om gimna, gimna a tuan diak, le a nasia, nat saute hong tungsak ding hi.

⁶⁰Amah in note’ kihtak Egypt natnate note’ tungah hong tungsakkik ding a, note’ tungah tuate kilawi lo ding hi.

⁶¹Note na siat matengun hih thukham laibu sungah a kiciamteh lo natna le gimna khempeuh zong TOPA in no tungah hong tungsak ding hi.

⁶²Note, vantung aksite zahin a tam na hihna sung uhah tawmno bek na pha ding uh hi; bang hang hiam cih leh TOPA na Pasian uh thu na mang kei uh hi.

⁶³TOPA in note tungah a hong bawlna le note tampi hong phaksakna-ah nuam a sak mah bangin, note tungah siatna tunsakna le note suksiatna-ah zong TOPA in nuamsa ding a, a luah dingin na lutna uh leitang panin note hong kilakhia ding hi.

⁶⁴“TOPA in leimong khat panin mong khat, mi khempeuhte lakah note hong thehthang ding hi. Tua lai-ah note le na pu na pate un a theih nai loh singlesuang tawh a kibawl pasian dangte’ na na sem ding uh hi.

⁶⁵Hih minamte lakah oltak a nuntakna na mu kei ding uh a, kiptaka na om nading uh gam na nei kei ding uh hi. TOPA in tua lai-ah lungsim linna, mit gimna, le nuntak tha beina hong pia ding a,

⁶⁶na nuntakna uh lunghimawhin na om tawntung ding uh hi. Sun le zanin na lau ngitnget ding uh a, nuntak lungmuanna na nei kei ding uh hi.

⁶⁷Na lungsim un a kihtak launa le na mit un a muh ding nate’ hangin, zingsangin, ‘Nitak hileh!’ na ci ding uh a, nitakin, ‘Zingsang hileh!’ na ci ding uh hi.

⁶⁸Note na zin kik ngei nawn kei ding uh hi, ci-in kong ciam khualzinna, Egypt gamah teembaw tawh TOPA in note hong paipih kik ding hi. Tua lai-ah sila numei le sila pasal dingin na galte uh tungah na kizuak ding uh a, ahih hangin kuamah in note hong lei lo ding hi,” a ci hi.