Read Tedim Chin THU HILHKIKNA 3 Bible Online

THU HILHKIKNA 3 - Tedim Chin bible

THU HILHKIKNA 3

¹“Tua ciangin eite kihei-in Bashan lamah i paito a, Bashan kumpipa Og le ama mite khempeuh Edrei-ah eite a do dingin hong kuankhia hi.

²Ahih hangin TOPA in kei kiangah, ‘Amah kihta kei in; bang hang hiam cih leh amah le a mite khempeuh le a leitang nangma khut sungah kong pia khinzo hi. Heshbon-ah a teng Amor kumpipa Sihon na bawl bangin ama tungah na bawl ding hi,’ hong ci hi.

³“Tua ahih ciangin TOPA i Pasian in eite’ khut sungah Bashan kumpipa Og le a mite khempeuh zong hong pia a, ama a dingin mi khat beek a suakta nawn lo dingin i vatmai hi.

⁴Tua hunin a khuapite khempeuh uh i la a, amau’ kiang pan i lak loh khuapi khat zong om lo hi. Tua banga i lakte pen Bashan gam a Og kumpi gam sung, Argob gambup, khuapi sawmgukte ahi hi.

⁵Kulhpi-a ki-um lo khuaneu tampite simloh, hih khuapite khempeuh kulh sangpi, kongpi le sikzawlte tawh a muanhuai takin a kibawl ahi hi.

⁶Heshbon kumpipa Sihon i bawl bangin amaute i susiamang a, a khuapi khempeuh, papi, nupi, le naupangte i susia hi.

⁷Ahih hangin a ganhing khempeuh le khuapi sunga van kinusiate i la hi.

⁸“Tua ahih ciangin tua hun laitakin, Jordan galkhat a om Amor kumpi nihte’ khutsung pan, Arnon kuam panin Hermon Mual dong

⁹(Sidon mite in Hermon pen Sirion ci a, Amor mite in Senir ci uh hi),

¹⁰mualzang khuapite khempeuh le Gilead gam khempeuh le Bashan gam khempeuh, Salekah le Edrei dong, Bashan-a om Og kumpi gam khuapite i la hi.

¹¹(Bang hang hiam cih leh Bashan kumpipa Og bek Refaim gam sungah a omlai ahi hi. Ama lupna a han pen suang han hi a, Ammon mite’ khuapi Rabbah-ah tua han omlai hi lo ahi hiam? Tua han a sauna pi sawm le li dektak hi a, a zaina pi guk ahi hi.)

¹²“Tua hunin hih leitang i luah ciangin, Reuben mite le Gad mite tungah Arnon kuam mong a a om Aroer pan le Gilead mualtung gam kimkhat a khuapite tawh ka pia hi.

¹³Gilead gam a omlai teng le Argob gam khempeuh ahi, Og kumpi gam, Bashan gam khempeuh, Manasseh minam kimkhatte tungah ka pia hi. (Bashan gam buppi pen Refaim leitang kici hi.

¹⁴Manasseh mi Jair in Bashan kici Argob gam khempeuh, Geshur mite le Maakath mite’ gamgi dong la a, tua sunga khuaneu minte ama min tamsakin tuni donga a kip Havvothjair a phuak hi.)

¹⁵“Makhir tungah Gilead ka pia a,

¹⁶Reuben mite le Gad mite tungah Gilead panin Arnon kuam dong, gamgi dingin a kuam laita, Ammon mite’ gamgi ahi Jabbok gun dong tawh ka pia hi.

¹⁷Arabah gam zong, a gamgi dingin Jordan tawh, Khinnereth pan nisuahna lama om Pisgah mualpang nuai-a Ci Tuipi ahi Arabah tuipi ciang dong amaute ka pia hi.

¹⁸“Tua hunin note thu kong pia a, ‘TOPA na Pasian un na neih dingun hih leitang hong piazo hi. Na galhang mite khempeuh uh galhiam tawh kithawi-in Israel mi na sanggamte uh mai-ah va kuan ding hi.

¹⁹Ahih hangin na zite, na taneute, le na ganhingte uh (ganhing tampi na neih uh ka thei hi) note kong piaksa khuapite-ah om ding uh a,

²⁰TOPA in note hong piak bangin na sanggamte uh tungah lungsim tawlngakna pia-in, TOPA na Pasian un Jordan galkhatah amaute a piak leitang amaute in zong a luah matengun na huh ding uh hi. Tua ciangin note kong piaksa ahi na neihsa ciat uhah note khempeuh na ciah ding uh hi,’ kong ci hi.

²¹“Tua hun laitakin Joshua thu ka pia a, ‘TOPA na Pasian in hih kumpi nihte’ tungah a bawlte khempeuh na mit in mu khin a, na nawk lai ding kumpi gam khempeuh tungah zong TOPA in tua mah bangin hih ding hi.

²²Amaute na kihta kei ding hi; bang hang hiam cih leh nang a’ dinga hong dosak pa pen TOPA na Pasian ahi hi,’ ka ci hi.

²³“Tua hunin keimah in TOPA’ tungah ka thum a,

²⁴‘Topa PASIAN aw, na liatna le na thahatnate na nasempa’ tungah lah ding a hong kipan pan bek na hi hi; bang hang hiam cih leh vantung hitaleh leitungah hitaleh nangma hih bangin tua bang nasep leh a vanglian gamtatna a hih thei bang pasian om ahi hiam?

²⁵Kei hong paisak inla, Jordan galkhat a om gam hoih, tua mualtung gam hoih le Lebanon hong musak in, ci-in kong thum hi,’ ka ci hi.

²⁶“Ahih hangin note’ hangin kei’ tungah TOPA heh a, ka thunget hong pia lo hi. TOPA in kei kiangah, ‘Phazo hi; hih thu kei kiangah hong gen nawn kei in.

²⁷Pisgah mual dawnah paito inla, nitumna lam, leilu lam, leitaw lam, le nisuahna lamah khuadakto inla, na mit tawh gal et in; bang hang hiam cih leh nangmah in hih Jordan na kantan kei ding hi.

²⁸Ahih hangin Joshua thu pia inla, hanthawnin thakhauhsak in; bang hang hiam cih leh hih mite’ mai-ah amah pai ding a, nangmah in na muh ding leitang amaute luahsak ding hi,’ hong ci hi.

²⁹“Tua ahih ciangin Bethpeor gal-a kuam sungah i taam lai hi.