Read Tedim Chin THU HILHKIKNA 31 Bible Online

THU HILHKIKNA 31 - Tedim Chin bible

THU HILHKIKNA 31

¹Tua ciangin Moses in Israel-te khempeuh tungah a thugen zomlai hi.

²Amah in amaute kiangah, “Tuni-in kei kum za le kum sawmnih ka pha ta a, keima ut bangin ka gamtangzo nawn kei hi. TOPA in kei kiangah, ‘Hih Jordan galkhatah na pai kei ding hi,’ hong cizo hi.

³TOPA na Pasian mahmah uh note’ mai-ah hong galkah ding hi. Note’ mai-ah hih minamte amah in susia ding a, note in amaute na suankhia ding uh hi. TOPA’ gensa bangin note’ mai-ah Joshua hong galkah ding hi.

⁴TOPA in amaute a suksiat lai-in, Amor kumpi Sihon le Og tung le amau’ leitang tungah a bawl bangin amaute tungah bawl ding hi.

⁵TOPA in note tungah amaute hong pia ding a, note kong piak thupiaknate khempeuh tawh kizui-in amaute tungah na bawl ding uh hi.

⁶Thahat unla, hang un. Lau kei unla, amaute kihta kei un. Bang hang hiam cih leh note tawh hong pai pa pen TOPA na Pasian uh ahi hi. Note hong cimawhsak lo ding a, hong nusia lo ding hi,” a ci hi.

⁷Tua ciangin Moses in Joshua samin, Israel-te khempeuh muhin ama kiangah, “Thahat inla hang in. Bang hang hiam cih leh amaute tungah piak dingin TOPA in amau’ pute pate tungah a ciamsa leitangah hih mite tawh na pai ding a, nangmah in tua leitang amaute na ngahsak ding hi.

⁸Na mai-ah a pai pa pen TOPA ahi hi. Amah in nang hong ompih ding a, nang hong cimawhsak loin, zong hong nusia lo ding hi. Lau kei inla, lungkia kei in,” a ci hi.

⁹Moses in hih Thukham gelhin TOPA’ Thuciamna Singkuang a pua Levi mi siampite le upate khempeuh tungah a pia hi.

¹⁰Moses in amaute thu pia-in, “Kum sagih a cin sim, a kisehsa suahtaksakna hun, buk pawi hunin,

¹¹amah in a teelna mun TOPA na Pasian uh mai-ah a kilak dingin Israel-te khempeuh a pai uh ciangin, amau’ zakin Israel-te khempeuh mai-ah hih thukham na sim ding uh hi.

¹²Jordan galkhatah a luah dingin na paina uh gamah na nuntak laitengun amaute in a thu za-in TOPA na Pasian uh zahtak ding a theih nading, le hih thukham thute khempeuh limtakin a sep theih nading, le hih thu a thei nai lo amau’ tate in TOPA na Pasian uh zahtak ding a theih nadingun, numei, pasal, le naupangte, le na khuapite uh sunga om peemtate, mi khempeuh khawm un,” a ci hi.

¹⁴Tua ciangin TOPA in Moses kiangah, “En in, na sih ding hun hong nai ta hi. Joshua sam inla, amah ka sawl theih nadingin kikhopna buk sungah hong om un,” a ci hi. Tua ciangin Moses le Joshua pai-in kikhopna buk sungah va om uh hi.

¹⁵Tua ciangin meii khuam omna puanbuk sungah TOPA kilang hi. Meii khuam, puanbuk kong gei-ah a ding hi.

¹⁶Tua ciangin TOPA in Moses kiangah, “En in, na pu na pate kiang a zuan ding na hita hi. Nang na om nawn loh ciangin hih mite pen na paina uh mite lakah a gam sung pasian-te uh tawh paktat ding uh a, amaute in kei hong nusia-in amaute tawh ka bawl ka thuciamna uh siasak ding uh hi.

¹⁷Tua hun ciangin amaute tungah ka sin so-in, amaute nusia-in ka mai ka seel ding a, amaute beimang ding uh hi. Tua ni ciangin amaute in, ‘Eite’ lakah i Pasian a om loh manin hih siatnate i tungah hong tung hi lo ahi hiam?’ a cih theih nadingun amaute tungah siatna le gimna tampi tung ding hi.

¹⁸Amaute, pasian dangte lamah kihei uh ahih manin amau’ gamtatnasa siatnate khempeuh hangin tua hun ciangin ka mai ka seel taktak ding hi.

¹⁹“Tua ahih ciangin hih lai gelh inla, Israel mite hilh in. Hih la, kei a dingin Israel mite’ langkhatah teci a suah theih nadingin amaute tungah hilh in.

²⁰Bang hang hiam cih leh a pu a pate uh tungah piak dinga ka kiciamna, bawngnawi le khuaizu tui bangin a luanna gamah amaute tunpih khinin, amaute in ne-in khamin a thau khit uh ciangin, pasian dangte a bia dingin kihei-in kei hong simmawhin ka thuciamna siasak ding uh hi.

²¹Siatna le haksatnate amaute tungah a tun ciangin hih la, teci-in amaute’ langkhatah pang ding hi (bang hang hiam cih leh a suanlekhakte un mangngilh lo ding uh hi); bang hang hiam cih leh piak dingin ka kiciam leitangah amaute ka paipih ma-in, amau’ vaihawm kholh a ngimnate uh ka thei hi,” a ci hi.

²²Tua ahih ciangin tua ni mahin Moses in hih la gelh a, Israel mite a hilh hi.

²³Tua ciangin TOPA in Nun’ tapa Joshua sawlin, “Thahat inla hang in; bang hang hiam cih leh amaute piak dingin ka kiciam leitang tungah Israel mite na paipih ding a, nang tawh kong om ding hi,” a ci hi.

²⁴Moses in a bei dongin hih Thukham kammalte laibu sungah a gelh a man ciangin,

²⁵Moses in TOPA’ Thuciamna Singkuang a pua Levi mite thu pia a,

²⁶“Hih Thukham laibu la unla, note’ langkhatah teci dingin a om theih nadingin TOPA na Pasian uh Thuciamna Singkuang gei-ah koih un.

²⁷Bang hang hiam cih leh a lehdo mite le a lungkhauh thei mite na hihna uh ka thei hi. En un, note tawh kei a nungta khawm laipi mahin, tuni-in TOPA na lehdo khin uh hi. Ka sih khit ciangin bangzah takin lehdozaw lai ding na hi uh hiam!

²⁸Hih thute amaute’ bilah genin, amau’ langkhatah teci a pang dingin vantung le leitung ka sap theih nadingin na minam upate uh le na uliante khempeuh uh kei kiangah hong khawm un.

²⁹Bang hang hiam cih leh ka sih khit ciangin note siatgamtatin, note kong sawlna lampi panin na pial taktak ding lam uh ka thei hi. Note’ sepna tawh amah hehsakin, TOPA’ muhna-ah a sia gamta ding na hih manun, hong pai ding hunte-ah, note’ tungah gimna hong tung ding hi,” a ci hi.

³⁰Tua ciangin hih la malte a bei dongin Israel a kikhawm khempeuhte’ zakin Moses in gen a,