Read Tedim Chin THU HILHKIKNA 32 Bible Online

THU HILHKIKNA 32 - Tedim Chin bible

THU HILHKIKNA 32

¹“Vantungte aw, ngai un, thu kong gen ding hi. Ka thugente leitung in za hen.

²Ka thuhilhte guahmal bangin zu-in, ka thugente daitui bangin kia hen la, lo ngeek tunga guah phin leh ankung tunga guahzu bang tahen.

³Bang hang hiam cih leh TOPA’ min ka phat ding hi. Eite’ Pasian a liatna gen un!

⁴“Eite’ belh TOPA, a nasepna kicing a, ama sepna khempeuh thumanna ahi hi. Thumanna nei-in, mawhna a nei lo Pasian hi a, amah thutangin thuman hi.

⁵Ama tungah amaute gamtat sia uh a, amaute’ sitbaanna hangin ama tate hi nawn lo uh hi. Amaute pen a lampial, a lungsim kawi khang mite ahi uh hi.

⁶A hai, ngaihsutna nei lo mite aw, tua bangin TOPA thuk ding na hi uh hiam? Amah pen, note a hong piangsak, note hong bawlin a hong kipsak, na pa uh hi lo ahi hiam?

⁷“A beisa hunte phawk unla, khang tampi hunte ngaihsun un. Na pate uh dong le-uh cin, hong hilh ding uh a, na upate uh dong le-uh cin hong gen ding uh hi.

⁸Sang Pen pa in minam dangte tungah amau’ gamh pia a, mihingte a ten nading mun a seh ciangin vantungmi a phazah tawh a kizui-in mite’ gamgi a phut hi.

⁹Ahi zongin TOPA’ tanh pen ama mite hi a, Jakob’ suante pen a kipia ama luah ahi hi.

¹⁰“Amah in sehnel gam, huihpi nunna gam sungah amaute mu hi. Amah in amaute kawi-in kem a, ama mitnauta bangin amaute kem hi.

¹¹A bu a vil, a note tungah a kha a zap, a khate zakin a note a man, a kha tawh a note a pua muvanlai bangin

¹²TOPA bek mah in amaute makaih a, amaute kiangah gamdang pasian om lo hi.

¹³“Amah in leitung a sangna-ah amaute tuangsak a, amaute in gamlak pana piangte a ne uh hi. Suangpi panin amaute khuaizu hupsakin, meisuang tawh a kibang suang panin sathau a nesak hi.

¹⁴Bawnghon panin bawngnawi thaukhal, tuuhon panin tuunawi, tuunote le tuutalte’ thau tawh, Bashan bawnghonte le keelte, mangbuh hoihpente tawh leenggahtui san na dawn uh hi.

¹⁵“Israel mite thau mahmah uh a, a lehdo thei mi suak uh hi. Note thau-in lianpi pha-in, na zol uh hi. Tua ciangin amaute a bawl Pasian amaute in nusia-in, amau a Honkhia pa thusim lo uh hi.

¹⁶Amaute pen pasian dangte tawh ama hazat theih nadingin gamta uh a, a kihhuai gamtatnate tawh amaute in amah hehsak uh hi.

¹⁷Amaute in pasian ahi lo dawite, amau’ theih ngei loh pasian-te, hong suak nunung pasian thakte, na pu na pate un a theih ngei loh pasian-te’ tungah biakna a pia uh hi.

¹⁸Note a hong Honkhia pa na phawk kei uh a, note a hong suaksak Pasian na mangngilh uh hi.

¹⁹“TOPA in tua thu thei a, a tapate le a tanute in amah hehsak uh ahih manin tua ama tate a nolh hi.

²⁰Amah in, ‘Amaute’ kiang panin ka mai ka seel ding a, amaute’ thumong bang hong hi hiam, ka en ding hi. Bang hang hiam cih leh amaute a lampial khang mite hi a, cihtakna a nei lo tate ahi uh hi.

²¹Amaute in pasian a hilote tawh ka hazat nading hong bawl uh a, a milimte uh tawh kei hong hehsak uh hi. Tua ahih ciangin mi-a a gen taak lo mite tawh amaute’ hazat theih nading ka bawl ding a, a hai mahmah minam khat tawh amaute ka hehsak ding hi.

²²Bang hang hiam cih leh ka hehna in mei tawhkuang a, Leinuaite’ gamdong a kuang hi. Leitung le a tunga piangte kangtum a, mualte’ bulpite kuangsak hi.

²³“‘Amaute’ tungah siatna ka khol ding a, amaute’ tungah ka thaltangte ka zang ding hi.

²⁴Gilkialin amaute si ding uh a, a sa mahmah meikuang le gunei natna in amaute netum ding hi. Keimah in amaute a pet dingin ha hiam a nei gamsate amaute a tu dingin gu a nei gulte ka sawl ding hi.

²⁵Namsau in gamlakah amaute susia-in, inn sungah launa lianpi om ding a, tangval le nungak, naungek nawi nete, samkangte tawh susia khawm ding hi.

²⁶Keimah in, “Amaute gamlapi-ah ka thehthang ding a, mite lakah amaute a kiphawkna ka beisak ding hi,” ka ci thei ding hi.

²⁷Amau’ langte in ngaihsun khialin, amaute in, “Eite i gualzo hi. TOPA in hihte khempeuh bawl lo hi,” hong ci kha ding uh ahih manin galte’ hong phin ding ka lau hi,’ a ci hi.

²⁸“Bang hang hiam cih leh amaute, ngaihsutna a nei lo minam hi a, amaute’ sungah thu theihtelna om lo hi.

²⁹Amaute a pil hileh, hih thu theitel ding uh a, amau’ thu tawpna mu ding uh!

³⁰Amau a Honkhia pa in amaute zuakin, TOPA in amaute piakhia kei leh bangci-in mi khat in mi tulkhat delh mangin, mi nih in mi tul sawm taisakzo ding ahi hiam?

³¹Bang hang hiam cih leh i galte’ pasian eite’ Pasian bang hi lo a, i galte’ thungetna a mawkna ahi hi.

³²Amaute, Sodom le Gomorrah bangin siahuai uh a, gu nei-in a kha leenggah a gah leenggui tawh kibang uh hi.

³³Amau’ leenggahzu pen gulpi gu le a gupha gul gunei gu tawh kibang hi.

³⁴“Hihte kei kiangah kikholin, ka vankoihna sungah kisiincip hi lo ahi hiam?

³⁵Phulakna le thukkikna kei a’ hi a, a hun ciangin amaute puk ding uh hi. Bang hang hiam cih leh amau’ gim ngah hun ding hong naita a, amau’ siat nading hong tung pah hi.

³⁶Bang hang hiam cih leh amaute’ vang a beina le sila le sila a hilote a beina a muh ciangin TOPA in a mite’ dikna kilangsak ding a, ama nasemte tungah hehpihna nei ding hi.

³⁷Tua ciangin amah in, ‘Amau’ pasian-te, a bukna uh suangpi,

³⁸amaute’ biakpiakna thau ne-in, leenggahzu tawh a biakna uh a dawnte koi-ah om ahi hiam? Amaute thosakin note kihuhsak unla, amaute, na kidalna uh hisak un!

³⁹‘Tu-in thei un, keimah a kici pa pen kei ka hi a, kei simloh pasian dang kuamah om lo hi. Ka that a, ka nungtasak hi. Ka liamsak a, ka damsak hi. Ka khutsung pan a honkhiazo kuamah om lo hi.

⁴⁰Bang hang hiam cih leh vantung lamah ka khut laamto-in ka kiciam a, a nungta tawntung ka hih mah bangin,

⁴¹a tee ka namsau taatin, thu ka khen ciangin, ka galte tungah phu ka la ding a, kei hong mudahte ka thukkik ding hi.

⁴²Ka thaltangte si ka tawksak ding a, ka namsau in mi that ding hi. a kithatte le a kimante, kei hong langpangte, sugawp ding hi,’ a ci hi.

⁴³TOPA’ mite phat un, no minam dangte aw; bang hang hiam cih leh amah in a nasemte’ phu la a, alangte thuk-in, ama mite’ gam adingin kilemna a bawl hi,” a ci hi.

⁴⁴Tua ciangin Moses hong pai-in, mite’ zakin amah le Nun’ tapa Joshua in hih la malte khempeuh a sut uh hi.

⁴⁵Moses in Israel-te khempeuh tungah hih thute a gen a man ciangin

⁴⁶amaute kiangah, “Hih thu khempeuh limtakin zui unla, na tate un a zuih dingin na hilh theih nadingun tuni-a note tungah kong gen thu khempeuh na lungsim uhah koih un.

⁴⁷Bang hang hiam cih leh hih pen note a dingin a thuneu hi loin note’ nuntakna hi a, a luah dingin Jordan galkhat na paina uh gam sungah hih thu tawh sauveipi na hing ding uh hi,” a ci hi.

⁴⁸Tua ni mahmahin TOPA in Moses kiangah,

⁴⁹“Jerikho gallam, Moab gam sungah a om Nebo Mual, hih Abarim mualtungah kahto in. A neih dingun Israel mite tungah ka piak Kanaan gam gal et in.

⁵⁰Hor Mual tungah na sanggampa Aaron si-in a mite kiangah a kigawm bangin, na kahtohna mualtungah si inla, na mite kiangah pai-in kigawm in.

⁵¹Bang hang hiam cih leh Zin gam, Kadesh khua gei-a Meribah tui phual, Israel mite lakah keimah nong upna na siasak a, Israel mite lakah a siangtho-in kei nong zahtak kei hi.

⁵²Tua ahih manin na mai-ah a om gam na gal muh tei ding a, ahih hangin Israel mite ka piak gam sungah nang na pai kei ding hi,” a ci hi.