Read Tedim Chin THU HILHKIKNA 33 Bible Online

THU HILHKIKNA 33 - Tedim Chin bible

THU HILHKIKNA 33

¹Hih pen, Pasian’ mi Moses in ama sih ma-in Israel mite thupha a piakna ahi hi.

²Amah in, “Sinai panin TOPA hong pai a, Sinai panin eite a’ ding hong suakkhia hi. Paran Mual panin hong taangkhia a, a taklam khutah meikuang tawi-in, mi siangtho tul sawmte kiang panin a hong pai hi.

³Hi taktak hi; amah in a mite it a, ama tungah a ki-ap mi khempeuh a khut sungah om hi. Tua ahih ciangin amaute in na kalsuanna hong zui uh a, nang tung panin lamlahna ngah uh hi.

⁴Jakob mihonte’ neih dingin Moses in kote tungah ngeina khat hong pia hi.

⁵Mite’ makaite kikhawmin, Israel minamte khempeuh a kikaihkhop ciangin, ama mi Israel-te lakah TOPA, kumpi a suak hi,” a ci hi.

⁶Reuben minamte’ thu gen a, “Reuben nungta-in si kei hen la, ama mite zong mi tawm hi kei ta hen,” a ci hi.

⁷Tua ciangin Judah minamte’ thu genin, “TOPA aw, Judah’ aw ngai inla, a mite kiangah amah paipih in. Na khutte tawh ama a’ ding do inla, a galte’ dona-ah a huhpa hi in,” a ci hi.

⁸Tua ciangin Levi minamte’ thu genin, “Levi tungah na Thummim pia inla, na midik pa tungah na Urim pia in. Massah ah na ze-et mipa, Meribah tuite-ah na kitotpih pa ahi hi.

⁹A nu le a pa sangin nangmah hong thupi ngaihsutzaw uh a, ‘Amaute ka thupi sim kei hi,’ a ci pa ahi hi. Amah in a sanggamte paaikhia-in, a tate don lo hi. Bang hang hiam cih leh Levi minamte in na thu hong mangin, na thuciamna zui uh hi.

¹⁰Amaute in na ngeina kipte Jakob suante hilhin, na thukhamte Israel-te hilh ding uh hi. Amaute in na mai-ah paknamtui hong koihin, na biakna tau tungah meihal biakna bup hong koih ding uh hi.

¹¹TOPA aw, ama nate tungah thupha pia inla, a khut tawh a sepnate saang in. A galte’ kawng sutan inla, a ding kikzo nawn lo dingin amah a mudahte sugawp in,” a ci hi.

¹²Benjamin minamte’ thu genin, “TOPA in a it mipa ama kiangah nuam takin om hi. Amah in sun tawntung kemin, amaute lakah om hi,” a ci hi.

¹³Josef minamte’ thu genin, “TOPA in ama leitang, tung lamah a om vantung letsong hoihpente, le nuai-a om a thuknate tawh,

¹⁴ni hanga gah a hoihpente, le kha hanga piang a hoihpente tawh,

¹⁵tanglai mualte tunga piang a hoih a limci pente le tawntung mualte’ hauhna tawh,

¹⁶leitung le a tunga om letsong hoihpente le sawlbawk lakah a tengpa’ maipha tawh thupha pia tahen. Hihte khempeuh, Josef tungah tung hen la, a sanggamte lakah ulian ahi mipa’ lu tungah tung tahen.

¹⁷A tacil, bawngtal bangin thahat a, a kite, gamsial kite tawh kibang hi. Amah in tuate tawh mite nawt ding a, leimong dongah amaute khempeuh phul ding hi. Efraim mi tul sawmte tua bang hi a, Manasseh minam tul tampite zong tua bangmah ahi hi,” a ci hi.

¹⁸Zebulun minamte’ thu genin, “Zebulun aw, na paikhiatna-ah lungdam in. Issakhar aw, na puanbukte sungah lungdam in.

¹⁹Amaute in a mual uhah mite sam ding uh a, amaute in tua lai-ah biakpiakna mante pia ding uh hi. Bang hang hiam cih leh amaute in tuipi tung le sehnel sungah na manpha kiseelte ngah uh hi,” a ci hi.

²⁰Gad minamte’ thu genin, “Gad a lianin a bawlpa in thupha ngah ta hen! Gad in humpinelkai bangin buk khikhe a, amah in a baan le a luzang, a balkham hi.

²¹Amah in lei hoihpenna mun ama a dingin teel hi. Bang hang hiam cih leh a ukpa’ tanh kikoihcingsak hi. Mi makaite’ ngahte mah amah zong kingahsak a, amah in Israel-te tawh TOPA’ thupiakna le thuman khennate a sem hi,” a ci hi.

²²Dan minamte’ thu genin, “Dan pen Bashan panin a diangkhia humpinelkai no ahi hi,” a ci hi.

²³Naftali minamte thu genin, “O Naftali, maipha tawh nuam a sa, TOPA’ thupha tawh a kidim, bualtuite le leitaw lam a nei pa,” a ci hi.

²⁴Asher minamte thu genin, “Asher in tapa dangte sangin thupha ngahzaw tahen. A sanggamte’ pahtak hi hen la, a gam sungah oliv thau kidim tahen.

²⁵Na khuapite, sik le sumngo tawh kidal ding a, na nuntak laiteng na thahatna tua bang hi ding hi,” a ci hi.

²⁶“Israel aw, nangmah huh dingin vantungah a tuang a liatna tawh vanpi-ah a om, Pasian tawh a kibang kuamah dang om lo hi.

²⁷Tawntung Pasian pen nangma omna hi a, nangmah huh dingin tawntung khutte a om hi. Amah in na mai-ah galte nawtkhia-in, ‘Susia un,’ ci hi.

²⁸Tua ahih ciangin Israel mite lungmuangin om ding uh hi. Jakob suante bek an le leenggahzu gamah om hi. Hi taktak hi, a vantungte in daitui hong khiatsuk hi. Israel aw, mi nuamsa na hi hi. Nang hong kihuhna lum le na gualzawhna lum le na gualzawhna namsau ahi TOPA in nang banga a hotkhiat mi kua om ahi hiam?

²⁹Na galte in hong mai-etin, na kiangah hong pai ding uh a, amaute na tuancil ding hi,” a ci hi.