Read Tedim Chin THU HILHKIKNA 34 Bible Online

THU HILHKIKNA 34 - Tedim Chin bible

THU HILHKIKNA 34

¹Tua ciangin Moab zanglei panin Jerikho gal Nebo Mual, Pisgah dawnah Moses paito hi. Tua ciangin TOPA in gam khempeuh, Gilead gam pan Dan ciang dong,

²Naftali gam khempeuh, Efraim le Manasseh gam, Judah gam khempeuh Nitumna Tuipi dong,

³Negeb gam, le nisuh kung khuapi kuam a kici Jerikho panin Zoar ciang dong a kikhung zanglei a lak hi.

⁴Tua ciangin TOPA in ama kiangah, “Hih gam, Abraham, Isaac, le Jakob tungah kiciamin, ‘Na suanlekhakte uh tungah ka pia ding hi,’ ka cih leitang ahi hi. Na mit tawh nang kong musak khin a, ahih hangin tua lai-ah nang na pai kei ding hi,” a ci hi.

⁵Tua ahih ciangin TOPA’ thugenna bangin TOPA’ nasem Moses pen Moab gamah si a,

⁶Bethpeor galkhat, Moab gam kuamah amah kiphum hi. Ahih hangin tuhun dongin a kiphumna mun kuamah in thei lo hi.

⁷Moses a sihin kum za le kum sawmnih pha hi. A mit maang lo a, a tha ngeina zong kiam lo hi.

⁸Moab zanglei-ah Israel mite ni sawmthum sung Moses hangin a kah khit uh ciangin Moses hangin kahna le thumna a veng ta hi.

⁹Tua ciangin Moses in, ama tungah a khut nga khin ahih manin Nun tapa Joshua lungsim pilna tawh a kidim hi. Tua ahih ciangin Israel mite in ama thu mangin, TOPA in Moses a thupiaksa bangin a gamta uh hi.

¹⁰Israel mite sungah Moses bangin TOPA in maitang kimu-in a theih kamsang dang kuamah om lo hi.

¹¹Egypt gam sungah Faro le a nasemte le a gam khempeuhah a hih dingin TOPA in ama tungah a piak limte le na lamdangte khempeuh a nei kuamah dang om lo hi.

¹²Israel-te khempeuh muhna-ah Moses in a hih a lian vangliatna le a lauhuaite khempeuh a hih thei, amah tawh a kibang kuamah dang om lo hi.