Read Tedim Chin THU HILHKIKNA 4 Bible Online

THU HILHKIKNA 4 - Tedim Chin bible

THU HILHKIKNA 4

¹“Tu-in Israel-te aw, note nungta-in, TOPA, na pate uh Pasian in note hong piak leitangah va pai-in na luah theih nadingun note kong hilh thukhamte le ngeina kipte don unla zui un.

²TOPA na Pasian un hong piak ahi keima hong thugente na zuih theih nadingun no kong thupiakte behlap loin, zong na khiam kei ding uh hi.

³Na mit un Baalpeor-ah TOPA’ hihna mu khin hi; bang hang hiam cih leh na Pasian un note’ lak panin Peor-a Baal a zui mi khempeuh susia a,

⁴ahih hangin TOPA na Pasian uh a lenkipte khempeuh tuni-in na hinglai uh hi.

⁵“En un, note in a luah dingin na lutna uh gam sungah na zuih dingun TOPA ka Pasian in kei hong thupiak bangin thukhamte le ngeina kipte kong hilh khinzo hi.

⁶Tuate zui unla, sem un; bang hang hiam cih leh hih thukhamte khempeuh a zak uh ciangin, ‘Hih minam liante pen a pil thuthei taktak hi,’ a ci ding uh mite’ muhna-ah hih thu pen nomau’ pilna le nomau’ theihna hi ding hi.

⁷“Bang hang hiam cih leh eite in TOPA i sap hun simin eite’ kiangah i Pasian hong nai zahin tua bang pasian a nei minam lian koi-ah om ahi hiam?

⁸Tuni-in note kong hilh thute bangin thukham le ngeina kip a man a nei minam lian koi-ah om ahi hiam?

⁹“Na mit un a muhsa nate na nuntak sungun mangngilh kha-in, na lungsim panun paikhia kha ding ahih manin limtakin ngaihsunin hoihtakin kikem un. Horeb-a TOPA na Pasian uh mai-ah na din ni-un TOPA in kei kiangah, ‘Leitungah a nuntak laiteng uh amaute in kei hong kihtakna ding le amaute in a tate uh a hilhsawn theih nadingun keimah in amaute tungah ka thute ka zaksak theih nadingin ka kiangah mite hong khawm in,’ hong cihna thu, na tate uh le na tate uh tate’ tungah kitheisak un.

¹⁰

¹¹“Mei in mual kangin van laizang dong banto-in, khuamial le meii le khuazing in a tuamcip laitakin note a nai-ah hong pai-in mual bulah na ding uh hi.

¹²Tua ciangin mei sung panin TOPA in note’ kiangah thu hong gen hi. Note in awging na za uh a, ahih hangin bangmah mu loin, awging bek a om hi.

¹³Thupiak Sawmte ahi note’ hih dinga hong thupiak ama thuciamna note’ tungah hong gen a, amah in suangpek nih tungah tuate a gelh hi.

¹⁴Note in na luah ding uh gam sungah na zuih theih nadingun, thukhamte le ngeina kipte note kong hilhna ding tua hun laitakin TOPA in kei thu hong pia hi.

¹⁵“Tua ahih ciangin note hoihtakin kidawm un. Horeb-ah mei sung panin TOPA in note’ tungah thu hong gen ni-in bangmah mu lo na hih manun,

¹⁶note a dingin lim khat peuhpeuh, pasal tawh a kibang hitaleh numei tawh a kibang hitaleh,

¹⁷leitung a om ganhing khat peuhpeuh tawh a kibang hitaleh, huihlaka leeng kha a nei vasa khat peuhpeuh tawh a kibang hitaleh,

¹⁸leitungah a bokvak khat peuhpeuh tawh a kibang hitaleh, leinuai-ah a om tui sunga ngasa khat peuhpeuh tawh a kibang hitaleh, a kiseek milim bawlna tawh a sia-in na gamtat khak loh nadingun kidawm un.

¹⁹Note in na mit uh tawh vantung lam ento-in, ni le kha le aksite, vantung na khempeuh na muh uh ciangin, mun khempeuh a mite’ tungah TOPA na Pasian un a piak nate’ lamah kihei-in tuate bia-in a na na sep khak loh nading uh kidawm un.

²⁰Ahih hangin TOPA in tuni-a bangin sik meikhuk tawh a kibang Egypt panin ama neih mi dingin note hong la-in hong paikhiatpih khin hi.

²¹Tua tham loin note’ hangin kei’ tungah TOPA heh a, keimah in Jordan kantan loin TOPA na Pasian un note’ gamh dingin hong piak leitang hoihah ka lut loh nadingin a kiciam hi.

²²Hih gamah kei ka si ding a, Jordan khengin ka pai thei kei ding hi. Ahih hangin note in kantanin tua gam hoih na luah ding uh hi.

²³TOPA na Pasian un note tawh hong bawl thuciamna mangngilhin, TOPA na Pasian un note’ hih dinga hong kham lim khat peuhpeuh tawh a kibang a kiseek milim na bawlkhak loh nadingun kidawm un.

²⁴Bang hang hiam cih leh TOPA na Pasian uh hong kangtum thei mei tawh kibang a, a haza Pasian ahi hi.

²⁵“Note in tuleta nei-in gam sungah mi khangham na suah uh ciangin, na khat peuhpeuh tawh a kibang limin a kiseek milim bawlna le TOPA na Pasian uh’ muhna-ah a sia bawlna tawh amah a heh nadingin na siat gamtat uhleh,

²⁶Jordan galkhat luah dingin na paina leitang uhah na siat maimang baih nadingun note’ langkhatah teci pang dingin tuni-in van le lei ka sam hi. Tua leitang tungah note sauvei na hing kei ding uh a, na siamaimang ding uh hi.

²⁷TOPA in mite lakah note hong thehthang ding a, TOPA in note hong hawlna minamte lakah mi tawmcik bek na omlai ding uh hi.

²⁸Note in tua lai munah mite’ khut in a bawl, khua mu thei lo, khua za thei lo, a ne thei lo, a nam thei lo sing le suang pasian-te’ na na sem ding uh hi.

²⁹Ahih hangin tua lai panin TOPA na Pasian uh na zong ding uh a, na lungsim khempeuh uh le na nuntakna khempeuh uh tawh na zon uhleh amah na mu ding uh hi.

³⁰Note in gimna thuakin, mailam hunah hih nate khempeuh note’ tungah hong tun ciangin, TOPA na Pasian uh lamah kihei-in ama thu na mang ding uh hi.

³¹Bang hang hiam cih leh TOPA na Pasian uh hehpihna a nei Pasian ahi hi. Amah in note hong tamasak loin, hong nusia lo ding a, na pate uh tawh a thuciamna mangngilh lo ding hi.

³²“Pasian in leitungah mi a piansak ni a kipan, note’ pian’ ma-a hun beisa thu tu-in kan unla, van mong khat pan mong khat kikal thu zong kan un. Hih bang na lian piang ngei-in, a kiza ngei peuhmah hiam?

³³Note in Pasian’ aw za khin napi-in na hin lai uh bangin meikuang sung panin pasian dang khat peuhpeuh’ pauna aw mi khat peuhpeuh in za ngei ahi hiam?

³⁴Tua ahih kei leh, TOPA na Pasian un Egypt gam sungah note a dingin na muhna uhah a bawlte khempeuh tawh a kibangin, ze-etna, lim, nalamdang, gal, a vanglian le a thahatna le a lauhuai mahmah tawh pasian dang khat peuhpeuh in ama mite a dingin minamdang khat sung pan minam khat a va lak ding hanciam ngam ngei ahi hiam?

³⁵TOPA Pasian hi, ci-in na theih nadingun note’ tungah hih thu hong kilak hi a, amah simloh kuamah dang om lo hi.

³⁶Amah in note hong khal theih nadingin vantung panin ama aw note hong zasak hi. A mei lianpi leitungah note hong musak a, mei sung panin ama aw na za uh hi.

³⁷Amah in na pate uh itin, amau’ suanlekhakte hong teel a, amahmah in ama vanglian tawh Egypt panin note hong paikhiatpih a,

³⁸note sangin a tamzaw le a vanglian zawte’ gamah hong paipihin, note’ luah dingin amau’ leitang hong piak nadingin note’ mai-ah amaute hong hawlkhiatsak ahih manin tuni-in hih bangin na om thei uh hi.

³⁹Tua ahih ciangin tunga om vantung hitaleh nuai-a om leitung hitaleh ah TOPA pen Pasian ahihna thu tuni-in thei unla, na lungsim uhah ciamteh un; kuamah dang om lo hi.

⁴⁰Tua ahih ciangin note le note’ khita na tate uh tungah thu hong nuamin, TOPA na Pasian un a tawntung a hong piak gam sungah na khan uh na sausak theih nadingun tuni-a no kiangah kong gen ahi ama thukhamte le a thupiakte na zui ding uh hi,” a ci hi.

⁴¹Tua ciangin, a beisa hunah amah tawh kilangneihna a om lo, tum lopi-in a vengpa a that, mi that khapa va tai-in, hih khuapite khat peuhpeuhah taina tawh a suahtak theih nadingin Moses in nisuahna lam Jordan galkhatah khuapi thum a tuam koih hi.

⁴²

⁴³Reuben mite a dingin mualzang sehnel gam Beza khua, Gad mite a dingin Gilead gam sung Ramoth khua, le Manasseh mite a dingin Bashan gam sung Golan khua ahi hi.

⁴⁴Moses in Israel mite tungah thu pia hi.

⁴⁵Hihte pen, Egypt gam panin a paikhiat-un Moses le Israel mite in a zawh Heshbon-ah a teng Amor mite’ kumpipa Sihon’ gam sung, Jordan gal, Bethpeor tawh a kigalsai kuam sungah, Egypt panin Israel mite a paikhiat lai-in Moses in amaute tungah a gen thute ahi hi.

⁴⁶

⁴⁷Amaute in, Arnon kuam mong a a om Aroer panin Sirion Mual (Hermon a cihna) dong, Jordan nisuahna lama om Arabah gam khempeuh, Pisgah mualpang nuai Arabah tuipi dong tawh, kumpi Sihon’ leitang le Bashan kumpi Og’ leitang, Jordan galkhat nisuahna lamah a teng Amor kumpi nihte’ leitang a luah uh hi.