Read Tedim Chin THU HILHKIKNA 5 Bible Online

THU HILHKIKNA 5 - Tedim Chin bible

THU HILHKIKNA 5

¹Moses in Israel-te khempeuh samin amaute kiangah, “Israel-te aw, tuni-a note’ zakin kong gen thukhamte le ngeina kipte ngai unla, note in thei-in limtakin zuih ding na ngaihsun ding uh hi.

²TOPA i Pasian in eite tawh Horeb-ah thuciamna khat bawl hi.

³TOPA in i pute i pate bek tawh hih thuciamna a bawl hi loin, tuni-a a hinglai eite khempeuh tawh zong a bawl ahi hi.

⁴Note’ tungah TOPA’ thu a gen dingin TOPA le note’ kikalah ka din laitakin, mei sung panin tua mualah TOPA in kimaituahin note hong hopih a, mei hangin note lau na hih manun mualtungah na paito kei uh hi. Amah in:

⁶“‘Kei pen salsuahna Egypt leitang panin note a hong paikhiatpih TOPA na Pasian uh ka hi hi.

⁷“‘Keimah longal pasian dang na nei kei ding uh hi.

⁸“‘A kiseek milim hitaleh, tunga vantung hitaleh, nuai-a leitung hitaleh, leinuai-a om tui sung hitaleh ah a om na khat peuhpeuh a sun khat peuhpeuh note a dingin na bawl kei ding uh hi.

⁹Amaute’ mai-ah kun loin, amau’ na na sem kei ding uh hi; bang hang hiam cih leh keimah TOPA note’ Pasian, a aam Pasian ka hi a, kei hong mudahte’ tungah a pate’ mawhna a tate’ tungah khang thum khang lina dongin thuk-in,

¹⁰ahih hangin kei hong itin ka thupiakte a zui mi a tul tampite’ tungah itna kip a lak pa ka hi hi.

¹¹“TOPA note’ Pasian’ min a sia lamin na zang kei ding uh hi; bang hang hiam cih leh TOPA in ama min a sia lamin a zang mi a mawh lo hi, ci lo ding hi.

¹²“‘TOPA note’ Pasian in hong thupiak bangin na sianthosak nadingun Sabbath ni tang un.

¹³Ni guk sung na semin na nasep ding khempeuh uh na hih ding uh hi.

¹⁴Ahih hangin a ni sagih ni pen TOPA note’ Pasian’ Sabbath ni ahi hi. Tua ni-in note bangin na nasem numei le na nasem pasalte uh a tawlngak theih nadingin note, na tapate, na tanute, na nasemnute, na nasempate, na bawngtal, na la, na ganhing khat peuhpeuh uh le na huang sung uha om zinte in na khat peuhpeuh sem lo ding uh hi.

¹⁵Egypt-ah nasem na hihna uh le tua lai panin TOPA na Pasian un a vangliatna khut le a thahatna tawh hong paikhiatpihna na phawk ding uh hi. Tua ahih ciangin Sabbath ni na tan’ ding uh TOPA note’ Pasian in thu hong pia hi.

¹⁶“‘TOPA note’ Pasian in hong piak leitang tungah na khan uh sau-in na nopsak theih nadingun TOPA note’ Pasian in hong thupiak bangin na nu na pa uh zahtak un.

¹⁷“‘Mi na that kei ding uh hi.

¹⁸“‘Nulepa mawhna zong na bawl kei ding uh hi.

¹⁹“‘Na na gu kei ding uh hi.

²⁰“‘Na vengte uh langkhatah zong a man loin teci na pang kei ding uh hi.

²¹“‘Na vengte uh zi zong na deihgawh kei ding uh hi. Na vengte’ inn, a lo, a nasempa, a nasemnu, a bawngtal, a la, ahih kei leh na vengte’ na khat peuhpeuh na deihgawh kei ding uh hi,’ ci hi.

²²“TOPA in mei, meii, le a mial mahmah sung panin awging lianpi tawh mualtung a no a kikhawm khempeuh tungah hih thute hong gen a, amah in bangmah dang genthuah lo hi. Amah in suangpek nih tungah tuate gelhin, tua suangpeekte kei tungah hong pia hi.

²³“Mei in mual a kat laitakin khuamial sung panin awging na zak uh ciangin minam lutang khempeuh le upate kei kiangah hong pai uh hi.

²⁴Note in, ‘En in, TOPA i Pasian in a minthanna le a liatna eite’ tungah hong lak khin a, mei sung panin ama awging i za khin hi. Pasian in mi hopih napi, mi a hinglai veve-in tuni-in i mu hi.

²⁵Tua ahih ciangin bang hangin tu-in eite si ding ihi hiam? Hih mei lianpi in eite hong kangtum ding hi. TOPA i Pasian’ awging za lai lehang eite i si ding hi.

²⁶Bang hang hiam cih leh a si thei mihing khempeuh sung panin eite’ zak bangin mei sung panin a nungta Pasian a paukhiatna awging za-in a nungta lai kua om ahi hiam?

²⁷A nai-ah va pai inla, TOPA i Pasian in a gen ding khempeuh va za in. TOPA i Pasian in nang tungah hong genteng ko’ tungah nang hong gensawn in. Kote in hong mangin ka sem ding uh hi,’ nong ci uh hi.

²⁸“Kei kiangah nong gen uh ciangin TOPA in na thu uh a za hi. TOPA in kei kiangah, ‘Hih mite in nang kiangah hong gen uh thu ka za khin a, a gen khempeuh uh a manin gen uh hi.

²⁹Amaute le a suan a khakte uh a nopsak tawntung theih nadingun keimah zahtak ding le ka thupiak khempeuh zuih ding hih bang ngaihsutna nei tawntung le-uh ka deih ahi hi.

³⁰Pai inla amaute kiangah, “Na puanbuk uhah ciah un,” ci in.

³¹Ahih hangin nang, kei kiang hih lai-ah ding in. Amaute’ neih dingin ka piak leitangah amaute in a zuih theih nadingun amaute na hilh ding thupiakna le thukhamte le ngeina kipte khempeuh nang tungah kong gen ding hi,’ hong ci hi.

³²“Tua ahih ciangin TOPA na Pasian un note hong thupiak bangin na gamtat ding uh na kingaihsun ding uh a, ama thu panin taklam hitaleh veilam hitaleh ah na pial kei ding uh hi.

³³Note nungta-in, nuamsa-in na luah ding uh leitangah sawtpi na nuntak nadingun TOPA na Pasian un note hong thupiakna lampi khempeuh na tawn ding uh hi.