Read Tedim Chin THU HILHKIKNA 6 Bible Online

THU HILHKIKNA 6 - Tedim Chin bible

THU HILHKIKNA 6

¹“Tu-in, luah dinga na paina gam uhah na zuih dingun, note le na tapate uh le na suanlekhakte un TOPA note’ Pasian’ thukhamte le a thupiakte na zuihna uh tawh amah na zahtak theih nadingun, TOPA na Pasian un na nuntak tawntung uh na zuih dingun kei a hong hilh sawnsak thute pen hih thupiakna, thukhamte, le ngeina kipte ahi hi. Hihte pen na khan uh a sau theih nading ahi hi.

³Tua ahih ciangin Israel-te aw, note nuamsa-in, TOPA, na pate uh Pasian in note tungah hong ciamsa bangin bawngnawi le khuaizu a luanna gamah tampi pha-in na khan theih nadingun hih thute za unla, na zuih ding uh ngaihsun un.

⁴“Israel-te aw, za un: TOPA i Pasian, TOPA khat bek ahi hi.

⁵TOPA note’ Pasian, na lungsim khempeuh uh, na nuntakna khempeuh uh, le na thahatna khempeuh uh tawh na it ding uh hi.

⁶Tuni-a no kong piak hih thute na lungsim uhah om ding hi.

⁷Na tate uh tungah limtakin na hilh ding uh a, na innsung uhah na tut uh ciang, lampi-ah na pai uh ciang, na lup ciang uh le na thawh ciangun tua thute na gengen ding uh hi.

⁸Na khut tung uhah lim dingin tuate na hen ding uh a, na mitte uh kikalah tuate pen talsuante bang hi ding hi.

⁹Na inn kongkhak khuam tung uh le na kongpi uh tungah tuate na gelh ding uh hi.

¹⁰“TOPA na Pasian un note piak dingin na pate uh Abraham, Isaac, le Jakob tungah a ciam, note’ phuh loh a lian a hoih khuapite,

¹¹note’ khol loh na hoih khempeuh tawh a kidim innte, note’ bawl loh tuibeem, note’ suan loh leengguite, le oliv kungte a omna leitangah hong paipihin, note in ne-in na kham uh ciangin,

¹²salsuahna Egypt leitang panin hong paikhiatpih TOPA na mangngilh khak loh nading uh kidawm un.

¹³TOPA na Pasian uh na zahtak ding uh hi. Ama na bek na sem ding uh a, ama min tawh na kiciam ding uh hi.

¹⁴Note’ kiima om mite’ pasian-te ahi pasian dangte’ nung na zui kei ding uh hi;

¹⁵bang hang hiam cih leh note’ lakah a om TOPA na Pasian uh a aam Pasian ahi hi. Tua bang hikeileh note’ tungah TOPA na Pasian uh hong hehin, lei maitang panin note hong susia ding hi.

¹⁶“Massah munah amah na ze-et uh bangin TOPA na Pasian uh na ze-et nawn kei ding uh hi.

¹⁷Amah in note hong thupiaksa ahi TOPA na Pasian un hong thupiakte khempeuh na zui ding uh hi.

¹⁸TOPA’ hong ciamsa bangin note’ mai panin na langte khempeuh uh nawhkhiatna tawh na pu na pate uh tungah piak dingin TOPA in a ciamsa leitang hoih note in na luah theih nading uh le note na nopsak theih nadingun TOPA’ muhna-ah a man le a hoih nate na sem ding uh hi.

²⁰“Hong tung ding hunah na tapate un, ‘TOPA i Pasian in note hong piak hih thute, bang a cihnopna ahi hiam?’ ci-in hong dot uh ciangin

²¹na tapate uh kiangah, ‘Eite pen Egypt gam sungah Faro’ silate ihi a, TOPA in Egypt panin a vangliatna tawh hong paikhiatpih hi.

²²TOPA in eite’ muhna-ah a lian a nasia lim le na lamdangte Egypt mite le Faro le a uliante khempeuh tungah lak hi.

²³Amah in i pu i pate tungah piak dinga a ciam leitangah hong paipihin, eite hong piak theih nadingin tua lai panin eite hong paikhiatpih hi.

²⁴Tuhuna bangin i nuntak theih nadingin amah in eite’ hoih tawntung ding a deihna-in, TOPA i Pasian zahtakin hih thukhamte khempeuh i zuih ding TOPA in thu hong pia hi.

²⁵Amah in eite hong thupiak bangin TOPA i Pasian’ mai-ah hih thupiakte khempeuh limtakin zui lehang eite a dingin thumanna hi ding hi,’ na ci ding uh hi.