Read Tedim Chin THU HILHKIKNA 7 Bible Online

THU HILHKIKNA 7 - Tedim Chin bible

THU HILHKIKNA 7

¹“TOPA na Pasian un luah dinga na tumna uh leitangah hong paipihin, note’ mai-ah Hit mite, Girgash mite, Amor mite, Kanaan mite, Perez mite, Hiv mite, le Jebus mite, note sangin lianzaw-in a thahatzaw minam sagihte note’ mai panin siangkhiasakin,

²TOPA na Pasian un note tungah amaute hong pia-in, note in amaute na zawh uh ciangin, note in amaute na susiamang ding uh hi. Amaute tawh thuciamna na bawl kei ding uh a, amaute tungah hehpihna na lak kei ding uh hi.

³Amaute tawh kiteng loin, na tanute uh amau’ tapate pia loin, a tanute uh na tapate uh a dingin na la kei ding uh hi.

⁴Bang hang hiam cih leh pasian dangte’ na a sem dingin TOPA zuihna panin na tapate uh amaute in heikhia ding uh hi. Tua ciangin no tungah TOPA hong hehin note hong susia pak ding hi.

⁵Amaute tungah hih bangin note na gamta ding uh hi: A biakna taute uh phelsakin, a biakna songte uh dengzanin, amau’ Asherah milimte phuksakin, a kiseek a milimte uh mei tawh na hal ding uh hi.

⁶“Bang hang hiam cih leh note pen TOPA note’ Pasian’ tungah a siangtho mi na hi uh hi. Leitung a om mite khempeuh sung panin ama mi ahi dingin TOPA na Pasian un note hong teelzo hi.

⁷“TOPA in note hong itin hong teelna pen midangte sangin na tamzawkna hang uh hi lo hi. Bang hang hiam cih leh mi khempeuh lakah a tawmpen na hi uh hi.

⁸TOPA in salsuahna Egypt kumpipa Faro’ khutsung panin note hong honkhia-in a vangliatna tawh hong paikhiatpihna pen TOPA in note hong itin, na pate uh tunga a kiciam thuciam a zuihna hang ahi hi.

⁹Tua ahih ciangin TOPA na Pasian uh amah bek ahi Pasian hi a, amah itin a thupiakna a zuite tungah khang tulkhat dongin thuciamna le itna kip lenin a thuman Pasian,

¹⁰amah a mudah mite, suksiatna tawh a thukpah pa ahihna thei un. Amah a mudah mi tungah zekai loin a maitang mahah thuk ding hi.

¹¹Tua ahih ciangin tuni-a no kong piak thute khempeuh limtakin na zuih ding uh ngaihsun un.

¹²“Note in hih ngeina kipte za-in, kemin tuate na zuihna hangun, TOPA na Pasian un na pu na pate uh tungah a ciam thuciamna le itna kip note tungah hong tungsak ding hi.

¹³Amah in note hong itin, tampi hong phasak ding hi. Amah in note tungah piak dingin na pu na pate uh tungah a ciam gam sungah note’ suanlekhakte le na gam sung panun a piangte, na an uh le na leenggahzu uh le na sathau uh, le na ganhingte uh pungsakin, na tuulekeelno honte uh zong thupha pia ding hi.

¹⁴Midangte khempeuh sangin note thupha hong kilim piakzaw ding hi. Note’ lak hitaleh na ganhingte uh lak hitaleh ah a nu ahi a, a pa ahi zongin a ciing om lo ding hi.

¹⁵TOPA in note’ tung panin natna khempeuh lakhia ding hi. Note in na theihsa uh ahi Egypt gam a natna siate note’ tungah khat zong hong tung lo ding a, ahih hangin no hong mudahte khempeuh tungah tuate tungsak ding hi.

¹⁶TOPA na Pasian un note tungah hong piak mi khempeuh na beisak ding uh a, amaute na khasiat kei ding uh hi. Note a dingin thangzak hi ding ahih manin amau’ pasian-te zong na bia kei ding uh hi.

¹⁷“Na lungsim uhah, ‘Hih minamte ei sangin tamzaw hi. Amaute bangci suankhiat zawh ding ihi hiam?’ na cih khak uhleh,

¹⁸amaute na kihta kei ding uh hi. TOPA na Pasian un Faro le Egypt mite khempeuh tungah a hih,

¹⁹na mitte un a muhsa a lian ze-etnate, limte, na lamdangte, a vangliatna le TOPA na Pasian un hong paikhiatpihna a thahatna na phawk ding uh hi. TOPA na Pasian un na kihtak uh mi khempeuh tungah tua bangin hih ding hi.

²⁰Tua tham loin, a omlai mite le no kiang panin a bu mite a siat khit dong matengin TOPA na Pasian un amaute’ lakah tunpi khah ding hi.

²¹Note in amaute na kihta kei ding uh hi; bang hang hiam cih leh a lian a kihtakhuai ahi Pasian, TOPA na Pasian uh note tawh a om hi.

²²TOPA na Pasian un note’ mai-ah hih minamte tawm tawmin siang khiasak ding hi. Note a dingin gamsate hong tam khanlua kha ding ahih manin thakhatthu-in amaute na beisak kei ding uh hi.

²³Ahih hangin TOPA na Pasian un note tungah amaute hong pia ding a, amaute a bei matengin kibuaisak ding hi.

²⁴Amah in note’ khut sungah amaute’ kumpite hong pia ding a, note in mun khempeuh panin amaute’ min na maimangsak ding uh hi. Amaute na susiamang khin ding uh a, note’ langkhatah mi khat beek hong pang zo lo ding hi.

²⁵A kiseek amau’ pasian milimte mei tawh na hal ding uh hi. Tua nate-ah na awk khak loh nadingun amaute’ tunga a om kham le ngun deihgawh loin, note a dingin na la kei ding uh hi. Bang hang hiam cih leh tua pen TOPA na Pasian uh tungah a kihhuai ahi hi.

²⁶Note’ inn sungah a kihhuai nate na tumpih kei ding uh a, tua nate tawh kibangin samsiat a thuak mi na kisuaksak kei ding uh hi. Note in tua nate mudah mahmahin na kih ding uh hi. Bang hang hiam cih leh tua nate a kisamsia na ahi hi.