Read Tedim Chin THU HILHKIKNA 8 Bible Online

THU HILHKIKNA 8 - Tedim Chin bible

THU HILHKIKNA 8

¹“Note nungta-in tampi na phak theih nading uh le na pu na pate uh tungah piak dinga TOPA a kiciamsa leitangah va pai-in na neih theih nadingun tuni-a note kiangah kong gen thupiakna khempeuh limtakin na zuih ding uh na ngaihsun ding uh hi.

²A thupiakte na zui uh hiam, na zui kei uh hiam cih a theih nadingin note hong niamkhiatin, na lungsim uhah bang om hiam cih a theih nadingin TOPA na Pasian un sehnel gamah hih kum sawmli sung note hong paipihna lampi khempeuh na ciamteh ding uh hi.

³Mite, an bek tawh nungta loin TOPA’ kamsung panin a pusuak thu khempeuh tawh nungta hi, ci-in note hong theihsak nadingin, amah in note hong niamkhiatin hong gilkialsak a, note hitaleh na pu na pate uh hitaleh in a theih ngei loh manna tawh hong vak hi.

⁴Hih kum sawmli sung note’ tunga om na puan uh sia loin, na khe uh zong bawk lo hi.

⁵Tua ahih manin mi khat in a tapa a khal bangin TOPA na Pasian un note hong khalna thu na lungsim uhah thei un.

⁶Tua ahih ciangin ama lampi zuihna le amah zahtakna tawh TOPA note Pasian’ thupiakte na zui ding uh hi.

⁷Bang hang hiam cih leh TOPA note’ Pasian in, mual le guamah a luang tuite a omna, ciktui le tuikhuk a omna leitang,

⁸mangbuh le mangbuhham, leenggui le theikung, le mang kawlsing a omna leitang, oliv kungte le khuaizu a omna leitang,

⁹bangmah kisam loin, cilbawl loin an na nek nading uh leitang, a suangte sik ahihna leitang, mualte sung panin sumsan na tawh theihna uh leitang ahi gam hoihah note hong paipih hi.

¹⁰Note in ne-in na gil uh vah ding a, note tungah gam hoih hong piakna hangin TOPA na Pasian uh na phat ding uh hi.

¹¹“Tuni-a no tungah kong gen ahi ama thupiaknate le a ngeina kipte le a thukhamte zuih lohna tawh TOPA na Pasian uh mangngilh kha ding na hih manun kidawm un.

¹²Tua hikeileh, an ne-in na kham uh ciang, inn hoihte lamin tuate sungah na ten uh ciang,

¹³na bawnghonte uh le na tuuhonte uh tampi a phak ciang le na khamte uh le na ngunte uh tampi pha-in, na neih khempeuh uh tampi a phak ciangin

¹⁴na lungsim uh lianin, salsuahna Egypt gam panin note a hong paikhiatpih,

¹⁵a lian a lauhuai sehnel gamah gul gunei le momai lak le tui om lohna lei keu-ah a hong paipihpa, meisuang tawh a kibang suangpi panin tui a hong piapa,

¹⁶a tawpna-ah a hoihin na gamtat theih nading uh a deihna-in note hong niamkhiatin a hong ze-et theih nadingin na pu na pate un a theih loh manna tawh sehnel gamah a hong vak TOPA na Pasian uh na mangngilh kha ding uh hi.

¹⁷Na lungsim uhah, ‘Ka vangliatna uh le ka thahatna un hih hauhna hong ngahsak hi,’ ci kha ding na hih manun kingaihsun un.

¹⁸Tuni-a mah bangin na pu na pate uh tungah a kiciamna a kipsak theih nadingin, na hauh nadingun vangliatna a hong piapa amah ahih manin TOPA na Pasian uh na phawk ding uh hi.

¹⁹TOPA na Pasian uh mangngilhin pasian dangte’ nung zui-in tuate’ na semin na biak uhleh, na sia taktak ding uh hi, ci-in tuni-in limtakin kong hilhkhol hi.

²⁰TOPA note’ Pasian’ aw ngai lo ahih manun, TOPA in note’ mai-ah a siatsak minamte bangin note na sia ding uh hi.