Read Tedim Chin THU HILHKIKNA 9 Bible Online

THU HILHKIKNA 9 - Tedim Chin bible

THU HILHKIKNA 9

¹“Israel-te aw, za un; note sangin tamzaw-in a thahatzaw minamte, lianin van banin kulhpi a kiciangto khuapite, na theihsa uh mi ahi a pum lian a tun sang Anak mite, ‘Anak mite, kua in dozo ding ahi hiam?’ a kicih na zak ngei mite uh a suankhia dingin Jordan a kantan ta ding na hi uh hi.

³Tua ahih ciangin, a kangtum thei mei bangin note’ mai-ah a pai pa pen TOPA na Pasian uh ahihna thu tuni-in thei un. Amah in note’ mai-ah amaute susia-in, amaute zogawp ding hi. Tua ahih ciangin TOPA in note tungah hong ciamsa bangin amaute hawlkhia-in manlangin na siamangsak ding uh hi.

⁴“TOPA na Pasian un note mai panin amaute a nawhkhiat khit ciangin, na lungsim uhah, ‘Hih leitang a luah dingin TOPA in hong paipihna pen komau’ thumanna hang ahi hi,’ ci kha kei un. TOPA in na mai uhah amaute a hawlkhiatna pen hih minamte’ gitlohna hang hizaw hi.

⁵Na thumanna hang uh ahi a, na lungsim manna hang uh tawh ahi zongin amau’ leitang a luah ding na hi kei uh hi. TOPA na Pasian un na mai panun amaute a hawlkhiatna pen hih minamte’ gitlohna hang le TOPA in na pu na pate uh Abraham, Isaac, le Jakob tungah a thuciamna kammal a kipsak theih nading ahi hi.

⁶“Tua ahih ciangin note’ thumanna hangin TOPA na Pasian un na tan’ dingun hih leitang hoih note tungah hong pia ahihlohna thei un. Bang hang hiam cih leh note pen lungsim khauh mi na hi uh hi.

⁷“TOPA na Pasian uh sehnel gamah phinin na hehsakna uh phawk unla, mangngilh kei un. Egypt gam panin na paikhiat ni uh a kipan hih lai na tun dongun TOPA langpanin na lehdo uh hi.

⁸Horeb mual nangawnah a heh nadingin TOPA na phin uh a, note’ tungah TOPA heh a, amah in note hong susia dektak hi.

⁹TOPA in note tawh a bawl thuciamna suangpeekte a sang dingin mualtungah ka paitoh lai-in, mualtungah sun sawmli le zan sawmli sung ka om a, an ne lo, tui dawn loin ka om hi.

¹⁰Pasian’ khut tawh a kigelh suangpek nihte kei tungah TOPA in hong pia hi. Kikhop ni-in mei sung panin note tungah TOPA in hong gensa kammal khempeuh tua suangpeekte tungah om hi.

¹¹Sun sawmli le zan sawmli a cin ni-in kiciamna suangpek nihte TOPA in kei hong pia hi.

¹²“Tua ciangin TOPA in kei kiangah, ‘Kithawi inla, hih lai panin paisuk mengmeng in. Bang hang hiam cih leh Egypt panin na paikhiatpih mite a sia-in gamta khin uh hi. Amaute ka thupiakna panin kiheikhia pak uh a, amaute a dingin a kisung milim khat bawl khin uh hi,’ hong ci hi.

¹³“Tua tham loin TOPA in kei kiangah, ‘Hih mite ka mu khin a, a lungsim khauh mite ahi hi.

¹⁴Amaute susia-in mun khempeuh panin amaute’ min ka phiat theihna dingin kei guak hong omsak in. Amaute sangin a vanglianzaw, a tamzaw minamin nang kong bawl ding hi,’ hong ci lai hi.

¹⁵“Tua ahih ciangin kihei-in mualtung panin kong paisuk a, mei in mual kangin na kuang hi. Kiciamna suangpek nihte ka khut nihte sungah om hi.

¹⁶Tua ciangin ka khuadak leh, TOPA na Pasian tung uhah na khial khin takpi uh a, a kisung bawngno milim amaute a dingin na bawl uh hi. TOPA in note hong thupiakna panin na kiheikhia pak uh hi.

¹⁷Tua ahih ciangin suangpek nihte la-in ka khut nihte’ sung panin lawnin note’ muhna-ah ka sukham hi.

¹⁸Tua ciangin a masa-a bangin sun sawmli le zan sawmli sung TOPA’ mai-ah kunin ka om a, ama heh nadingin phinin, TOPA’ muhna-ah a sia gamtatna tawh note’ khialhnate khempeuh hangin an ne lo, tui dawn loin ka om hi.

¹⁹Bang hang hiam cih leh note’ tungah TOPA’ hehna le a lungkim hetlohna, note susia dingin a kithawina hangin ka lau hi. Ahih hangin tua hunin zong TOPA in kei’ thu hong ngai hi.

²⁰Aaron’ tungah TOPA heh mahmah a, amah susia dingin kithawi a, tua hun mahin Aaron a’ ding zong thu ka ngen hi.

²¹Tua ciangin note’ khialhna, na bawlsa uh bawngno, mei tawh halin sukhamin, leivui bangin a neel dongin ka gawizan hi. Tua ciangin mualtung panin a hong luangsuk lui sungah a vuite ka lawn hi.

²²“Taberah, Massah, le Kibrothhattaavah munte-ah zong TOPA phinin na hehsak uh hi.

²³TOPA in Kadeshbarnea panin note hong sawlin, ‘Paito unla note kong piak leitang luah un,’ hong cih lai-in TOPA na Pasian uh hong thupiakna nialin, amah um loin, ama aw na ngai kei uh hi.

²⁴Note kong theih ni a kipan TOPA na nial uh hi.

²⁵“Tua ahih ciangin TOPA in note ka susia ding ci ahih manin hih sun sawmli le zan sawmli sung TOPA’ mai-ah kunin ka om hi.

²⁶TOPA’ tungah thu ka ngen a, ‘Topa PASIAN aw, nangmah in na liatna tawh na hotkhiatsa, na vangliatna tawh Egypt panin na paikhiatpih na mite le na luahte susia kei in.

²⁷Na nasem Abraham, Isaac, le Jakob phawk inla, hih mihingte’ lungsim khauhna hitaleh a gitlohna uh hitaleh a khialhna uh hitaleh thusim kei in.

²⁸Tua bang hikeileh kote nong paikhiatpihna gam mite in, “TOPA in amaute tungah a ciamsa leitangah amaute paipih zo loin, amah in amaute mudah ahih manin, sehnel gamah amaute a that dingin paikhiatpih hi,” ci kha ding uh hi.

²⁹Bang hang hiam cih leh amaute pen na vangliatna le na thahatna tawh na paikhiatpih na mihingte le na luahte ahi hi,’ ka ci hi.