Read Tedim Chin JOHAN 1 Bible Online

JOHAN 1 - Tedim Chin bible

JOHAN 1

¹A kipat cil-in Thu na om a, tua Thu, Pasian tawh na omkhawm a, tua Thu, Pasian ahi hi.

²Tua hi a, a kipat cil a kipanin Thu le Pasian na omkhawm hi.

³Pasian in Thu tawh na khempeuh piangsak a, a kipiangsak na khempeuh, Thu tawh loin a kipiangsak khat beek om lo hi.

⁴Nuntakna a nei khempeuh in tua Thu tung panin a nuntakna uh ngah a, tua nuntakna in mi khempeuh tungah khuavak hong tunpih hi.

⁵Tua khuavak pen khuamial lakah taang a, khuamial in tua khuavak a zo kei hi.

⁶Pasian in Johan kici mi khat kamtai dingin hong paisak a,

⁷mi khempeuh in ama thugenna za-in tua khuavak a uptheih nadingun tua khuavak thu a gen dingin a hong pai ahi hi.

⁸Tua Johan mahmah pen khuavak hi lo a, khuavak thu a gen dingin a hong pai ahi hi.

⁹Ama gen khuavak taktak pen zong leitungah hong tung khin a, mi khempeuh a taan khin hi.

¹⁰Amah, leitungah om a, amah tawh leitung a kibawl hinapi-in leitung mite in amah na thei kha lo uh hi.

¹¹A khua le a tui-ah va pai a, ahi zongin a khuapih a tuipihte in ama thugen na ngai lo uh hi.

¹²Tua bang hitaseleh ama thu ngai-in amah a um mite khempeuh tungah Pasian’ tate suahtheih nading thu a pia hi.

¹³Tua bangin Pasian’ tate suahna pen leitung ngeina nute pate sung panin suahna tawh hi loin Pasian sung panin suahna ahi hi.

¹⁴Tua Thu mihing hong suakin kote lakah hong om a, itna nei-in citak mahmah ahih manin Pasian’ pianzia a neihna ka mu cian uh hi. Hih pianzia pen Pasian’ Tapa khat bek hihna tawh a neih pianzia ahi hi.

¹⁵Johan in ama thu gen a, “Keima nungah hong pai hinapi-in keima suah ma-in amah omkhin ahih manin kei sangin amah lianzaw hi,” ci-in ka gen pa pen hih pa ahi hi, ci-in a kiko hi.

¹⁶A kicing ama hong itna hangin eite khempeuh tungah thupha a banbanin hong pia hi.

¹⁷Pasian in Moses tungtawnin Thukham hong pia a, ahi zongin Jesuh Khrih hangin itna le cihtakna thu hong pai hi.

¹⁸Kuamah in Pasian mu ngei lo hi. Pasian tawh a kinai pen, Pasian mah ahi Tapa khat bek in Pasian hong kilangsak hi.

¹⁹Jerusalem khua-a Jew mi uliante in Johan kiangah siampite le Levi mite paisak uh a, “Nang kua na hi hiam?” ci-in a dongsak uh hi.

²⁰Johan in zong na ipbawl loin a siangtakin na genkhia a, “Kei pen Khrih ka hi kei hi,” a na ci hi.

²¹Tua ciangin amaute in, “Tua ahihleh kua na hi hiam? Elijah na hi hiam?” a cih uh ciangin, “Ka hi kei hi,” na ci hi. Kamsangpa na hi hiam, ci-in a dot uh ciangin, ka hi kei hi, a na ci leuleu hi.

²²Tua ciangin amaute in, “Tua ahihleh kua na hi hiam? Kote hong sawlte kiangah ka gen ding uh thu hong gen in. Nang, kua kici na hi hiam?” ci-in a dot uh ciangin

²³Johan in, “Kamsang Isaiah in a na gen mah bangin, ‘Topa’ tot ding lampi na tangsak un,’ ci-in gam sungah a kikopa ka hi hi,” ci-in a dawng hi.

²⁴Hih thu a dong mite pen Farisi mite in a sawl uh ahi hi.

²⁵Amaute in Johan kiangah, “Nang pen Khrih lah hi lo, Elijah lah hi lo, kamsang lah hi lo na hih leh bang hangin tuiphum mawk na hi hiam?” ci-in a dot uh ciangin

²⁶Johan in, “Keimah in tui sungah mite a phum lel ka hi hi. Ahi zongin tu mahmahin note’ muh ngei loh mipa, note’ lak mahah hong om hi.

²⁷Keima khit ciangin note lakah amah in nasep hong kipan ahih hangin, kei pen ama khedap khau a sutsak ding nangawnin ka kilawmzo nai kei hi,” ci-in a dawng hi.

²⁸Hih bang thu kidotna a pianna mun pen Johan in mite tui phumin a omna, Jordan Gun nisuahna lam gal-a om Bethany khua ahi hi.

²⁹A zing ciangin Johan in ama kiangah Jesuh hong pai a muh ciangin, “En un, leitung mawhna a lakhia Pasian’ Tuuno hih lai-ah hong pai hi.

³⁰Keima nungah mi khat hong pai ding a, keima suah ma-in amah omkhin ahih manin kei sangin amah lianzaw hi, ci-in ka gen pa ahi hi.

³¹Amah a bangci mi hi ding cih thei lo napi-in, Israel mite in amah a theih nadingun tui sungah mite a phum dingin a hong pai ka hi hi,” a ci hi.

³²Johan in hih mipa thu teci na pang a, “Vantung panin vakhu bangin Kha hong paisukin ama tungah a om ka mu hi.

³³Keimah in amah ka theih nai loh hangin, tui sungah mite a phum dingin kei a hong sawl Pasian in, ‘A tungah Kha hong paisukin a omna mipa pen Kha Siangtho sungah mite a phum ding pa ahi hi,’ ci-in hong genkhol hi.

³⁴Tua ahih manin hih mipa pen Pasian’ Tapa hi, ci-in thei ka hih manin teci ka pang hi,” a ci hi.

³⁵A zing ciangin Johan le a nungzuite nih ding khawmin a om laitakin,

³⁶amaute gei-ah Jesuh hong pai a muh ciangin Johan in limtakin enin, “Hih lai-ah Pasian’ Tuuno hong pai hi,” a ci hi.

³⁷A nungzui tegel in hih a kampauna za uh ahih manin Jesuh a zui pah uh hi.

³⁸Jesuh kihei a, amau tegel in a zuihlam a muh ciangin, “Bang zong na hi uh hiam?” ci-in a dong hi. Amaute in, “Sia aw, koi lai-ah om na hi hiam?” ci-in a dawng uh hi.

³⁹Jesuh in, “Hong pai unla, ka omna mun hong mu un,” a na ci hi. Amau tegel in zong Jesuh va zui uh a, a omna mun a va mu uh hi. Tua hun pen nitak nai li hun pawl ahih manin ama kiangah a giak uh hi.

⁴⁰Johan kampauna za-in Jesuh a zui nihte sung panin khat pen Simon Peter’ naupa Andru ahi hi.

⁴¹A zing ciangin a u Simon zongpahin ama kiangah, “Messiah ka mu zo uh hi,” a ci hi. Tua pen Khrih a cihnopna ahi hi.

⁴²Tua ciangin Jesuh kiangah a u Simon a paipih hi. Jesuh in amah enin, “Nang pen Johan’ tapa Simon na hi hi. Tu a kipanin Sifas hong kici ding hi,” a ci hi. Sifas pen Peter tawh a kibang hi a, suangtum a cihna ahi hi.

⁴³A zing ciangin Jesuh in Galilee gamah pai ding ngaihsun hi. Filip tawh kituak a, ama kiangah, “Hong zui in,” a ci hi.

⁴⁴Filip pen Andru le Peter’ tenna Bethsaida khuami mah ahi hi.

⁴⁵Nethanel tawh a kituah ciangin Filip in, “Moses in Thukham laibu sungah a gelh mipa, le kamsangte in zong a gelh mipa ka mu khin uh hi. Amah Jesuh hi a, Nazareth khuami Josef’ tapa ahi hi,” a ci hi.

⁴⁶Nethanel in, “Nazareth khua panin bang hong piang peuhmah ding ahi hiam?” na cihsan hi. Ahi zongin Filip in, “Hong pai inla, hong mu dih in,” a ci hi.

⁴⁷Jesuh in ama kiangah Nethanel hong pai a muh ciangin, “En un, hih mipa, Israel mi taktak hi a, a lungsimah zuauthu om het lo hi,” a ci hi.

⁴⁸Nethanel in, “Kei hong bangci theih na hi hiam?” ci-in a dot ciangin Jesuh in, “Filip in nang hong sap ma-in theikung nuai-ah na om laitakin ka hong mu hi,” ci-in a dawng hi.

⁴⁹Tua ciangin Nethanel in, “Sia aw, nang, Pasian’ Tapa na hi hi. Israel mite’ Kumpi zong na hi hi,” a cih ciangin

⁵⁰Jesuh in, “Theikung nuai-ah ka hong mu hi, ka hong cih manin Pasian Tapa le Israel mite Kumpi ka hihlam hong um na hi hiam? Hihte sangin a thu lianzaw na mu lai ding hi,” a ci hi.

⁵¹Tua ciangin Jesuh in, “Ke’n a mantak kong genin-ah, vantung a kihong na mu ding uh a, Mihing Tapa le vantung kikalah Pasian’ vantung mite a kumsuk a kahto na mu ding uh hi,” a ci hi.