Read Tedim Chin JOHAN 10 Bible Online

JOHAN 10 - Tedim Chin bible

JOHAN 10

¹Tua ciangin Jesuh in, “A mantakin ci lehang, tuukulh kongah lut loin a mun dang panin kahin a lut mite pen a guta a buluh ahi hi.

²Ahi zongin tuukulh kong tawnin a lut mipa ahihleh a tuute a cing pa ahi hi.

³Tua ahih manin tuukong cing pa in a kong hon a, a tuute a min ciatin a sap ciangin a tuute in a thu mang a, amah in tuukulh panin a tuute a pusuah khiatpih hi.

⁴A tuute khempeuh a pusuah khiat khit ciangin tuate mai-ah a cing pa pai a, a cing pa’ aw thei uh ahih manin tuute in amah a zui uh hi.

⁵Tuute in midangte’ nung zui lo uh hi; midangte’ aw theithei lo uh ahih manin lau-in taisanzaw uh hi,” a ci hi.

⁶Jesuh in hih thugentehna tawh thu a gen hangin amaute in Jesuh’ gennop thu a theithei tuan kei uh hi.

⁷Tua ahih manin Jesuh in amaute kiangah thu genkik leuleu a, “A mantakin ci lehang, kei pen tuute’ paina kongpi ka hi hi.

⁸Keima hun ma-in a hong pai mite ahihleh guta buluhte ahih manun tuute in amaute don lo uh hi.

⁹Kei, kongpi ka hi hi. Keimah tawnin a pai tuu khempeuh in lauhuaina tuakkha loin, a ututun sungtumin pusuakin lonona mun a mu ding uh hi.

¹⁰Gutate pen a gu ding, a that ding, le a siasak ding bekin hong pai hi. Kei ka hih leh tuute a nungta maimai bek hi loin nuntakna cingtaak a neihtheih nadingun a hong pai ka hi hi.

¹¹“Kei, tuucing hoih ka hi hi. Tuucing hoih in a tuute sihpih ngam hi.

¹²Tuu nei taktak ahi lo, a kicialtawm tuucingpa in ngia khawng a muh ciangin a tuute nusia-in taisan ahih manin ngia in tuute man a, tuute a kithehthang gawp hi.

¹³Amah a kicial tawm ahih manin a tuute khualna lungsim nei loin a taisan ahi hi.

¹⁴Kei, tuucing hoih ka hi hi. Pa in kei hong thei-in, kei zong Pa ka theih mah bangin keimah in ka tuute ka thei a, ka tuute in zong kei hong thei uh hi. Tua ahih manin ka tuute ka sihpih ngam hi.

¹⁶Hih tuukulh sungah a om lo tuu dang ka nei lai hi. Tuate zong tuukulh sungah ka khum ding a, amaute in keima thu ngai-in, keima khut sungah ka tuu omsate tawh honkhat suakkhawm ding uh hi.

¹⁷Ka nuntakkik theih nadingin si ngam ka hih manin ka Pa in kei hong it hi.

¹⁸Kuamah in ka nuntakna hong laksak thei lo a, keima utthu tawh ka piak hizaw hi. Ka nuntakna piakkhiat theih nading le lakkik theih nading thu ka Pa in kei tungah a hong piak ahi hi,” a ci hi.

¹⁹Hih bangin thu a gen ciangin Jew mihonte a ngaihsutna uh kituak lo leuleu hi.

²⁰Mi tampi tak in, “Hih pa pen dawivei, mihai hi lel ahih manin a thugen ngaih taak lo hi,” ci uh a,

²¹pawlkhat in, “Dawiveite in hih bangin thu gen thei lo hi. Dawi in mittawte khua musak thei ding ahi hiam?” a ci uh hi.

²²Jerusalem-ah Biakinn Apkikna Pawi bawl hun hong tung a, phalbi hunsung ahi hi.

²³Biakinn huangsung Solomon’ Talap a kici sungah Jesuh vak kawikawi-in a om laitakin

²⁴Jew mihonte ama kiangah hong kikhawm uh a, “Thu kitel loin bang tanvei koih hong sawm na hi hiam? Khrih na hih leh zong teltakin hong gen in,” ci-in a dot uh ciangin

²⁵Jesuh in, “Hong genkhin napi ing-in Topa ka hihna thu na hong um kei uh hi. Ka Pa’ thu tawh na ka septe in hong kilangsak khinzo hi.

²⁶Ahi zongin note pen keima tuu hi lo na hih manun Khrih ka hihlam na hong um kei uh hi.

²⁷Keima tuute in ka aw za-in thei uh ahih manin kei hong zui uh hi.

²⁸Tua ahih manin amaute tungah nuntak tawntungna pia ka hih manin si ngei nawn lo ding uh a, keima khutsung panin kuamah in amaute hong sut zo lo ding uh hi.

²⁹Ka khut sungah a hong pia ka Pa sangin a lianzaw kuamah om lo ahih manin ka Pa’ khutsung panin kuamah in lakhia zo lo ding hi.

³⁰Kei le ka Pa pumkhat ka hi uh hi,” ci-in a dawng hi.

³¹Tua ciangin Jew mihonte in amah deng dingin suang tawm leuleu uh ahih manin

³²Jesuh in, “Ka Pa’ hong sawl bangin note’ muhna-ah na hoih tampi ka hong sepna hangin suang tawh den hong sawm na hi uh hiam?” a cih ciangin

³³mihonte in, “Nasep hoih na sep manin hong dengnuam ka hi kei uh a, Pasian na simmawhbawl manin hong dengnuam ka hi uh hi. Nang pen mi hi lel hinapi-in Pasian na kineihnuam hi,” ci-in a dawng uh hi.

³⁴Tua ciangin Jesuh in, “Na Thukham sung uhah Pasian in, ‘Note pen pasian-te na hi uh hi,’ ci hi.

³⁵Lai Siangtho sungah a kigelh thute a tawntungin a thuman hi a, Pasian’ thu a ngah mite pen Pasian in, ‘pasian-te,’ na ci hi.

³⁶Tua ahih manin kei pen Pa Pasian in hong teelin leitungah a hong sawl ka hih manin, ‘Pasian’ Tapa ka hi hi,’ ka cih ciangin bang hangin Pasian simmawhbawl hong cithei na hi uh hiam?

³⁷Ka Pa’ na a sem lo hi leng na hong uploh mah ding uh ahi hi.

³⁸Ahi zongin keimah in ka Pa’ na sem ka hih manin keima thu na hong um nuam lo uh ahi ta zongin, Pa tawh pumkhat ka hihna thu na theih nadingun ka nasepnate na up dingun kilawm buang hi,” a ci leuleu hi.

³⁹Tua ciangin amaute in Jesuh matsawm uh hi; ahi zongin amaute’ khutsung panin Jesuh a suakta hi.

⁴⁰Tua ciangin Jordan Gun kantanin amah pai leuleu a, Johan in mite a tuiphum masakna munah tungin tua lai-ah a om hi.

⁴¹Ama kiangah mi tampi tak hong kikhawm uh a, “Johan in nalamdang bangmah bawl lo hi. Ahi zongin Johan in hih mipa thu a gen khempeuh a vekpi-in mankim hi,” a ci uh hi.

⁴²Tua ahih manin tua lai-ah mi tampi in Jesuh a um uh hi.