Read Tedim Chin JOHAN 11 Bible Online

JOHAN 11 - Tedim Chin bible

JOHAN 11

¹Tua laitakin Mary le a unu Martha’ omna Bethany khua-ah Lazaras a kici mi khat a ci na hi.

²Mary i cih pen Jesuh sathau nuhin a sam tawh a nulsaknu hi a, Lazaras pen ama u ahi hi.

³Tua ahih manin a nau numei tegel in Jesuh kiangah, “Topa aw, na it mipa a ci na hi,” ci-in thu a zasak uh hi.

⁴Ahi zongin Jesuh in tua thu a zak ciangin, “Hih natna pen sihna ding natna hi lo a, Pasian’ Tapa in Pasian’ pianzia a neihna mite in a theih nading, le Pasian a phattheih nadingin a na ahi hi,” a ci hi.

⁵Jesuh in Martha-te unau le Lazaras it mahmah hi.

⁶Tua hinapi-in a cinat a zakkhit ciangin tua lai-ah ni nih taam lai veve hi.

⁷Tua khit ciangin a nungzuite kiangah, “Judea gamah paikik ni,” a cih leh

⁸a nungzuite in, “Sia aw, zan mah deuhin Judea gam mite in nang denlup hong sawm uh ahih manin tua gamah paikik sawm na hi hiam?” a cih uh ciangin

⁹Jesuh in, “Sun khuavak hun nai sawm le nih sung hi lo ahi hiam? Mi khatpeuh tua khuavak sungah lampai leh pukkha cih om lo hi.

¹⁰Ahi zongin zan khuamial sungah lampai leh khuavak nei lo ahih manin pukthei hi,” a cih khit ciangin

¹¹a nungzuite kiangah, “I lawmpa Lazaras ihmu zo hi. Ahi zongin amah a phong dingin ka pai ding hi,” a ci hi.

¹²Tua ciangin a nungzuite in, “Topa aw, amah ihmu ahihleh a nuamtuam hita ding hi,” a ci uh hi.

¹³Jesuh in amah si hi, a cinuam hinapi-in, a nuamtuamin a ihmu hi, a ci-in a nungzuite in ngaihsun uh hi.

¹⁴Tua ahih manin Jesuh in a teltakin gen a, “Lazaras si khinta hi.

¹⁵Ahi zongin note in na uptheih nadingun tua lai-ah kei om kha lo ka hih manin note kong khualna-in ka nuam mahmah hi. Ahi zongin tu-in ama kiangah va pai ni,” a ci hi.

¹⁶Tua ciangin, “Unau Peeng,” minno a nei Thomas in, “Ei zong amah tawh a sikhawm dingin va zui ni,” ci-in a nungzuihpihte a zawn hi.

¹⁷Jesuh a tun ciangin Lazaras a kivui zawh ni li a phak khitna thu a thei hi.

¹⁸Bethany le Jerusalem kikal tai nih bang bek kigamla ahih manin,

¹⁹a upa uh Lazaras a sihna hangin Martha le Mary a hehnem dingin Jew mi tampi zong hong pai uh hi.

²⁰Jesuh hong paina thu Martha in a zak ciangin a dawn dingin va paikhia a, Mary ahihleh a inn mahah omlai hi.

²¹Martha in Jesuh kiangah, “Topa aw, hih lai-ah a om hi lecin ka u si het lo ding hi.

²²Tu nangawnin na nget peuhpeuh Pasian in hong piak ding ka thei hi,” a ci hi.

²³Jesuh in, “Na u hong thokik ding hi,” a cih leh

²⁴Martha in, “Nitawp ni-a thawhkik ni ciangin hong thawhkik ding ka thei hi,” a ci hi.

²⁵Tua ciangin Jesuh in, “Keimah in a sisa mite thosakin a hingsak thei pa ka hi hi. Kei hong um mi peuhmah a sih hangin nungta ding hi.

²⁶A nungta a kei hong um mite si ngei nawn lo ding hi. Hih thu na um hiam?” a cih ciangin,

²⁷“Ka um hi, Topa aw; leitungah a hong pai ding Pasian’ Tapa, Khrih na hihna thu ka um hi,” ci-in a dawng hi.

²⁸Tua khit ciangin Martha a inn-ah va tai-in a naunu Mary va huausim a, “Siapa hong pai a, nang hong sam hi,” a ci hi.

²⁹Tua thu a zak ciangin Mary dingin Jesuh a dawn dingin a paikhia hi.

³⁰Jesuh, khuasung hong tung nai lo a, Martha tawh a kimuhna mun mahah na omlai hi.

³¹Amah hehnemin inn-ah a ompih mite in Mary dingin a paikhiatna a muh uh ciangin, hanah a kap dingin a pai ding hi, ci-in ngaihsun uh ahih manin a zui uh hi.

³²Jesuh omna munah Mary tungin amah a muh ciangin ama khe mai-ah bok a, “Topa aw, nang hong om hi lecin ka u si het lo ding hi,” ci-in a kap hi.

³³Jesuh in Mary le amah hong zui Jew mite a kahna a muh ciangin a lungsim nakpitakin sukha-in lunggim mahmah ahih manin,

³⁴“Koi-ah vui na hi uh hiam?” a ci hi. Amaute in, “Topa aw, hong pai inla hong en in,” a ci uh hi.

³⁵Tua ciangin Jesuh zong a kap hi.

³⁶Tua ahih manin amaute in, “Jesuh in zong Lazaras nak it mahmah hi,” a ci uh hi.

³⁷Ahi zongin pawlkhatte in, “Mittawte khua a musak thei hih mipa in amah a sih loh nadingin bawl thei lo ahi hiam?” a ci uh hi.

³⁸Jesuh a dah hong suak mahmah kik ahih manin leihawm sungah kivui-in suangtum tawh a gong a kihukna hanah a pai hi.

³⁹A phual a tun ciangin, “Suangtum likkhia un,” ci-in thu a pia hi. Tua ciangin misi pa’ naunu Martha in, “Topa aw, a kivui zawh ni li phakhin ahih manin uihta ding hi,” a cih leh

⁴⁰Jesuh in, “Na up nakleh Pasian’ vangliatna na mu ding hi, ci-in hong genkhin hi lo ka hi hiam?” a ci hi.

⁴¹Tua ahih manin a suangtum a likkhia uh hi. Jesuh zong van lam dakto-in, “Pa aw, ka thungetna hong ngai na hih manin ka nuam mahmah hi.

⁴²Ka thungetna na hong ngaih tawntungna thu ka thei a, ahi zongin hih lai-ah a om mite in kei na hong sawlna thu a uptheih nadingun tu-a bangin kam a hong pau ka hi hi,”

⁴³a cih khit ciangin nakpitakin kiko-in, “Lazaras aw, hong pusuak in,” a ci hi.

⁴⁴Tua ciangin a misi pa a khut a khe dial tawh kituamin, a maitang puan tawh a kitunsa-in hong pusuak hi. Jesuh in amaute kiangah, “A dial le a puante phelkhia un,” a ci hi.

⁴⁵Tua ahih manin Mary kiangah hawhin Jesuh’ hihna a mu Jew mi tampi in amah a um uh hi.

⁴⁶Ahi zongin amaute pawlkhat Farisi mite kiangah pai-in Jesuh’ sep nate a va ko uh hi.

⁴⁷Tua ahih manin siampi liante le Farisi mite in thu vaihawm uliante tawh kikupna khat nei uh a, “Hih mipa in nalamdang tampi bawl ahih manin bangcih ding ihi hiam?

⁴⁸Hih bangin omom sak lehang mi khempeuh in amah um ding uh a, Rom kumpite in i Biakinnpi hong suksiat sakin i minambup zong hong sugawp ding uh hi,” a kici uh hi.

⁴⁹Tua laitakin amaute sung panin tua kumin siampi lianpen a sem Kaiafas a kici mipa in, “Note in bangmah na thei kei uh hi.

⁵⁰I minambup in siatna a thuak sangin i minambup tangin mi khat si leh a hoihzawkna thu phawk lo na hi uh hiam?” a ci hi.

⁵¹Hih bangin thu a gen ciangin ama lungsim a gen hi lo a, tua kumin siampi lianpen a sem ahihna tawh Jew mite’ tangin Jesuh a si ding ahihna thu a genkhol ahi hi.

⁵²Jew mite a’ ding bek hi loin a kithehthang Pasian’ mi khempeuh pumkhat a suah nadingin a kikaihkhop nading thu zong a genkhol ahi hi.

⁵³Tua ahih manin tua hun a kipanin Jesuh a thahtheih nadingun a vaihawm uh hi.

⁵⁴Tua ahih manin Judea gam sungah a kilangin Jesuh khualzin nawn lo a, amah paikhia-in sehnel gam gei-a om Efraim a kici khua-ah tungin tua lai-ah a nungzuite tawh a om hi.

⁵⁵Jew mite’ Paisan Pawi hun hong nai ciangin, tua pawi kipatma hun sungin biakna vai-in kisiansuahna a bawl dingin gam sung khuate panin Jerusalem khuapi-ah mi tampi hong pai uh hi.

⁵⁶Biakinn sungah kikhawmin a om laitakun Jesuh a mu dingin amaute khuadak kawikawi-in kiho uh a, “Jesuh hong pai dingin na um hiam?” ci-in khatlekhat kidong uh hi.

⁵⁷Bang hang hiam cih leh siampi liante le Farisi mite in Jesuh a mattheih nadingun, “Jesuh a omna a thei na om uhleh hong ko un,” ci-in thupiakna nei khinzo uh hi.