Read Tedim Chin JOHAN 13 Bible Online

JOHAN 13 - Tedim Chin bible

JOHAN 13

¹Tu-in Paisan Pawi hun ding ni khat bek in sam a, Jesuh in hih leitung nusia-in a Pa kiangah a pai ding hun a tunna thu a thei hi. Hih leitungah a om ama mite it mahmah ahih manin a hih theihna zah ciang tawh a itna a lak hi.

²Jesuh le a nungzuite nitak an ne-in a tukhawm uh hi. Tua hun laitakin dawimangpa in Simon Iskariot’ tapa Judas’ lungsim sungah Jesuh lehhek nading ngaihsutna koih khinzo hi.

³A Pa in ama khut sungah vangliatna khempeuh a piakna le Pasian in amah a sawl mah bangin tu-in Pasian kiangah a paikik ding ahihna thu zong a thei hi.

⁴Tua ahih manin a annekna sabuai panin Jesuh dingkhia-in a puantungsilh suahkhia a, a kawngah a mainulpi a teeng hi.

⁵Tua ciangin kuangpi sung khatah tui sung a, a nungzuite’ khe silsakin a kawngah a teen a mainulpi tawh a nul keusak dingin a kipan hi.

⁶Simon Peter’ khe silsak dingin a kipat ciangin Peter in, “Topa aw, ka khe hong silsak zenzen ding na hi hiam?” a na ci hi.

⁷Jesuh in, “Tu-a ka gamtatna thu na theih loh hangin nidang ciangin na thei ding hi,” a ci hi.

⁸Peter in, “Nang peuhmah ka khe ka hong silsak ngei buang kei ding hi,” a cih ciangin, “Na khe hong silsak kei leng, kei tawh na kipawl thei nawn kei ding hi,” a ci hi.

⁹Tua ciangin Simon Peter in, “Topa aw, tua bang ahihleh ka khe bek hong silsak kei inla, ka khutte le ka lu zong hong silsak in,” a na ci leuleu hi.

¹⁰Jesuh in, “A kipumsil khinsa mite siangthota ahih manin a khe simloh silkik ding kisam nawn lo hi. Note sung panin khat simloh na vekpi-un na siang khin uh hi,” a ci hi.

¹¹Jesuh in amah a lehhek ding pa theikhin ahih manin, “Note sung panin khat simloh na siangkhin uh hi,” a ci ahi hi.

¹²Jesuh in amaute’ khe a silsak khit ciangin a puan silhkik a, annek sabuai-ah a tutnasa mun hong zuanin, “Tu-a note tungah ka hong gamtatna thu na thei uh hiam?

¹³Note in kei pen Siapa, le Topa, na hong ci uh hi. Na hong cih uh mah bangin a man ka hi hi.

¹⁴Note’ Topa le Siapa in na khe uh hong silsak ka hih leh note khatlekhat na kisilsak kan ding uh kilawm hi.

¹⁵Note tungah ka hong gamtat bangin note na gamtat theih nadingun a lim a hong lak ka hi hi.

¹⁶A mantakin ci lehang, sila pen a topa sangin lianzaw ngei lo a, a kisawlpa zong a sawl pa sangin lianzaw ngei lo hi.

¹⁷Hih thu thei-in na zuih uhleh na lung uh nuam mahmah ding hi.

¹⁸“Hih bangin ka hong genna in note khempeuh hong huam kim lo hi. Ka teelsa mite ka thei hi. Lai Siangtho in, ‘Ka an a ne pa in kei hong langpang hi,’ a cihna thu a tun ding kisam hi.

¹⁹Hih thu hong tun taktak ciangin, ‘Kei kua ka hihna,’ na hong theih nadingun a hun ma-in a hong ma gen ka hi hi.

²⁰A mantakin ci lehang, keima hong sawl mite a sangte in kei zong a hong sang ahi uh a, kei a hong sangte in kei a hong sawl pa zong a sang ahi uh hi,” a ci hi.

²¹Jesuh in hih thuteng a genkhit ciangin lungkham mahmah ahih manin, “A mantakin ci lehang, note khat in kei nong lehhek ding uh hi,” ci-in a kilangin a genkhia hi.

²²Kua a cihnopna hi ding ahi hiam, ci-in a nungzuite khatlekhat a ki-en uh hi.

²³Jesuh in a itdiak a nungzuite khat ama kiangah tu ahih manin,

²⁴Simon Peter in a mitheek tawh amah hopih a, “Kua a cihnopna ahi hiam?” dong in, ci-in a sawl hi.

²⁵Tua ahih manin tua nungzui pa in zong Jesuh nehphei lai deuhin, “Topa aw, kua ahi hiam?” ci-in a dong hi.

²⁶Jesuh in, “Anlum, meh sungah diahin ka piak ding pa ahi hi,” a cih khit ciangin a anlum diahin Simon Iskariot’ tapa Judas a pia hi.

²⁷Judas in tua an a nek khit phetin ama sungah Satan hong lutpah hi. Tua ahih manin Jesuh in ama kiangah, “Na hih ding peuhpeuh hihpak in,” a ci hi.

²⁸Ahi zongin sabuai-ah a tutkhawmpih mite in hih bangin a cihna thu thei lo uh hi.

²⁹Amah sumkem ahih manin hih pawi a zat ding a kisam na pawlkhat a lei dingin a sawl hi ding hi; tua ahih kei leh zong mizawngte pawlkhat tungah sum a pia dingin a sawl hi ding hi, ci-in nungzui pawlkhat in a ngaihsun uh hi.

³⁰Tua hi a, Judas in a an a sankhit ciangin a paikhia pah hi. Tua hunin khua mial khinta hi.

³¹Judas a paikhiat khit ciangin Jesuh in, “Tu-in Mihing Tapa in Pasian’ pianzia a neihna hong kilang ding hita hi; ama hangin Pasian in minthanna a ngah ding ahi hi.

³²Ama hangin Pasian in minthanna a ngah mah bangin Pasian in zong ama pianzia amah ngahsak ding a, a sawt loin ngahsak pah ding hi.

³³Ka tate aw, note tawh sauvei ka hong omkhawm nawn kei ding hi. Note in kei na hong zong ding uh a, ahi zongin Jerusalem khua-a Jew uliante kiangah, ‘Ka paina munah na hong pai thei kei ding uh hi,’ ci-in ka gen mah bangin note kiangah zong tu-in ka hong gen hi.

³⁴Note tungah ka hong piak thak thu in: Note khatlekhat na ki-it ding uh ahi hi. Note ka hong it mah bangin note khatlekhat na ki-it un.

³⁵Note khatlekhat ki-it le-uhcin keima nungzuite na hihna uh mi khempeuh in hong thei ding uh hi,” a ci hi.

³⁶Tua ciangin Simon Peter in, “Topa aw, koi-ah pai ding na hi hiam?” ci-in a dot ciangin Jesuh in, “Ka paina dingah tu-in na hong zui thei nai kei ding hi; ahi zongin nidang ciangin na hong zui ding hi,” ci-in a dawng hi.

³⁷Peter in, “Bang hangin tu-in hong zui thei lo ding ka hi hiam? Nang ka hong sihpih ding hi,” a cih ciangin

³⁸Jesuh in, “Kei hong sihpih ngam ding na hi hiam? A mantakin kong genin-ah, kei thumvei na hong nialkhit matengin ak khuang lo ding hi,” ci-in a dawng hi.